Bloggfærslur mánaðarins, janúar 2009

Valdaskessan sýnir sig!

Guðni Ágústsson kallaði Ingibjörgu Sólrúnu Gísladóttur valdaskessu fyrir hálfu öðru ári og fékk bágt fyrir kjaftháttinn. En algerlega er það réttnæmt í dag - og var það reyndar þá einnig þó stundum megi satt kjurt liggja.

Þegar landið logar stafnanna á milli af óáran, skuldabasli, mótmælum og úrræðaleysi er það eina sem stjórnarflokkarnir rífast um hvort Samfylkingin fái forsætisráðherrastól síðasta korterið fram að kosningum. Eins og það sé eitthvað sem skiptir máli!

Og hefndin skal líka fram koma þó seint sé með sparki í gamlan ref uppi í Seðlabanka!

Réttast væri þá að gera Björgvin G. að forsætisráðherra - af þingmönnum Samfylkingarinnar er hann áreiðanlega vinsælastur nú um stundir!


Kratar klókir í morgun og klaufskir í kvöld...

Ríkisstjórnarfarsinn heldur áfram. Ég er aftur á móti ekki of viss um að Ingibjörg Sólrún hafi spilað vel úr þeim kortum sem Björgvin G. gaf henni. Í morgun stóð flokkurinn keikur og spjótin beindust að Sjálfstæðisflokknum að hann yrði að gera eitthvað. Láta einhvern fara eða tapa atkvæðum ella.

Frá sjónarhóli þeirra sem hæst hrópa og reiðastir eru stjórnvöldum hefur Samfylkingin kannski gert rétt í að láta kné fylgja kviði og heimta afsögn Davíðs. Ég held aftur á móti ansi margir sjái í gegnum þennan leik og þá um leið að kratarnir ætla að gera allt til að komast út úr ríkisstjórninni og setja þessvegna kröfur á íhaldið sem það getur ekki svarað.

Þar með gerist það svo að íhaldið verður hinn ábyrgi sem reynir að halda einhverjum sjó og viðurkennir samt kosningar. Í morgun var svo augljóst að Geir var með svartapétur í höndunum en í kvöld er ég ekki eins viss. Veit ekki nema honum hafi tekist að lauma honum í pilsvasann hjá Imbu um leið og hún gekk út.

Verst er að á sama tíma og karpað er um algjör aukaatriði, eins og hvort Davíð situr mánuðinum lengur eða skemur þá brennur hér landið og heimilin engjast í skuldunum. Það var ekki að heyra að það skipti miklu máli í dag- það var enginn að tala um að færa niður skuldir almennings eða aftengja verðtrygginguna. Og ekki að auka fjármagn til samhjálpar eða lækka byrðar hinna lægstlaunuðu.

Nei, nei, - stjórnmálamennirnir eru að hugsa um hlutverkin!


Kjartan í áhættuhópi!

Nú er Kjartan Ólafsson í Hlöðutúni í áhættuhópi. Hann er eini þingmaðurinn úr Árnesþingi sem ekki hefur sagt af sér en við vorum fjórir í upphafi kjörtímabils. (Björgvin í Skarði er reyndar enn á þingi!)

En án gríns þá er útspil Samfylkingarinnar klókt og setur mikla þumalskrúfu á Davíð, Árna Matt og fjöldamarga aðra. En það er líka í þessu útspili mikil örvænting hjá krataflokki sem tapar og tapar í skoðanakönnunum og reynir nú að snúa þróuninni við...

En þetta er skuespil!


Einkennilegir dagar og ábyrgðarlausir stjórnmálamenn - og já mótmæli á morgun

Þetta eru einkennilegir dagar og afskaplega sláandi og alvarlegar fréttir sem bárust þjóðinni nú í hádeginu í dag. Á degi sem þessum finnum við öll hvað manneskjan er miklu verðmætari en dægurþrasið.

En - það er samt afar alvarlegt ef það tilfellið að ekki sé hægt að mynda þingmeirihluta fram að kosningum í vor - bara vegna þess að flestir eru að hugsa um að skaða ekki fylgi sitt með því að taka á stjórnarathöfnum.

Kannski er hugmyndin um þjóðstjórn það sem eðlilegast er eða þá að menn sammælist um að veita öðrum hvorum núverandi stjórnarflokka hlutleysi til stjórnunar fram að kosningum - sem á vitaskuld ekki að draga í neina í fjóra mánuði. Líklega er áframhald núverandi stjórnar versti kosturinn.

Og það er alveg sama hvaða stjórn verður þennan tíma - hún mun starfa sem máttlítil starfsstjórn frekar en raunveruleg ríkisstjórn. Þessvegna er mikilvægt að hafa kosningarnar sem fyrst, sem allra allra fyrst.

----

Allavega - ég reikna með að það verði törn framundan, hvernig sem fer og þessvegna ákváðum við að efna við sjálf okkur loforð, ég og dóttir mín Eva og förum saman í fjórhjólaferð á morgun. Það er ekki víst að það verði tími fyrir slíkt næstu vikurnar...

Ps.: Og meðan ég man það verður mótmælastaða framan við ráðhúsið á Selfossi á morgun klukkan eitt en í ljósi aðstæðna öll með mjög stillilegum blæ. Engir ræðumenn auglýstir en væntanlega kveikt á kertum og spjallað. Sjálfur verð ég í þetta sinn fjarri en vil samt hvetja fólk til að mæta.


Nýtt lýðveldi - burt með flokksveldið!

Heimasíðan Nýtt lýðveldi, http://nyttlydveldi.is/ opnaði í dag og safnar nú undirskriftum þeirra sem vilja tafarlaust senda þingið heim og koma á embættismannastjórn í nokkur misseri sem bæði tekur til og breytir landinu úr flokksveldi í lýðveldi. Sem yrði þá annað Íslenska lýðveldið, kannski þriðja því þjóðveldið var í raun og veru einhverskonar lýðveldi en hvað um það...

Hugmyndasmiðurinn hér bakvið er Njörður P. Njarðvík og ég hef áður lýst yfir hrifningu minni yfir hans hugmyndum. Verð þó að taka fram að ég hefi ekki skrifað undir. Ég set einfaldlega fyrirvara við það að koma hér á bráðabirgðastjórn sem ekki er skipuð mönnum sem bera ábyrgð gagnvart kjósendum. Ekki að þetta sé neitt útilokuð hugmynd en ég held að þetta sé ekki sú besta.

Við sjáum nú gríðarlega marga sem eru með svipaðar hugmyndir. Þar má nefna mjög merkilega hreyfingu undir forystu Egils í Brimborg sem hefur með fleirum stofnað heimasíðuna um lýðveldisbyltingu, http://lydveldisbyltingin.is, sjálfur hefi ég talað fyrir tillögum í sömu veru, m.a. hér á blogginu, það hefur Skúli Helgason hjá Samfylkingunni gert líka, VG menn og mín orðhvata vinkona og arftaki Helga Sigrún Harðardóttir er einnig í þessum sömu pælingum ásamt fjölda samflokksmanna. Þessar tillögur ganga ekki endilega í takt en heldur ekki hver gegn annarri og með smá málamiðlunum er hægt að samhæfa þær.

Allir þessir og held eiginlega allir í landinu nema þá Sjálfstæðismenn sjá nú hið augljósa að Alþingi hefur verið máttlaus stofnun vegna þess að flokkarnir og framkvæmdavaldið hafa ráðskast með þá stofnun. Það er ekki bara að ógöngur okkar inn í bankahrunið sé að nokkru leyti hægt að skrifa á máttleysi Alþingis. Aðgerðaleysi ríkisstjórnarinnar í dag er líka afleiðing af flokksræðinu.

Hvar sem einhverjir þrír Íslendingar eiga hagsmuna að gæta nýtur að minnsta kosti einhver einn þeirra verndar annaðhvort Sjálfstæðisflokks eða Samfylkingar. Ráðherrarnir og þingmenn þessara flokka eru ekki í vinnu hjá kjósendum sínum, þeir eru í vinnu hjá flokkunum sem er alls ekki það sama. Það fær enginn að vera þingmaður ef hann lendir í ónáð hjá sínum flokki. Flokkarnir hafa svo það hlutverk að halda utan um hagsmuni sinna manna, síns fólks eins og ættbálkur í Afríku eða Sturlungu.

Þessvegna þarf að brjóta niður ægivald flokkanna yfir lýðræðislega kjörnum fulltrúum, fyrr nær Alþingi ekki vopnum sínum gagnvart framkvæmdavaldinu.


Kosningar strax!

Ef Geir Haarde væri skynsamur stjórnmálamaður þá stæði hann upp í þinginu nú við upphaf fundar, ryfi þing og boðaði til kosninga.

Allt tal um að ekki sé hægt að kjósa vegna þess að ríkisstjórnin eigi svo annríkt við björgunarstörf er endileysa. Ríkisstjórnin hefur ekki komið með neinar úrlausnir og mun ekki gera það úr þessu. Þjóðin er betur sett með tímabundna starfsstjórn og einhverja von um starfhæfa ríkisstjórn í framhaldinu. Þetta veit Geir en hann veit líka að pólitískt líf hans hangir á bláþræði og kannski yrði þetta hans síðasta embættisverk. Og það er liðin tíð að fráfarandi forsætisráðherra bíði þægilegur stóll uppi í Seðlabanka.

Nú reynir á kjarkinn, Geir.

Sjálfur verð ég í minni vinnu á skrifstofu Heimssýnar í dag í Hafnarstræti 18 en þar ætlum við að opna með pomp og prakt (ég kaupi kremkex!) klukkan 17 í dag. Auðvitað lendum við í skugga stærri viðburða en höldum samt okkar striki.


Er Reynir Trausta í ríkisstjórninni

Sá framan á DV í dag þar sem því er nú slegið upp að stjórnin sé að falla.

Sama dag koma Samfylkingarmennirnir, varaformaðurinn þar á meðal og fella stjórnina. Eða svo gott sem!

Veröldin er ótrúlega rafmögnuð þessa dagana og með hverjum nýjum kúnna hingað í búðina er borið í mig eitthvað nýtt og svo kíkjum við saman hér ofan í tölvuskáinn.

Ég verð reyndar alltaf svoldið dapur þegar ég sé borgaraleg mótmæli leysast upp í einhverskonar ofbeldi. Ég er sjálfur hrifinn af að fólk mótmæli en þeir sem vilja beinlínis hvetja til borgaralegrar óhlýðni eru að leika sér að eldi sem við vitum ekkert hvar endar...


Dómsmálaráðherra skrifar um ESB mál

Björn Bjarnason er tvímælalaust einn afkastamesti penni þjóðarinnar um þjóðfélagsmál. Bæði í bloggi og blaðagreinum. Nú hefur Bókafélagið Ugla - sem ekki er nú nein vinstri sjoppa - gefið út úrval af greinum hans um ESB mál frá allra síðustu árum, tengsl Íslands við hnattvæðinguna og skyld efni. Bókinni sem heitir Hvað er Íslandi fyrir bestu fylgir góður inngangur ritaður laust fyrir jól. Þar leggur bókarhöfundur mat á stöðuna í samtímanum og dregur ekkert af sér í þeirri afstöðu að Íslandi beri að vera utan ESB. Hún sé óþörf þar sem hagsmunum Íslands sé borgið með Shengen samstarfi og EES.

Fyrir okkur sem erum skoðanabræður Björns í þessu tiltekna máli er bókin kærkomin, ekki hvað síst nú þegar Sjálfstæðisflokkurinn er mjög með mál þetta í deiglunni. Greinar Björns eru skrifaðar af mikilli þekkingu og rökfestu. Vitaskuld er hægt að deila við Björn um ýmis smáatriði þessa máls, eins og Shengen samstarfið og þá ekki síður hugmynd hans um að þjóðin eigi að kjósa um það hvort farið verði í aðildarviðræður. Slíkar kosningar gætu verið slæmt veganesti íslenskri samninganefnd sem væri þá enn frekar skyldug til að koma með aðildarsamning til þjóðarinnar eftir aðildarviðræður, jafnvel þó að skilyrði ESB væru - sem þau verða - algerlega óásættanleg.

Hugmyndinni um að efna til slíkrar þjóðaratkvæðagreiðslu fylgir líka sú míta að með því að fara í gegnum ferlið megi koma málinu út af borðinu en það er ekki reynsla nágranna okkar á Norðurlöndum sem þurfa þá bara að kjósa aftur og aftur, þar til innlimun er samþykkt.


Vil ég aftur í Framsóknarflokkinn!?

Ég ætlaði að stilla mig um að blogga mikið meira um Framsóknarflokkinn að sinni. Vil helst gefa mönnum á því heimili vinnufrið og mun víst ekki af veita. Þráfaldlegar óskir manna að ég gangi aftur í flokkinn og taki undir með hinum nýja og glæsta formanni, Sigmundi Davíð Gunnlaugssyni, kalla samt á að ég svari þeirri ósk á opinberum vettvangi. Get þá að einhverju leyti losnað við að útskýra þetta í löngu máli í samtölum með því að vísa í þessa færslu.

Því er þá fljótsvarað. Ég er ekki á leiðinni inn í minn gamla flokk og ástæðurnar eru:

Í fyrsta lagi þá hefur Framsóknarflokkurinn stigið mjög örlagaríkt og alvarlegt skref á móti sjálfstæði landsins með því að álykta sl. föstudagskvöld að hann vilji í aðildarviðræður við ESB. Það þó að þar við séu sett ýmis skilyrði, meira og minna óraunhæf skiptir í raun engu máli. Ingibjörg Sólrún hefur haft á orði að hún setji yfirráð okkar yfir fiskimiðunum sem skilyrði fyrir aðild. Allir vita þó að henni er engin alvara með því enda óraunhæft og sama á í raun og veru við um skilyrði Framsóknarflokksins. Þau eru meira að segja þannig að það er ekki hægt að taka sum þeirra alvarlega - sum ganga til dæmis lengra en náðist í EES. Þar af leiðandi falla þau öll um sjálft sig og við vitum fullvel að þeir sem fengu þessari ályktun framgengt í flokknum eru fæstir mjög þjóðhollir og hafa engan áhuga á að halda skilyrðum þessum til streitu.

Í öðru lagi þá hefi ég ekki sannfæringu fyrir því að mjög margt muni breytast til hins betra í flokknum. Meðan ég starfaði á Alþingi fyrir flokkinn var mjög mætur maður formaður og skoðanir okkar fóru um margt saman. Mér sýnist að núverandi formaður sé einnig mjög mætur maður skoðanir hans einnig fari mjög saman við mínar. Ég hefi aftur á móti efasemdir um að hann nái nokkuð betri tökum á flokki þessum. Vonandi hefi ég rangt fyrir mér þar því eins og staðan er nú þarf Ísland á öllum þjóðhollum mönnum að halda. Ég hefi þegar sent Sigmundi Davíð heillaóskir en geri það hér með opinberlega og mér er full alvara þegar ég óska honum þess að honum takist það sem Guðna mistókst!

Í þriðja lagi þá er það misskilningur að nýtt Ísland verði til með því að setja nýtt fólk í forystu allra gömlu stjórnmálaflokkanna. Í því er fólginn sá misskilningur að kerfið hafi í raun og veru verið í lagi, aðeins að það hafi of gamalt fólk setið í stólum þessa kerfis of lengi. Ég held þvert á móti að það kerfi flokksræðis sem við höfum  byggt upp í landinu sé vandamálið og að nokkru orsök ófara okkar. Ekki hvaða fólk valdist til starfa þó víst hafi margir setið of lengi. Þessi gagnrýni mín beinist ekki sérstaklega að Framsóknarflokki en um þetta hefi ég skrifað, t.d. hér og mun skrifa meira á næstunni.

Ég er semsagt genginn úr Framsóknarflokki og eins og fulltrúar á flokksþingi hafa væntanlega heyrt í kveðju minni sem ég fól framkvæmdastjóra flokksins að flytja þá kveð ég þann flokk í friði, þakka samvistina og óska vinum mínum sem þar vilja starfa velfarnaðar.


Hver ætlar að handtaka hvern...

Sýslumaðurinn Ólafur Helgi Kjartansson hefur boðað fjöldahandtökur á Sunnlendingum. Hinir seku eru hinir skuldsettu sem ekki hafa mætt til skýrslutöku vegna fjárnáms og annarra leiðinda sem skuldarar vitaskuld lenda í. Ég ætla ekki að mæla skuldaóreiðu bót en margir þeir sem nú eru að lenda á vanskilaskrá hafa til þessa verið vammlausir í sínum peningamálum.

Ólafur Helgi sem er eins og við flest margs góðs maklegur er ekki að gera þetta sem einstaklingur heldur sem fulltrúi dómsmálaráðherra og ríkisvaldsins. Þessa sama valds sem með afglöpum, hagstjórnarmistökum og sofandahætti hefur komið landinu í þær ógöngur að erlendar herraþjóðir vilja helst fara eins með lýðveldið sjálft. Og hann er fulltrúi þess sama ríkisvalds sem ákvað í haust að grípa til þeirra neyðarúrræða vegna skulda að skipta um kennitölur á bönkunum.

Sýslumaðurinn er líka fulltrúi þeirra sömu valdherra og hafa staðfastlega neitað að mæta til skýrslutöku hjá þjóðinni með því að boða til kosninga. Ég er sammála fjölmörgum sem hafa bloggað um það undanfarinn sólarhring að með þessu sé beinlínis verið að hvetja fólk til byltingar. Og þó að mér sé illa við að kalla eftir því að Reykjavíkurvaldið komi hér austur fyrir fjall og setji ofan í við menn þá beinlínis hrópar þessi dagskipan sýslumannsins okkar á að dómsmálaráðherra taki í taumana og geri ákvörðun þessa ómerka.

Annars er aldrei að vita hver handtekur hvern í þessu landi...

 

(Skrifa

meira um málið á Smugunni síðdegis í dag...)

« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband