Bloggfærslur mánaðarins, maí 2010

Seiðkonur slökktu gos

Í dag komu til mín vísindakonur tvær hæverskar og fagrar og spurðu frétta úr héraði, þær Hallfríður Þórarinsdóttir og Bryndís Gunnlaugsdóttir. Ég sagði þeim frá gosinu og bað þeir fallega að fara austur og slökkva það. Það gerðu þær af fjölkynngi sinni. Reyndar hefur ekkert til þeirra spurst síðan en landsmenn gleðjast.

Gnarr og narr borgarstjórnarinnar

Það er eins og það gleymist í umræðunni um Jón Gnarr að af öllum pólitíkusum var hvergi samankominn eins misheppnaður söfnuður eins og í síðustu borgarstjórn og öll framkoma hans á síðasta kjörtímabili þvílíkt narr við lýðræðið og kjósendur. 

REI, Björn Ingi, Villi, Tjarnarkvartett, námsmaðurinn Gísli Marteinn, blóðug valdabarátta innan bæði Framsóknar  og VG, staða orkuveitunnar, salan á Thorsarahöllinni og ég er örugglega að gleyma einhverju fleiru en bara Ólafi F. 

Af öllu þessu þekki ég REI hneykslið best og var eins og fleiri mjög létt að sjá tvær valkyrjur, þær Svandísi Svavars og Hönnu Birnu ganga fram í því máli. En báðar ollu mér líka vonbrigðum þegar þær voru áfram áfjáðar að vinna með stjórnmálamönnum sem höfðu í REI svindlinu algerlega fyrirgert rétti sínum til setu í borgarstjórn. Og báðar voru líka til í að vinna með Ólafi F sem var mikið dómgreindarleysi. 

Borgarbúar hafa því ærna ástæðu til að styðja Jón Gnarr en ættu að samt að láta það ógert. Ennþá vitum við ekkert að hve miklu leyti Gallupfylgi Gnarrsins skilar sér í kjörkassa.

Auðvitað vonast ég til að Sóley (VG) fari inn með þrjá menn - enda er hún vel að því komin. Einhverjum kann að þykja hún róttæk en stúlkan sú er miklu skemmtilegri í viðkynningu en fjölmiðlar draga upp og svo gegnumheiðarleg að öllu lengra verður ekki komist.


Hvað er að?

Er nokkuð  betra við kóngafólk að gera. Ferguson stendur undir nafni. 

 


mbl.is Hertogaynja í vondum málum
Tilkynna um óviðeigandi tengingu við frétt

Hættir að vera með...

Aðilar vinnumarkaðarins eru óborganlegir og duga ágætlega síðan spaugstofan hætti.

Nú segir Villi Egils sig í annað sinn frá sama samstarfinu við ríkisstjórn. Virkar á mig eins og kona sem hótar enn að skilja við manninn sinn löngu eftir skilnað.

Gylfi Arnbjörns (sem átti alls ekki að raka af sér skeggið) birtist í garði við einhverja Reykjavíkurvillu og er öskuvondur yfir því að ríkið sé að hugsa um skattahækkanir á hátekjufólk. Ég sem hélt að hann ynni hjá ASÍ. Var allavega þar um daginn þegar hann hótaði verkfalli til að mótmæla atvinnuleysi.

Saman hóta Gylfi og Villi svo að taka engan þátt í samningum í haust og ef þeir geri það þá muni þeim allavega alls ekki takast að ljúka þeim.  


Kosningaloforðaveikin - íhaldið lofar nýrri Sundhöll

Með morgunkexinu náði ég að blaða aðeins í kosningamálgagni Sjálfstæðismanna hér í bæ. Fallegt blað og vel upp sett, lesmálið er ekki eins yfirþyrmandi og var í annars ágætu blaði Samfylkingarinnar og skopmyndirnar margar vel gerðar. En gagnrýnin er yfirleitt sett fram í hálfkveðnum vísum og sama er með loforðin. 

Það er vissulega þolraun frambjóðendum að lofa engu upp í ermi sína. Nú eru Sjálfstæðismenn sprungnir á limminu og lofa bæjarbúum því að byggja nýja Sundhöll og vilja líka klára menningarsalinn í Hótelinu. Allavega telja þeir þá sem nú stendur ekki boðlega sveitarfélagi sem vill láta taka sig alvarlega. Skrýtinn alvarleiki það.

Allt þetta ætla þeir að byggja með því að  spara í yfirstjórn Árborgar sem er samt sú fjórða ódýrasta í öllu landinu. Hér verður auðvitað beitt göldrum sem jafnvel útrásarvíkingar gætu öfundast yfir...


Að menntast sig til óbóta

Illa launar Þórólfur Matthíasson gott uppeldi í Rangárþingi þegar hann nú heggur að bændum vegna eldgoss í Eyjafjallajökli. Það sér vitaskuld hver maður að náttúruhamfarir eins og þessar styrkja frekar en hitt þær röksemdir sem eru fyrir íslenskum landbúnaði. Þó ekki sé annað en bara hvað náttúran getur á augnabliki dæmt nútíma flutninga úr leik.

Til þess að komast að annarri eins niðurstöðu þurfa menn annað tveggja að hafa vitleysislegar ályktanir að sérstöku áhugamáli - nú eða þá að hafa menntað sig til óbóta.


Einkennilegt viðtal og undarlegt siðferði

DV er um margt einkennilegt blað og þrátt fyrir góða spretti þarf líka að taka efni þess með nokkrum fyrirvara.bjorgvin_dv.jpg

Nú áðan datt ég um viðtal  við nágranna minn hér úr Latínuhverfinu á Selfossi, Björgvin G. Sigurðsson þar sem blaðamaður hefur eftir honum að flokkurinn hafi lofað honum vinnu eftir afsögn. Þetta er fáránlegra en svo að ég trúi því upp á þann ágæta dreng Björgvin að hann hafi nokkru sinni sagt þetta. 

Flokkar eru einfaldlega ekki vinnumiðlanir og þó að þeir hafi í sukki og svínaríi fyrri ára leyft sér slíkt þá hefi ég miklar efasemdir um að nokkur flokksforysta telji sig geta hagað  sér með þessum hætti dag.

Verði viðtalið ekki borið til baka skuldar bæði Samfylkingin og Björgvin G. þjóð sinni skýringar á þeim þankagangi sem hér liggur að baki.

 


ESB-martröðin senn á enda

ESB umsókn Íslendinga er sjálfdauð. Evrusvæðið glímir nú við kreppu sem dýpkar með hverju misseri og það verður sífellt fjarstæðukenndara að gangast þeirri martröð á hönd. Ofurtrú Össurar og annarra sem sjá enn ljós þegar ekkert blasir við nema myrkur minnir á gömlu kommana sem lofuðu Kína og Sovét löngu eftir að ljóst var að þessi ríki höfðu ekkert að bjóða.

Það styttist í að almenningur í landinu taki málið í sínar hendur enda er hér líkt og í Noregi langt yfir 2/3 hlutar almennings andvígur aðild. Það getur engin ríkisstjórn í lýðræðisríki komist upp með stórfelldan fjáraustur í verkefni sem rétt um fjórðungur landsmanna styður. 


Magma og klofningur Sjálfstæðisflokksins

Birgir Ármannsson þingmaður Sjálfstæðisflokksins talar um klofning ríkisstjórnarinnar í þessu ólukkans máli sem er beint framhald af gömlu REI-spillingunni.

Kannski er það rétt og það eru þá einhverjir væntanlega í Samfylkingunni sem eru ánægðir með þessa útsölu orkuauðlinda. Þeir hafa samt ekki gefið sig mikið fram. Aðallega er hér á ferðinni að útlensku skúffufyrirtæki hefur verið gefinn kostur á að nota sér veika stöðu Íslands.

Hitt er athyglisverðara að bera saman annars vegar málflutning Davíðs Oddssonar ritstjóra Moggans annarsvegar og svo hinsvegar þingmannanna Ragnheiðar Elínar og Birgis sem eru óskaplega ánægð með Magma.

Davíð á sér helst málsvara í Ögmundi, Lilju og öðrum ríkisstjórnarliðum í þessu máli.

Hvað er að gerast í Sjálfstæðisflokknum?


mbl.is Vill banna fjárfestingar erlendra aðila í orkufyrirtækjum
Tilkynna um óviðeigandi tengingu við frétt

Mölbrotinn eiðstafur og farísear

Nímenningamálið er sorglegt dæmi um fyrirlitningu einhverskonar farísea gagnvart því alþýðufólki sem stóð að réttmætum og löngu tímabærum mótmælum á Austurvelli.

Sami vandlætingakór hefur til þessa ekki haft áhyggjur af stjórnarskránni og eiðstaf þingmanna.

Sjá nánar í grein minni á Smugunni.


« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband