Heiðinginn ég og hið kristilega siðgæði

- Er Framsóknarflokkurinn orðinn kristilegi flokkurinn í landinu, sagði flokksbróðir minn við mig í dag nokkuð svo undrandi og hafði eins og ég hlustað á þá þingmenn flokksins Höskuld Þórhallsson og formanninn tala um þá ógnun sem steðjar að kristilegu uppeldi með nýjum reglum menntamálaráðherra. Og hvað finnst þér, bætti þessi kunningi minn við, vitandi að ég er heiðingi, utankirkjumaður og eiginlega eins mikill efasemdarmaður um guðdóminn og vera má.

En ég styð ekki þann umburðarlyndisfasisma sem hæstvirtur menntamálaráðherra stendur nú fyrir með því að afnema kristilegt siðferði úr námskrá skólanna. Þetta snýst engan vegin um það hvaða siðferði er öðru betra. Hvort heiðingjar, múslimar eða hindúar hafi hér eitthvað betra fram að færa. Málið snýst um það hvort við erum rótföst menningarþjóð eða eitthvað rótlaus og týnd í alheimsþokunni.

Hvað sem líður afstöðu einstaklinga, minni og annarra til guðdómsins þá erum við Íslendingar kristin þjóð. Vitaskuld grundvallast mínar hugmyndir um siðferði, manngildi og lífið því á sjónarmiðum feðra minna og mæðra langt aftur. Eru þessvegna bæði kristin og vestræn, (- jafnt þó mig gruni að faðir minn sé næsta eins trúlaus og ég.) Við eigum vitaskuld ekki að loka neinum gluggum gagnvart öðrum gildum en heldur ekki að tapa rótfestu okkar.

Prestar eru nú reknir útaf leikskólum, börnum bannað að fara í fermingarfræðslu í Skálholt á skólatíma (og það er skólatími alla virka daga hjá fermingarbörnum.) Slík ofstjórn er gerð í nafni misskilins umburðarlyndis og þó að það sé stórt orð að kalla slíkt fasisma þá er það því miður réttmætt. Kúgunin og heimskan sækir að okkur úr ýmsum áttum og birtist með ýmsu móti. Og vitaskuld er það ekki annað en kúgun þegar hinn stóri meirihluti kristinna manna má ekki viðhalda því hófsama trúboði sem hin ágæta þjóðkirkja hefur iðkað með þjóðinni og í sátt við þjóðina í aldir. Bæði í leikskólum og barnaskólum.

Það er hollt að velta fyrir sér hvað græðist á þessu mistæka umburðarlyndi. Fyrst og síðast það að öfgamenn innan kirkjunnar fá byr undir báða vængi og hvers kyns öfgatrúboð á greiðari leið að þeim stóra hópi sem er misboðið. Sama á raunar við um þær barnalegu hugmyndir að við eigum í anda trúfrelsis að aðskilja ríki og kirkju. Slíkt mun einasta skemmta skrattanum og þeim öfgamönnum sem vilja boða lýðnum elda og brennistein annars heims.  

Athugasemdir

[Jón Valur Jensson, 13.12.2007 kl. 01:23]

Ég ætlaði að fara að þakka þér að taka á þessu máli, að mörgu leyti í skörpum anda, en þú endar þetta svo skringilega -- ætlar að fá ýmsa með þér með því að stökkva á 'umburðarlyndis'-(ekki fasisma, heldur)ofsa-vagninn í lokaorðunum og sýnir um leið meintum "öfgamönnum" í kristni lítinn skilning og jafnlítið umburðarlyndi.

Annars er nóg af eldi og brennisteini í Opinberunarbókinni -- 9.17-18, 14.10, 19.20, 20.10, 21.8 -- en þú tekur víst ekkert mark á henni, eða hvað? Varstu ekki orðaður við Ásatrúarfélagið, blessaður? (Tek það þó fram, að ég kann mætavel við hann Sigurjón Hegranesgoða o.fl. þar.)

[Anna Benkovic Mikaelsdóttir, 13.12.2007 kl. 01:44]

...og botninn varð eftir í Borgarfirði? Heiðingji hvað?

[Kristín Dýrfjörð, 13.12.2007 kl. 01:59]

Árið 1974 komst hugtakið kristilegt siðgæði fyrst inn í lög um grunnskóla, sama hugtak fór inn í lög um leikskóla 1991. Ég held að fólk hafi ekki verið að reka skóla fyrir þennan tíma sem boðuðu slæmt siðgæði. Eða siðgæði sem byggði á öðru en hefðum og gildum íslensku þjóðarinnar. Það eru engin rök í málinu að þetta sé nauðsyn til að efla umburðarlyndi og til að viðhalda íslenskum gildum, sagan sýnir annað. Mér finnst þín rök um misskilda umburðarlyndið heldur ekki halda í þessu máli. Það hefur komið fram aftur og aftur að ekki stendur til að fjarlægja eða úthýsa kristinfræði úr skólum. Málið snýst um að mannréttindi allra séu virt. Ekki bara þau sem okkur henta hverju sinni sem þjóð.

Ég þekki margt fólk sem er sammála þér um að ekki beri að aðskilja kirkju og ríki einmitt vegna þess að það muni kynda upp í helvítisprédikurunum. Þess vegna sé betra að hafa sauðmeinlausa þjóðkirkju. Því miður tel ég að þau rök haldi ekki heldur. Af lestri á bloggum ýmissa þjóðkirkjumanna virðist mér sem svo að þeir trúi á helvíti og helvítisvist.  Ég tel ræðu biskups um andlegan hafís vera af sama meiði. Því miður.   

Ég hóf störf í leikskóla fyrir um 30 árum, ég var leikskólastjóri í tæpan áratug. Ég man þegar ásókn presta til að koma og stunda trúboð í leikskólum hófst. Þetta er ekki hefð jafngömul leikskólanum. Hún er innan við tuttugu ára. Og vel að merkja ég upplifði það sem frekju og ofstjórn af hálfu kirkjunnar.

Ég söng glöð með börnum, Bjart er yfir Betlehem, ég gekk í kring um jólatré og ég sagði börnum sögur af Jesúbarninu. Ég sagði líka sögur af jólasveinum, álfum, tröllum og huldufólki. Allt gerði ég þetta til að styðja og viðhalda hinum íslenska menningararfi. Og ef ég á eftir að starfa í leikskóla mun ég halda því áfram.

Með jólakveðju og von um að Alþingi beri gæfu til að afmá setninguna um kristilega siðgæðið úr lögum.

[halkatla, 13.12.2007 kl. 02:44]

frábær pistill

[Sigurður Sveinsson, 13.12.2007 kl. 06:18]

Mér þætti nú vænt um, Bjarni minn, að fá rökstuðning fyrir því að þeir sem vilja aðskilja ríkið og krikjuna séu öfgamenn sem boði lýðnum elda og brennistein annars heims Fórstu nokkuð öfugt frámúr í morgun?

[Hreiðar Eiríksson (IP-tala skráð) 13.12.2007 kl. 08:30]

Mér finnst þetta mál allt bera vott um aukna bókstafshyggju og trúarofstopa og að þær tilhneigingar hafi smitast yfir í kristin, vestræn samfélög, sennilega frá Íslam.

Þegar ég var barn var öllum nokk sama um kirkju og presta.  Enginn lagði upp úr því.  Sumir fóru í kirkju, aðrir ekki, og allir undu glaðir við sitt.  Presturinn kom í skólann, sem kennari, og kenndi kristinfræði sem var trúarbragðafræði þess tíma.  Þegar hann tók fermingabörn til spurninga, gerði hann það utan skólatíma, sem sóknarprestur, en kristinfræðina kenndi hann sem kennari.

Nú skiptir það öllu máli við hvaða trúarkenningu siðferði okkar er kennt.  Mér gæti ekki verið meira sama, svona persónulega, svo fremi sem við erum sæmilega siðuð þjóð.  Reyndar verð ég að segja það hreinskilnislega að ef "kristið siðferði" ræður för í sumum ákvörðunum, viðskiptum og afstöðu ráðamanna og embættismanna  -  þá þurfum við virkilega á því að halda að leggja það siðferði af (t.d. sala eigna á varnarsvæðinu, REI - málið, þvagleggsmálið o.fl.)

[Bjarni Kjartansson, 13.12.2007 kl. 10:27]

Það eru ekki sérlegir vinir íslendkrar menningar, sem vilja Kirstið siðgæði burtreka úr öllum opinberum menntastofnunum.  Það eru óvinir heildarskipulagsins og því að hluta hættulegt fólk.

Eins eru þeir hættulegir, sem boðakreddutrú og halda fast við kennisetningar úr Gamla Testamenntinu.  Hann gaf okkur nýtt boðorð og það einfallt.  Kærleiksboðorðið.

Allt hitt (boðorðin tíu eru að mestu áhyggjur af eigum náungans og ásælni annarra í þau, líkt og vel kemur fram ef lesin er Lögmálsbók Gyðinga, sem Sálmaskáldið ljúfa nefndi Júða.

Næst verður auðvitað heimtað að messur við upphaf Þings verði aflagðar, svo koma kröfur um bann við svínakjöti í opinberum veislum.

Nei ef þetta lið er eitthvað ósátt við að menn hér vilji halda fast við Guðsótta og góða siði, er þeim frjálst að fara, ekki munu margir sakna þeirra. 

Þjóðskipan er brothætt og því er það fullt verk hvers heiðarlegs manns, að standa vörð um þá skipan. 

Við erum öfundsverð þjóð, að hafa haldið fast við gildi forfeðra okkar um Drengskap og ekkert látið okkur í því glidismati, sem fylgdi okkar landnámsmönnum og við lesum um í sögum okkar.  Síðan þegar Siðbótin varð, fóru mörg þessara gilda í endurnýjun lífdaga og enn aftur með Aldamótakynslóðinni sem fótraði svo mörg okkar sem nú erum á dögum.

Vonandi verður hin nýja ALdamótakynslóð ekki til þess, að gefa afslætti af grunngildum okkar og Kristnum gildum.

Miðbæjaríhaldið

[Svanur Gísli Þorkelsson, 13.12.2007 kl. 10:42]

Sæll Bjarni.

Um eitt geta allir verið sammála, þú talar eins og sannur framsóknarmaður, slærð úr og í.

Sjálfur segistu fá siðgæði þitt úr foreldrahúsum þar sem slík uppfræðsla er eðlileg og sjálfsögð og ræðst að mestu af afstöðu uppalendanna. Samt réðir þú því á endanum sjálfur hverju þú trúir. Treystirðu ekki börnunum þínum til hins sama?

Þú ert á móti því að trúarbrögð njóti jafnræðis þegar kemur að menntun barnanna á þeirri forsendu að það komist of mikið rót á huga þeirra. Það finnst mér frekar íhaldssamt af þér.

Menningu okkar og siðferði stafar ekki hætta af nýrri þekkingu eða aukinni þekkingu eða öðru vísi þekkingu, heldur aðeins fáfræðinni.  Aðeins þeir sem ekkert vita um umheiminn og geta því ekki dæmt um neitt fyrir sjálfa sig, eiga það á hættu að týnast í "alheimsþokunni".

Þegar við tölum um kristin gildi ættum við ekki að gleyma því að það voru t.d. Múslimir sem kenndu vestrænum þjóðum að þvo sér og nota sápu. Allir halda að það sé ákaflega kristilegt, hreinleiki er næstur heilagleikanum segjum við í dag. Við gleymum því líka að þeir sem mótuðu menningu okkar og þekkingarsamfélag voru ekki bara kristnir klerkar. Þegar að Karlamagnús stofnaði Svartaskóla í París, fyrsta háskóla í Evrópu á eftir Íslamska háskólanum í Kordóvu á  Spáni,  voru kennararnir þar flestir gyðingar og múslimir.

Siðmenning okkar er slíkur hrærigrautur kenninga úr ýmsum áttum að það er ekki hægt lengur að tala um sér kristna menningu eða sér kristin gildi.

Ég segi; leyfum þekkingunni að flæða.

[Hildigunnur Rúnarsdóttir, 13.12.2007 kl. 11:08]

Æi, mér finnst bara svo gróft hjá biskup og fleiri að vilja eigna sér siðferði, við sem erum ekki trúuð eða trúum á annað en hinn kristna guð hljótum samkvæmt þeirra skilgreiningu að vera siðlaus.

(og já, ég veit að það er talað um sið sem trú, sbr. heiðinn sið en það er ekki merkingin sem fólk almennt leggur í orðið siðlaus)

Eins og bent hefur verið á er alls ekki löng hefð hér fyrir trúboði í skólum þannig að hefðarrökin standast ekki. Ég er einnig nokkuð viss um að Siðmennt hefur ekki sett sig upp á móti fermingarferðunum, það er þetta með að ganga til prests inni í stundatöflum (og inni í skólum) sem þau hafa mótmælt. Það er eins hægt að fá frí fyrir börnin til að fara í fermingarferð og ferð með íþróttafélagi, kór, já eða bara eitthvað með foreldrunum.

[Hildigunnur Rúnarsdóttir, 13.12.2007 kl. 11:09]

biskupi og fleirum átti þetta nú að vera, þarna í fyrstu setningunni...

[Anna Benkovic Mikaelsdóttir, 13.12.2007 kl. 12:01]

Sigmar bað Guðna ítrekað að skilgreina hvað kristið siðgæði væri að þá sagði Guðni "það er að standa vörð um kirkjuna"

[Hallur Magnússon, 13.12.2007 kl. 12:51]

Ég veit ekki hvort það sé rétta af þér að tala um kúgun.  Er ósammála málflutningi Guðna vinar okkar - sem reyndar klikkar ekki í kröftugu, myndrænu, kjarnyrtu íslensku máli!  Mér finnst hann skjóta yfir markið - en gerir það skemmtilega og með stæl. 

Meira um þetta í pistli mínum Guðni skýtur yfir markið með stæl! á slóðinni http://hallurmagg.blog.is/blog/hallurmagg/entry/389891/

[DoctorE (IP-tala skráð) 13.12.2007 kl. 13:51]

Skilgreindu kristilegt siðgæði fyrir mig og svo skulum við tala saman, useless að tala um eitthvað sem þú getur ekki skilgreint.

Að taka trúboð og annað því tengt úr skólum er ekki misskilið umburðarlyndi, það eru mannréttindi, no more no less

Ég er íslendingur og er ekki kristinn, þegar þú segir við íslendingar erum kristin þjóð þá ertu að hrækja framan í mig og alla þá sem ég þekki sem eru ekki kristnir, það má vera að við höfum verið skráð sjálfkrafa í þjóðkirkju en það segir ekkert um hvort við erum kristin eða ekki

[Barði (IP-tala skráð) 13.12.2007 kl. 15:27]

Jæja, þá er sirkusinn mættur.

Já Jón Valur þjóðkirkjan þjónar því hlutverki ágætlega að halda rugludöllunum í sértrúarsöfnuðunum í hefjum.

Kristið siðgæði verður seint skilgreint í nokkrum orðum, það er þó að minnsta kosti afstætt bæði í tíma og rúmi en ef þið hugsið ykkur um í nokkrar sekúndur, þá er ca. verið að tala um meðalmannssiðgæðisþumalputtareglur á Íslandi í dag.

[Georg P Sveinbjörnsson, 13.12.2007 kl. 16:10]

Því miður er allt það fordómafyllsta og dómharðasta fólk sem ég þekki strangkristnir.

Það má heldur ekki gleyma því að kristni var þröngvað upp á okkur þó að Ljósvetningagoði hefði haft vit á að forða fjöldaslátrun á fólki sem boðberar hins "kristilega siðferðis" hefðu ábyggilega ekki hikað við að leggja á landsmenn til að "bjarga" þeim frá heiðni" þó að engin þörf hafi verið á því því siðferði var almennt ágætt hjá almenningi og síst verra en í þeim löndum sem kirkjan drottnaði yfir á þeim tíma. Þetta var að sjálfsögðu bara valdabrölt eins og allir eiga að vita sem og siðaskiptin. 1000 ár saga kristninnar á Fróni er saga kúgunar og arðráns og það er raunar ekki fyrr en seint og síðarmeir sem Kirkjan fer að sýna einhvern vott af því góða siðferði sem hún predikar...og enn vantar samt töluvert uppá, t.d í málum samkynhneigðra.

Af hverju í ósköpunum þessu rándýra bákni nægir ekki að prédika sínar skoðanir og gildi í kirkjum og safnaðarheimilum landsins ef mér óskiljanlegt...tilvistarkreppa á upplýstum tímum?

[Jón Steinar Ragnarsson, 13.12.2007 kl. 17:11]

Nenni varla að eyða orðum á Guðna blessaðann. Trúleysingjar velta við kennsluborðum kristninnar í helgum menntastofnunum.  Fær einhver botn í þennan líkingagraut?

Menn ættu bara að skoða hvernig þessi aðskilnaður hefur lukkast annarstaðar eins og í Frakklandi.  Þar hefur þetta verið til afgerandi bóta í því fjölmenningarsamfélagi. Ameríkanar aðskilja ríki og kirkju strax í fyrstu grein sinnar stjórnarskrár. 

Þegar krafa um skilyrðislaust jafnræði nær yfir trúboð í skólum og allir söfnuðir og trúflokkar heimta þar inngöngu, þá er best að hafa línurnar hreinar og hafa skóla, skóla og Kirkjur, Kirkjur.

Hér er verið að berjast um sálir smábarna, sem ekki geta borið hönd fyrir sig. Engum dettur í hug að stunda trúboð í framhaldskólum, þar sem fólk er komið með snefil af gagnrýnni hugsun, aðeins hjá þeim minnstu.  Ég held að þessi litlu saklausu skinn geti kennt prelátum meira um kærleik og fegurð en þeir þeim.

Það þarf ekkert að innprenta litlum börnum siðgæði umfram það, sem þau fá með móðurmjólkinni og frá frændgarði sínum. Það siðgæði sem um er rætt er stundað í samfélögum apa og án innrætingar. Mannkyn hefði ekki komist af án slíkra eðlislægra reglna. 

Kirkjan herðir svo tökin á börnum um gelgjuna og flækir enn meira flóknar sálir á viðkvæmu yfirgangsskeiði með helvítis og syndarboði og kennir þeim að óttast hvatir sínar og hugsanir og bælir anda þeirra.  Burt með þennan viðbjóð.  Út í hafsauga með trúboðið. Menn geta haft sína trú með sjálfum sér eins og Kristur raunar mælir um.

[Jóhann F Kristjánsson (IP-tala skráð) 13.12.2007 kl. 17:35]

Sæll Bjarni.

Þetta er svo sem allt gott og blessað hjá þér.

það eru bara tvö vandamál sem hafa gefið tilefni til að menn stöldruðu við í þessum efnum.

1. Hvers eiga skólabörn sem ekki fara í fermingarfræðslu eða skemmtiferðir á vegum kirkjunnar  að gjalda. Þau sitja eftir sem annars flokks. 

2. Fræðsla er góð en trúboð sem jafnvel er hlaðið fordómum þeirra sem harðast ganga fram í bókstafnum er ekkert annað en subbulegur heilaþvottur á ungum sálum.

Hvað varðar lið 1 má að auki segja að í sjálfu sér sé öllum frjálst að sækja þá trúarlegu visku sem þeim sýnist. En hvað gerist ef rabbínar, kennimenn Múhameðs, kaþólskir, goðar og hvað þetta nefnist allt vilja allir fara að kenna í skólum við hlið presta? Mér sýnist nú að grunnskólastarfið sé þegar ofhlaðið fræðslu sem lítið nýtist amk til æðri menntunar samber útkomu nemenda í nýlegum samanburðarrannsóknum.

Um lið 2 má benda á að hér áður fyrr voru vandaðir menn og konur sem lögðu ungu fólki til góð ráð um lífið og tilveruna. Í dag er hins vegar margur misjafn sauður í þessum hópi og þeim fjölgar sem ég að minnsta kosti mundi ekki vilja sjá í kringum mín börn.

Menning okkar og siðir eru svo sannarlega ekki greyptir í stein.  En þó efast ég um að nokkur, jafnvel hörðustu trúleysingjar krefjist þess að jólahefðum eða núverandi kristnum gildum eða siðfræði verði úthýst úr skólastarfi. Þeir sem hrópa nú úlfur úlfur og halda því fram að gagnrýni á trúboð í leik og grunnskólum sé árás á slíkar hefðir eða gildi þeir eru því miður bara sönnun þess að betra er að vera á varðbergi gagnavart öfgahyggju.

Trúboð burt úr skólum er ekki undirgefni við ofur-umburðarlyndi hvað sem hver segir, heldur hreint og klárt svar nútímans við raunverulegum aðstæðum sem steðja að börnum okkar. Foreldrar verða svo að meta hver fyrir sig og bera á því fulla ábyrgð hvaða skógarstíga börnin eru svo send þess utan.

[Rósa Aðalsteinsdóttir (IP-tala skráð) 13.12.2007 kl. 18:41]

Sæll og blessaður

Þú skrifar: Er Framsóknarflokkurinn orðinn kristilegi flokkurinn í landinu, sagði flokksbróðir minn við mig í dag nokkuð svo undrandi og hafði eins og ég hlustað á þá þingmenn flokksins Höskuld Þórhallsson og formanninn tala um þá ógnun sem steðjar að kristilegu uppeldi með nýjum reglum menntamálaráðherra.

Húrra fyrir Framsóknarflokknum: "Batnandi flokki er best að lifa og vaxa að nýju." Ég var búin að spá flokknum dauða en með Jesú með í baráttunni er enginn dauði.

Smá jólagjöf  til Bjarna frá Rósu: Leitið fyrst  ríkis hans Drottins  og  réttlætis, þá mun allt þetta veitast yður að auki.

Guð gefi þér og þínu fólki gleðileg jól.

Kær kveðja. Rósa Aðalsteinsdóttir Vopnafirði

[Haraldur Haraldsson, 13.12.2007 kl. 20:08]

Ja Bjarni svo bregðast krosstré sem önnur tré/Halli gamli

[Ása (IP-tala skráð) 13.12.2007 kl. 22:43]

Ég á nú eftir að sjá að Framsókn sé að breyta um stíl - miðað við síðustu framkvæmdir Björns Inga lítur ekki út fyrir mikla stefnubreytingu. Ég skrifaði einmitt grein í moggann sem birtist daginn fyrir kosningar í vor - hef hana líka inná blogginu mínu - um Framsókn og plottið í þeim síðustu árin:
http://asagreta.blog.is/blog/asagreta/entry/325900/

Annars er ég hlynnt því að hin góðu gildi kristinnar trúar séu kynnt börnum en er á móti hræðsluáróðri í nafni trúar - slíkt er ekkert sem Jesús gerði við börn og þá eigum við ekki að gera það heldur.
En það sem Jesús kenndi okkur er að vera kærleiksrík og elskandi og slíkt er aldrei of mikið boðað.

[Ragnar Geir Brynjólfsson, 13.12.2007 kl. 23:18]

Trúarbrögðin eru aðferð til að hjálpa fólki að finna sér stað í tilverunni og tilgang með lífinu. Margir finna í þeim stoð og styrk og tilgang. Aðrir þarfnast þeirra ekki eða telja sig ekki þarfnast þeirra á einhverju tímabili ævinnar, jafnvel ævina alla og þannig verður það trúlega á meðan þessi heimur byggist.

Það er algengt viðhorf ágengrar trúleysishyggju þessa dagana að setja öll trúarbrögð undir sömu mælistikuna - að álíta þau svo gott sem jafngild en þegar betur er að gáð þá er það ekki heppileg leið til skilnings á trú og trúariðkun eða áhrif hennar á fólk og samfélög. Við þekkjum vel ein mestu mistök kommúnismans sem við getum kannski kallað mannfræðileg, þ.e. þau að reyna að horfa fram hjá trúarþörf fólks eða skipta henni út fyrir leiðtogadýrkun.

Í íslensku þjóðsögunum sjáum við t.d. vel hvernig mennskan er skilgreind og þá með því að skilgreina andhverfu hennar en það er í tröllasögunum. Tröllin eru einhver ómennskustu fyrirbæri sem hægt er að finna í íslenskum þjóðsögum. Þau hafa ekki yfir sér þessa ljóðrænu dulúð huldufólksins eða sára höfnunartilfinningu drauganna. Tröllin eru vinnhörð með afbrigðum, stela búsmala og ræna fólki sem smám saman gleymir uppruna sínum og mennsku. Sjá t.d. þessa færslu hérna. Og tröllin höfðu einn eiginleika. Þau þoldu ekki kirkjuklukkur eða trú. Við þekkjum öll sögurnar af Guðmundi góða þegar hann vígði laugar og staði og hreinsaði landið af tröllaóvættum.

Hvort sem okkur líkar betur eða verr að þá skilgreinir menningararfleifð okkar mennskuna hvergi betur en með því að sýna okkur andstæðu hennar í tröllunum. Við sjáum líka hvað getur komið fyrir bergnumið fólk í frásögn Tungnamannsins Ármanns Kr. Einarssonar sem á 70 ára höfundarafmæli á þessu ári. Sjá þessa færslu hér.

Bestu kveðjur,

[Ómar Ragnarsson, 13.12.2007 kl. 23:23]

Þegar ég var unglingur í Gaggó Lind fór ég í fermingarfræðslu hjá séra Emil Björnssyni í óháða fríkirkjusöfnuðinu og líklegast fóru flestir hinir krakkarnir í fermingarfræðslu í Hallgrímskirkju eða Laugarneskirkju.

Þetta var ekkert vandamál þá og rakst ekkert á skólastarfið eða samband okkar krakkanna. Við vorum öll sjálfstæð og jöfn og hver gerði upp við sig hvað hann gerði án þess að við ræddum það nokkuð innbyrðis.

Kannski voru einhverjir í bekknum sem fermdust ekki. Það var aldrei um það rætt og ég efast um að nokkurt okkar, sem erum á lífi í dag, vitum það nú frekar en þá.

Á þessum árum skilst mér að ekkert hafi verið minnst á kristilegt siðgæði í lögum um skólana og ekki finnst mér þegar ég lít til baka að skólastarfið hafi verið neitt minna kristilegt þá en eftir 1974 þegar þessi orð voru sett inn.

Ef þetta gekk svona vel upp 1954, af hverju getur það ekki gengið jafn vandræðalaust upp nú?

[Rósa Aðalsteinsdóttir (IP-tala skráð) 13.12.2007 kl. 23:39]

Sælt veri fólkið. Gunnar Þór, nei Guðni er töffari en bara í vitlausum flokki nema að þeir séu að kristnast þá lagast þeir ábyggilega  Kær kveðja/Rósa á Vopnó.

[Hildigunnur Rúnarsdóttir, 14.12.2007 kl. 00:20]

Leyfi mér að benda á þessa snilldarskýringu á pistlinum hér fyrir ofan... :D

[Gunnlaugur B Ólafsson, 14.12.2007 kl. 01:40]

Þetta er mikilvægt mál en jafnframt æskilegt að hafa frekar rólegar og lágstemmdar meiningar um það. Hef trú á að það finni sér farveg. Finnst þessi útblásni trúarfuni hjá Guðna í Kastljósinu í besta falli skondið sjónarspil.

Forfeður mínir í sjö ættliði voru klerkar á Austurlandi, en ég tel að staða presta og kirkju hafi í grunneðli breyst frá því sem var þegar kirkjustaðir voru menntastofnanir og presturinn oft eini maðurinn í byggðarlaginu, nema ef vera skyldi að sýslumaður væri þar líka. Ég held að kennurum í skólum í dag sé fyllilega treystandi til að sjá um kennslu í siðferði og góðum siðum.

Ég tel að það hafi orðið það miklar breytingar í samfélaginu að það eigi að ganga út frá því sem meginreglu að hver einstaklingur velji sér trúfélag, vilji hann tilheyra þeim yfir höfuð. Það á að bera traust til hins vel menntaða fólks sem byggir þetta land að það hafi forsendur til slíkrar ákvörðunar. 

Einhverjir hafa sjálfsagt talið sig vita hvað væri okkur fyrir bestu í gegnum aldirnar svo við lentum nú á réttum stöðum að lokinni jarðvistinni, en nú er eðlilegt að fólk velji sér þann vegvísir á leið til lífsfyllingar sem að hann telur vera ríkulegastan.

Þetta leiðir að öllum líkindum til þess innan ekki svo langs tíma að nauðsynlegt verður að skilja að ríki og kirkju. Veit ekki hvort Þjóðkirkjan þarf að óttast það. Óttinn hlítur þá að tengjast því að vera ekki viss um að vinna hug og hjörtu fólks þegar það verður meginviðmið að einstaklingurinn eigi val í þessum efnum.

[Gísli Kristjánsson, 14.12.2007 kl. 03:04]

 Takk fyrir góðan pistil Bjarni

[Jóhann F Kristjánsson (IP-tala skráð) 14.12.2007 kl. 10:35]

Til Ragnars.

Ef börn múslima/gyðinga/hindúa mega eða geta ekki etið feitt ket þá má nú fastlega búast við að þeim sé boðinn annar valkostur í skólanum, rétt eins og sykursjúkum er boðið ósykrað, grænmetisætur fá kál og vandlega er valið ofan í börn með ofnæmi. Ekki veit ég til þess að starfsfólk í skólum eða leikskólum nefni slíkt kjaftæði.

Þegar kemur að trúboði þá er hins vegar ekki boðið upp á neinn valkost. Krakkar sem ekki eru með, þau sitja eftir, jafnvel úti í horni þar sem kennarar reyna að fá þeim einhver verkefni meðan trúfræðsla stendur yfir.  Auðvitað mætti segja að það sé ræfildómur annarra trúfélaga að fara ekki inn í skólana og sækja þá sem eftir sitja, en er það það sem við viljum ? Ekki ég að minnstakosti. Samkeppni um ungar sálir er ósiðleg og ógeðfelld að mínu mati.

Nei enga trúboða í skóla takk,  þeir geta unnið sitt starf í kirkjum, moskum, hofum eða hvað þetta nefnist allt eftir að skólatíma líkur. Í nútíma þjóðfélagi þá treystum við ekki hverjum sem er fyrir börnunum okkar nema að vel athuguðu máli.

[Ása (IP-tala skráð) 14.12.2007 kl. 10:49]

Jóhann F Kristjánsson  spyr::

1. Hvers eiga skólabörn sem ekki fara í fermingarfræðslu eða skemmtiferðir á vegum kirkjunnar að gjalda. Þau sitja eftir sem annars flokks.

Svar: Hvers eiga börn að gjalda sem ekki taka þátt í íþróttum, jafnvel vegna heilsufars og horfa uppá vini fá frí vegna keppnisferðalaga? Eða barna sem fá frí frá skóla til að taka þátt í leiksýningum? Eru þau þá annars flokks? Hvaða minnimáttarkennd er að hrjá fólk. Við erum menn með ólíkar þarfir og ólík sjónarmið og slíkt verður bara að lifa virða.

Eigum við þá ekki að banna svínakjöt í leikskólum ef það eru muslimar í þeim? Aumingja muslimabörnin sitja hjá í matartímum af því að þau mega ekki borða svín........

Svar: Hvernig er það, sum börn eru með mjólkuróþol og mega ekki borða skyr eða grjónagraut omfl. Á þá að banna hinum börnunum að borða skyr og drekka mjólk með brauðinu í leikskólanum? Ég er svo aldeilis hissa - er fólk bara að finna sér eitthvað til að vera með vesen?? Hefur það svo lítið fyrir stafni að það verður að búa til vandamál og eitthvað sé að gerast í lífi þeirra?

[DoctorE (IP-tala skráð) 14.12.2007 kl. 13:11]

Sorry Ása en þú ert fallin í gryfju mannréttindabrota vegna trúar þinnar, sem er sorglegt.

[Anna Benkovic Mikaelsdóttir, 14.12.2007 kl. 13:17]

...mér finnst alltaf svo gaman þegar "kristnir" líkja trú sinni við svínakjötsát!

[Rósa Aðalsteinsdóttir (IP-tala skráð) 14.12.2007 kl. 14:59]

Sælt veri fólkið. Ása Gréta ræddi um svínakjöt. Kíkjum á hvað Biblían hefur að segja. Kær kveðja/Rósa.

Markús 7: 14. – 23. Hið ytra og innra. Rætt um mat: Jesús lýsir alla fæðu hreina þar á meðal svínakjöt.

 

Aftur kallaði hann til sín mannfjöldann og sagði: ,,Heyrið mig allir, og skiljið. 

Ekkert er það utan mannsins, er saurgi hann, þótt inn í hann fari. Hitt saurgar manninn, sem út frá honum fer.

Ef einhver hefur eyru að heyra, hann heyri!

Þegar hann var kominn inn frá fólkinu, spurðu lærisveinar hans hann um líkinguna.

Og hann segir við þá: ,,Eruð þér einnig svo skilningslausir? Skiljið þér eigi, að ekkert, sem fer inn í manninn utan frá, getur saurgað hann?

Því að ekki fer það inn í hjarta hans, heldur maga og út síðan í safnþróna.`` Þannig lýsti hann alla fæðu hreina.

Og hann sagði: ,,Það sem fer út frá manninum, það saurgar manninn.

Því að innan frá, úr hjarta mannsins, koma hinar illu hugsanir, saurlifnaður, þjófnaður, manndráp,

hórdómur, ágirnd, illmennska, sviksemi, taumleysi, öfund, lastmælgi, hroki, heimska.

 Postulasagan 15: 19-20.

Ég lít því svo á, að eigi skuli íþyngja heiðingjum þeim, er snúa sér til Guðs,

heldur rita þeim, að þeir haldi sér frá öllu, sem flekkað er af skurðgoðum, frá saurlifnaði, frá kjöti af köfnuðum dýrum og frá blóði.

 

Það er ályktun heilags anda og vor að leggja ekki frekari byrðar á yður en þetta, sem nauðsynlegt er,

 Postulasagan 15:29.að þér haldið yður frá kjöti fórnuðu skurðgoðum, blóði, kjöti af köfnuðum dýrum og saurlifnaði.  Postulasagan 21:25 En um heiðingja, sem trú hafa tekið, höfum vér gefið út bréf og ályktað, að þeir skuli varast kjöt fórnað skurðgoðum, blóð, kjöt af köfnuðum dýrum og saurlifnað.  

[Rósa Aðalsteinsdóttir (IP-tala skráð) 15.12.2007 kl. 00:55]

Sælt veri fólkið.

Gunnar ef ég myndi heilsa þér út á götu ætlarðu þá ekki að vera svolítið sætur við mig og heilsa mér og við getum talað um veðrið og pólitíkina. Vona að ég fái í jólagjöf að vera mannglögg. Kær kveðja/Rósa

[Jón Steinar Ragnarsson, 15.12.2007 kl. 17:55]

Guðni er mjög trúðaður maður.

[Rósa Aðalsteinsdóttir (IP-tala skráð) 15.12.2007 kl. 19:59]

Sælt veri fólkið.

Kannski að Framsóknarflokkurinn rísi upp frá dauðum ef þeir eru að kristnast  Kær kveðja/Rósa

[Margrét (IP-tala skráð) 15.12.2007 kl. 21:22]

Ég veit ekki betur en svínaketið renni ofaní alla jafnt,er þetta ekki svo nefnt blandað hakk sem mötuneytin nota.!

[Guðmundur Jónas Kristjánsson, 16.12.2007 kl. 01:24]

Bara svona í lokin minni á meiriháttar góða grein formanns

Framsóknarflokksins í laugardagsblaði MBL um AÐ STANDA

VÖRÐ UM KIRKJU OG SKÓLASTARF og blogg mitt um hana.

[Bjarni Harðarson, 16.12.2007 kl. 11:11]

kærar þakkir fyrir líflega og skemmtilega umræðu. ég vona að lesendur og bloggarar misvirði ekki við mig að ég kommentera lítið á komment - hef eiginlega haft það fyrir reglu sem ég bregð ekki útaf nema til mín sé beint beinum efnislegum spurningum um staðreyndir. ég fæ seint fullþakkað þennan hvika miðil bloggið og kommentin við mínum skoðunum en þar þykir mér oft ekki síður vænt um þá sem eru algjörlega á öndverðum meiði við mig - enda vekja þeir oft mig og vonandi aðra líka til umhugsunar. meira um kristnidóminn síðar. gleðileg jól kæru bloggarar. -b.

[Rósa Aðalsteinsdóttir (IP-tala skráð) 16.12.2007 kl. 16:55]

Sæll Bjarni.

Getum við þá sagt að mér og fleirum takist að gera þig að Jesúíta með tíð og tíma ef við verðum dugleg að miða og skjóta

Margur hefur miðað á

markið samt oft geigað hjá

en þegar Rósa skaut á ská

skotið hitti og Bjarni lá

Guð blessi þig Bjarni, gefi þér gleðileg jól og farsælt um ókomin ár.

Shalom/Rósa Aðalsteinsdóttir Vopnafirði

[Guðmundur Jónas Kristjánsson, 17.12.2007 kl. 00:54]

ALLS EKKERT Shalom hér. En bara GLEÐILEG ÞJÓÐLEG ÍSLENZK JÓL

félagi Bjarni og gangi þér allt í haginn mót hækkandi SÓL!

[Rósa Aðalsteinsdóttir (IP-tala skráð) 17.12.2007 kl. 04:42]

Sæll Bjarni, þó að Guðmundur Jónas Kristjánsson geti ekki tekið við friðarkveðjum þá vona ég að þú sért meiri maður en hann og getir tekið við friðarkveðjum og góðum óskum frá mér.

Enn og aftur. Guð gefi þér gleðileg jól og ég óska þér farsældar um ókomin ár. Kær kveðja/Rósa Aðalsteinsdóttir

[Jón Valur Jensson, 22.12.2007 kl. 20:30]

Ása Gréta Einarsdóttir átti hér frábært innlegg 14.12. kl. 10:49, en glámskyggnir veittu því ekki þá eftirtekt, sem það verðskuldaði, og trúleysingjar tveir (í næstu tveimur innleggjum) reyndu að eyða þýðingu þess með endemis-ómálefnalegu þvaðri. – Þakka þér, Ása Gréta, þessi rök þín munu lifa, til þeirra verða vitnað og þau hjálpa í okkar baráttu fyrir réttu leiðinni í þessum skólamálum.