Heim og heiðursmanna minnst

Besti hluti hvers ferðalags er heimkoman. Ég var að vísu eftir mig þegar ég kom í fyrradag frá Afríku enda flugferðin í það heila yfir 22 tímar. Samt frekar þægileg og núna á eftir fer ég að sækja Egil sem náði vél sólarhring eftir mér og stoppaði dag í London. Sjálfur fór ég í gegnum Róm og Stokkhólm, allt á vegum dohop.is sem er tvímælalaust sterkasta leitarvél vefsins þegar kemur að flugfargjöldum.

Fljótt á litið finnst mér fátt hafa borið við hér heima þessar þrjár vikur sem ég var í burtu nema andlát tveggja stórmenna sem báðir voru mér kærir.

Annar er Sigsteinn Pálsson á Blikastöðum sem lést 104 ára nú í byrjun mánaðar. Hann var ömmubróðir konu minnar og frá Tungu í Fáskrúðsfirði sem lauslega kemur við sögu minnar eigin ættar. Sigsteini kynntist ég þegar ég átti við hann stutt blaðaviðtal 1986 um líkt leyti, en ég var þá sjálfur að stíga i vænginn við frænku hans, Elínu mína og hafði vitaskuld ekki orð á. Mér er í fersku minni afar skemmtilegt spjall við þau hjón Sigstein og Helgu konu hans á heimili þeirra á Blikastöðum.

 

Nokkrum dögum á undan Sigsteini fór Steingrímur Hermannsson fyrrverandi forsætisráðherra, hinn mætasti maður og vinur vina sinna. Vinátta okkar Steingríms hófst með kynnum okkar í stjórn Heimssýnar og var mér lærdómsrík og kær. Steingrímur var stjórnmálaforingi sem hélt um stýrið hjá sínum flokki og sinni þjóð af festu en samt með lipurð og mildi. Kannski varð okkur enn meiri eftirsjá að honum sem stjórnmálaforingja á sínum tíma vegna þess hvað þeir sem við tóku, bæði í Framsókn og við stjórn þjóðarskútunnar, höfðu allt annan og um margt óbilgjarnari stjórnunarstíl. 

Blessuð sé minning heiðursmanna. 

Athugasemdir

[Ásdís Sigurðardóttir, 19.2.2010 kl. 12:59]

Velkominn heim.

[Árni Gunnarsson, 21.2.2010 kl. 18:37]

Undir það ættu allir að geta tekið að þessir tveir menn hafi unnið til góðra eftirmæla, hvor á sinn hátt. Sigsteinn var magnaður bóndi og þau hjón áttu myndarlegt stórbýli sem ævinlega var vel hirt og bændastéttinni til sóma. Jafnframt voru þau hjón þjóðkunn fyrir störf sín að félagsmálum.

Steingrímur kom inn í íslenska stjórnmálabaráttu sem vel mótað foringjaefni og óx til forystu þegar á fyrstu árum. Hann hafði óvenju sveigjanlegan og þó ákveðinn stíl og sigldi farsællega gegn um hinn pólitíksa ólgusjó. Hann var trúr sínum rammíslenska uppruna og jafnframt heimsborgari og tókst án nokkurra árekstra að þjóna báðum.