Sigurði fót vel tekið

Sigurður fótur hefur hlotið afbragðsgóðar viðtökur gagnrýnenda og kaupenda. Komst einu sinni á metsölulista Eymundsson og enn er vika eftir! Að minnsta kosti þrír bókadómar hafa birst um bókina og hennar getið vinsamlega í framhjáhlaupi víðar. 

Helgi Bjarnason skrifar m.a. í dómi sínum:

Höfundurinn er fundvís á ýmis skondin atvik úr lífi venjulegs fólks sem flestir ættu að kannast við og jafnvel talið sína persónulegu upplifun. Þá er sagan hlaðin skemmtilegum lýsingum á atburðum og samskiptum fólks og tilsvörum.

Sjá nánar. 

Jón Daníelsson skrifar í Sunnlenska:

Svona grátlega – eða hlálega – vitlaus er íslenskur raunveruleiki. Í þessari nýju bók sinni setur Bjarni Harðarson grátlegan raunveruleika síðasta áratugar í búning fáránleikafarsa, sem stundum verður svo hlálegur, að lesandinn gæti haldið að hann væri staddur í miðri bók eftir þann ágæta meistara skopsögunnar P. G. Wodehouse.

Sjá nánar.

Loks skrifar Jón Þ. Þór ágætan dóm þó hann hafi verið svoldið spar á stjörnur sem er eiginlega svoldið sætt, allavega fallegra en þegar ritdómar standa varla undir þeim stjörnum sem á þeim hvíla. Jón Þ. segir m.a.:

Frásagnarmáti höfundar er lipur og myndrænn, á köflum bráðfyndinn og margar persónulýsingar einkar skemmtilegar. Þó er þetta engin skemmtisaga, miklu frekar hárbeitt háðsádeila á íslenskt samfélag undanfarna tvo áratugi eða svo. 

Sjá nánar

Athugasemdir

[Pjetur Hafstein Lárusson (IP-tala skráð) 17.12.2010 kl. 14:30]

Já Bjarni minn, hún hefur aldrei þótt skaða, hógværðin.

[Halldór Egill Guðnason, 18.12.2010 kl. 02:08]

Sá rithöfundur, er telur sér of fáum stjörnum tileinkaðar í ritdómum, hlýtur að vera nokkuð öruggur með sjálfan sig. Bókin  "Sigurðar saga fóts", er alveg prýðislesning, en fyrir alla muni ekki ofmetnast, Bjarni góður. Stjörnugjöf gagnrýnenda er ekki heilagur kaleikur og yfirleitt sér tíminn um gagnrýnendur,  en ...ekki höfunda   Til hamingju með góða bók.

[Valgeir Matthías Pálsson (IP-tala skráð) 19.12.2010 kl. 20:18]

Eigðu góða daga Bjarni minn, njóttu kvöldsins vinur.