Bjarni Harðarson

Netfang: bjarnihardar@gmail.com Farsími: 897 3374 Sími á vinnustað 482 3074. - Um Bjarna Fjölskylduhagir Bjarni er kvæntur Elínu Gunnlaugsdóttur kennara og tónskáldi frá Laugarási. Þau eiga saman synina Egil blaðamann og Palestínufara og rokkarann Gunnlaug. Fyrir átti Bjarni börnin Magnús Þór og Evu. Magnús ólst upp á heimili Bjarna og Elínar og er nýlega fluttur að heiman í svokallaða sjálfstæða búsetu með aðstoð frá Svæðisskrifstofu fatlaðra á Suðurlandi. Hann er starfsmaður Bónus á Selfossi. Eva sem er í móðurætt frá Fagurhólsmýri í Öræfum ólst upp í Reykjavík og Mosfellsbæ. Hún er nemi í klæðskeraiðn og íslensku í Reykjavík. Bjarni og Elín hófu sambúð sína í lítilli íbúð á Hverfisgötu í Reykjavík en fluttu 1988 á Eyrarbakka og þaðan á Selfoss 5 árum síðar. Frá aldamótum hafa þau búið í gömlu og vinalegu bárujárnshúsi við Austurveg þar sem heitir Sólbakki. Hver er maðurinn Bjarni Harðarson er fæddur í Árnýjarhúsi í Hveragerði á jóladag 1961. Foreldrar hans eru Hörður Vignir Sigurðsson fyrrverandi garðyrkjubóndi og Ingibjörg Bjarnadóttir húsfreyja. Bjarni er miðbarn þeirra hjóna, eldri er Atli Vilhelm f. 1960 aðstoðarskólameistari á Akranesi og Kristín Þóra framkvæmdastjóri og laganemi í Reykjavík, f. 1965. Bjarni ólst upp í Laugarási í Biskupstungum þar sem foreldrar hans reistu nýbýlið Lyngás árið 1964. Á æskuárum starfaði Bjarni í gróðurhúsum foreldra sinna þar sem ræktuð voru afskorin, jólastjarna og fleira. 13 ára starfaði hann eitt sumar við hefðbundinn búskap hjá þeim bræðrum Jóni og Birni Sigurðssonum í Úthlíð í sömu sveit. Bjarni gekk í barnaskóla í Reykholti og lauk grunnskólaprófi frá miðskóladeild Heimis Steinssonar í Skálholti. 15 ára hóf Bjarni nám í Menntaskólanum að Laugarvatni og tók þar stúdentspróf 1981. 1981 hóf Bjarni nám í sagnfræði við Háskóla Íslands en sneri sér síðan að blaðamennsku án þess að hafa lokið þar prófi. Frá 2002 hefur Bjarni stundað nám í þjóðfræði við Háskóla Íslands meðfram vinnu og áætlar að ljúka þar BA prófi vorið 2007. Starfsferill 1980 starfaði Bjarni við fiskvinnslu hjá KASK á Hornafirði og almenna verkamannavinnu hjá Vélaver á sama stað seinni hluta þess sama sumars. 1982 starfaði Bjarni sem sjálfboðaliði á samyrkjubúi, við fornleifauppgröft og fleira í Ísrael og Palestínu um 6 mánaða skeið. 1983 ritstjóri Stúdentablaðsins í umboði Umbótasinna í Stúdentaráði HÍ. 1984 blaðamaður á Tímanum, NT og síðar Helgarpóstinum. 1985 lausamaður við ýmis blöð í Reykjavík og víðar. Stundaði á þeim árum ferðalög um Himalajafjöll, Breiðafjarðareyjar og fleiri áhugaverða staði jarðarkringlunnar. 1986 ritstjóri Bóndans. 1987 stofnaði ásamt fleirum Bændablaðið og rak það og ritstýrði næstu 7 ár. 1988 – 1990 ritstjóri Þjóðólfs sem er málgagn Framsóknarmanna á Suðurlandi 1991, stofnaði Sunnlenska fréttablaðið ásamt fleirum og hef rekið það síðan. 2001, stofnaði Sunnlensku bókaútgáfuna sem gefið hefur út nokkrar bækur. 2006, stofnaði Sunnlenska bókakaffið sem er bókaverslun og kaffihús. Ættir Sem fyrr segir eru foreldrar Bjarna þau Hörður Vignir Sigurðsson f. 1934 og Ingibjörg Bjarnadóttir f. 1940. Þau eru nú búsett í Hveragerði. Bjarni ber nafn móðurafa síns, Bjarna Sæmundssonar verkamanns í Hveragerði en hann var frá Garðsauka í Hvolhreppi. Bjarnanafnið er komið úr skaftfellskri móðurætt Bjarna Sæmundssonar og má rekja það aftur til Bjarna sáttamanns í Skaftafelli sem flestir Öræfingar eru komnir frá. Faðir Bjarna í Hveragerði, Sæmundur í Garðsauka var merkur frumkvöðull í Rangárþingi, fyrsti bíleigandinn þar eystra, sparisjóðsstjóri, verslunarmaður og mikill jarðabótamaður. Móðuramma Bjarna og kona Bjarna Sæmundssonar var Sigurrós Guðlaugsdóttir frá Gvendarkoti í Þykkvabæ. Forfeður hennar voru fátækir bændur og þurrabúðarmenn í Þykkvabæ, Látalæti á Landi og víðar. Í frændgarði Sigurrósar má telja fjölmargar alþýðuhetjur og merkismenn svo sem Möngu í Ranakoti, Skúla Helgason fræðimann, Guðrúnu Ívarsdóttur draug og Hafliða Guðmundsson sveitarhöfðingja í Búð í Þykkvabæ. Hörður Vignir Sigurðsson garðyrkjubóndi er fæddur í Reykjavík og voru foreldrar hans Kristín Björnsdóttir frá Fáskrúðsfirði og Sigurður Benediktsson póstafgreiðslumaður frá Keldudal í Skagafirði. Sigurður átti allar sínar ættir í Skagafirði, afkomandi Sigurðar Þorsteinssonar sem var einn fylgdarmanna Reynisstaðabræðra 1780. Afi Sigurðar Benediktssonar var Halldór Skagfjörð sem vann um árabil við smíðar í New York en lést í Skagafirði. Kristín Björnsdóttir var komin af þurrabúðarfólki á Fáskrúðsfirði og Hafnarfirði. Móðir hennar, Sesselja Helgadóttir var af Veldingætt og Björn Jónsson faðir hennar fjórði maður frá Jóni almáttuga á Austaralandi.

Ábyrgðarmaður skv. Þjóðskrá: Bjarni Harðarson

Innskráning

Ath. Vinsamlegast kveikið á Javascript til að hefja innskráningu.

Hafðu samband