Hvað segir peningafrjálshyggjan nú?

Talsmenn hins frjálsa flæðis kapítalismans trúa því að markaðsskráning gengis og frjálst flæði sé forsenda framfara. Um þessar kennisetningar hafa talsmenn tveggja stærstu stjórnmálaflokka landsins löngum sammælst og fengið ótrúlega marga á sitt band.

Þá breytir engu að nú síðustu áratugi meðan frelsið hefur verið sem mest í okkar heimshluta hafa framfarirnar og hagvöxtur orðið mest í löndum sem öðru vísi haga sínum málum, s.s. Afríku, Kína og Indlandi. Og fyrir þessum trúmönnum breytir heldur engu að hröðustu framfarir frá fátækt til velmegunar bæði hér á landi og víða í hinum vestræna heimi urðu ekki undir nútíma peningaoki alþjóðakapítalisma og frjálshyggju. 

Og nú stígur Frakklandsforseti fram og kveinkar sér undan evrunni. Hann er reyndar ekkert einn um það, öll Suður Evrópu stynur og blæðir undan frelsi gjaldmiðilsins sem enginn má stýra nema sá sterki og ríki. Það vill nefnilega til að frelsi peningaaflanna hefur í för með sér ófrelsi þjóða.

Hátt gengi evrunnar ógnar ESB

Athugasemdir

[Marvi (IP-tala skráð) 5.2.2013 kl. 21:41]

Það er enginn gjaldmiðill gallalaus. En væri gjaldmiðillinn forsenda framfara þá hefði styrkur pundsins átt að koma í veg fyrir iðnbiltinguna eða ræfildómur krónunnar að hafa haldið okkur í torfkofunum. Framfarirnar verða hver sem gjaldmiðillinn er. Spurningin er bara hvort eftir allar þessar framfarir þú viljir lífskjör Evrópubúa eða Kínverja.

Ef sameinuð ríki norður ameríku þyrftu að taka upp Yuan kínverja þætti þeim þeir hafa glatað frelsi. En ef Kínverjar tækju upp dollar mundu stjórnvöld þar telja sér ógnað af nýfengnu frelsi þegna sinna. Gjaldmiðill er ekki bara eitthvað sem þú kaupir tómatsósu fyrir. Gjaldmiðill getur verið bæði átthagafjötrar og frelsun frá kúgun stjórnvalda. Það vill nefnilega til að frelsi peningaaflanna hefur í för með sér frelsi alþýðunnar. Sumir gamlir kommar og latir pólitíkusar þola ekki þá hugsun.

Hröðustu framfarir frá fátækt til velmegunar bæði hér á landi og víða í hinum vestræna heimi urðu undir gunnfána kapítalisma og frjálshyggju. Haftastefna kommúnismans skilaði ekki sömu lífskjörum. Þó var ekki mikill munur á framförum í læknisfræði, vísindum, menntun og menningu. Og hæpið að vera að setja gjaldmiðlana sem einhvern orsakavald í þau dæmi.

Marga gamla stjórnmálamenn Evrópu dreymir gamla tíma þegar þeir þurftu ekki annað en fella gengið til að redda málunum. En almenningur hefur ekki sýnt neina löngun til að hverfa aftur til þess tíma. Yfir 80% stuðningur Spænskrar alþýðu við Evruna sýnir það vel. Sú kvöð að þurfa nú að stunda ábyrga fjármálastjórn kemur illa við margan pólitíkusinn. Þeir hafa misst þetta vald yfir þegnum sínum sem strjúka sér nú um frjálsara höfuð.

[Kalli Sveinss (IP-tala skráð) 6.2.2013 kl. 21:03]

Félagi Bjarni !

 Er rangt munað að þú hafir fyrir örfáum árum trúað því að  " markaðsskráning gengis og frjáls flæðis væru forsemdur framfara" ?

 Þér er ekki samboðið að nota kolryðgaðann Sovét-frasa, að " frelsi peningaaflanna hafi í för með sér ófrelsi þjóða"

 Hafirðu ekki heyrt það fyrr, skal upplýst að þessi útkjálka-frasi er í upphafi frá Engels kominn, síðan lofaður af Marx og loks endurtekinn ótal sinnum af Lenin !!

 Varla ætlarðu aftur í pólitík með slíka endemis dellu sem kjörorð ( motto)  ?? !!

 Eða sem Rómverjar sögðu forðum.: ""Stare super vias antiquas" - þ.e. Halda áfram gömlu þvælunni " !! 

[Bjarni Harðarson, 8.2.2013 kl. 20:22]

Sæll minn kæri Kalli Sveins. Alltaf þykir mér nú gaman að sjá þig hér þó ég efist um að þetta sé þitt rétta nafn. En þú manst það sem aldrei hefur gerst og aldrei gæti hafa gerst og á slíkt minni er valt að treysta. Ég hef aldrei tekið trú á kapítalismann þó ég hafi fyrir nokkrum árum verið nær miðjunni en ég er nú. Það er rökrétt niðurstaða af hruninu að hafa þokast til vinstri - þeir sem geta haldið sig við hægri kreddurnar þrátt fyrir að þær hafi reynst ömurlega eru einfaldlega forstokkaðir í sinni bábylju.