Gnarr-smjaður út yfir þjófabálk

Smjaður stjórnmálaflokka og fjölmiðla við Jón Gnarr er komið út yfir allan þjófabálk. Margt ljótt má segja um stjórnmálaflokkana en í landinu ríkir þó þúsund sinnum betra stjórnarfar heldur en þar sem ekki er stuðst við þingræði og lýðræði.

Besti flokkurinn er ekkert annað en skammarleg atlaga að lýðræðinu og hlutur þeirra manna sem þar standa að verki verður ekki betri við það að þeim hafi tekist atlagan. 

Hvenær ætla svo stjórnmálaleiðtogar að láta af þeirri kratísku firru að ef þeir fái ekki fylgi hafi þeir gert eitthvað rangt! Niðurstaðan er alltaf rétt út frá sjónarmiði lýðræðisins því það á að gilda. En hún er sjaldnast rétt út frá þjóðarhag eða skynsemi. Þessvegna á Jón Gnarr sína borgarfulltrúa en alvöru stjórnmálamenn ættu að sjá sóma sinn í að sneiða hjá þeim í samstarfi. 

Eða hvernig dettur íslenskri þjóð í hug að niðurstaða  kosninga sé allaf rétt þegar meirihluti hennar (ég þar á meðal sem ég hefi margoft beðist forláts á) kaus árum saman yfir sig þá flokka sem gáfu bankana og leiddu glæpalýð til valda í viðskiptalífinu. 

Athugasemdir

[Vendetta, 30.5.2010 kl. 20:41]

Þau eru súr vínberin, Bjarni

[Haraldur A. Haraldsson (IP-tala skráð) 30.5.2010 kl. 20:59]

Bjarni. "Skammarlega atlaga að lýðræðinu" segir þú og hefur augljóslega ekki mikið álit á dómgreind kjósenda og að þeir séu fullfærir um að dæma sjálfir hvað þeir vilja. 

[Birgir Guðjónsson (IP-tala skráð) 30.5.2010 kl. 21:03]

næstum 40 % þeirra sem kusu vildu veita Æ listanum sitt atkvæði. Þetta var þeirra val.

Bjarni: Live with it !

[Kalli Sveinss (IP-tala skráð) 30.5.2010 kl. 21:11]

Félagi Bjarni !

 Pistill þinn sem skrifaður af "Kalla Sveinss". Ertu viss um að þú hafir verið framsóknar!maður( af gamla skólanum) og síðan fylkt liði með vinstri-RAUÐUM ?!Hugsar sem gegnumheill íhaldsmaður !

 Það er hreint með ólíkindum að bull-framboð skuli geta haft 30% íbúa höfuðborgarinnar að hreinum og klárum fíflum !

 Fá nú útlendingar að hlæja sig máttlausa yfir Molbúum og skrælingjum sem byggja höfuðborg þjóðarinnar ?

 Jón Gnarr Borgarstjóri !

 "Grátið með mér gullnir strengir, gítarar og mandolín" - orti Davíð á sínum tíma ( ekki Oddsson!)

 Og þó, kannski dæmum við grínarann of hart - kannski er hann "fæddur í starfið" - eða sem Rómverjar sögðu.: " Par negotiis neque supra" þ.e. " Sem fæddur í starfið" !!

[Árni Gunnarsson, 30.5.2010 kl. 21:33]

Og nú verða margir ráðvilltir þegar þeir verða að kveðja Kaprí eftir að búið er að koma þeim í skilning um að íbúar borgarinnar hafi fengið nóg af þeim.

Og margir útlendingar munu átta sig á því eitthvað mikið hlýtur að hafa verið að í þeirri stjórnsýslu sem hlaut svo hraklega útreið hjá snjöllum gamanleikara sem sýndi fólkinu fram á hina aumkunarverðu nekt pólitíkusanna.

Meira en þriðjungur kjósenda í Reykjavík áttaði sig á því að þegar málin voru lögð fyrir þá í einföldu leikverki þá hafði þeim ítrekað verið boðið upp á ísbjörn í Húsdýragarðinum og að ættleiða róna.

Það þurfti bara að þýða þetta dulmál pólitíkusanna og setja það fram á skiljanlegu máli. Ég dáist að Reykvíkingum fyrir það hversu fljótt og vel þeim gekk að skilja þetta.

Já, rétt er það að skömm og niðurlæging pólitíkusanna mun ná heimsathygli.

[Benedikta E, 30.5.2010 kl. 21:36]

Góður pistill hjá þér Árni - og beint í  mark.

[Einar Björn Bjarnason, 30.5.2010 kl. 21:38]

Þú ert sannarleg harður við þau, Bjarni.

Ég hef ekki heldur mjög mikinn húmor fyrir þessu.

 En, ég er tilbúinn að bíða aðeins og sjá, áður en ég fullyrði - að þetta sé vísbending um eitthvað slæmt.

Sannarlega, er reynsla sögunnar af svokölluðum popúlískum flokkum og hreyfingum, ekki góð.

En, enn of snemmt, að kveða upp úr, að um slíkt sé að ræða.

Kv.

[Víðir Benediktsson, 30.5.2010 kl. 21:52]

Það hefði mátt taka undir þessa gagnrýni Bjarni ef hin framboðin hefðu haft eitthvað betra fram að færa en svo var ekki. Þau voru ekki einu sinni fyndin.

[Gunnar Skúli Ármannsson, 30.5.2010 kl. 22:37]

Sæll Bjarni,

mér finnst skömm fjölmiðlastéttarinnar mest. Þau gerðu allt til þess að baða sig í sviðsljósi stjarnanna. Spóluðu þannig upp fylgi Jóns og fjöldinn vill vera í sigurliðinu.

Ég er velta því fyrir mér hvort einhver munur sé á hvernig fólk bar sig að við að ákveða sig að kjósa Davíð úr Matthildi eða Jón Gnarr úr Bjarnfreðarsyni.

[Máni Atlason (IP-tala skráð) 30.5.2010 kl. 22:47]

Það er ekki sanngjarnt að segja að besta flokks fólk sé ekki jafn þjóðmálaskynsamt og þeir sem eru í fjórflokknum. Þó að Besti Flokkurinn hafi ekki stefnu og þó að hann eigi örugglega eftir að klúðra ýmsum málum þá á honum örugglega ekki eftir að takast að samþykkja að byggja tónlistarhús fyrir 30 milljarða á kostnað skattgreiðenda.

[Anna Einarsdóttir, 30.5.2010 kl. 23:04]

Að segja að Besti flokkurinn sé skammarleg atlaga að lýðræðinu - er frekar skammarlegt að segja.

Lýðræði þýðir að fólk fær að kjósa sér fulltrúa.  Fólkið hefur kosið. 

[Hörður B Hjartarson, 30.5.2010 kl. 23:25]

     Ætli Bjarnfreðarson sé bróðir Hádegismóra og Kvótadóra , fyrst hann er skammarleg atlaga að lýðræðinu ?

    Ja spyr sá er ekki veit .

[Haraldur Rafn Ingvason, 31.5.2010 kl. 00:08]

"Besti flokkurinn er ekkert annað en skammarleg atlaga að lýðræðinu og hlutur þeirra manna sem þar standa að verki verður ekki betri við það að þeim hafi tekist atlagan."

 Svo kemur:

"Eða hvernig dettur íslenskri þjóð í hug að niðurstaða  kosninga sé allaf rétt þegar meirihluti hennar (ég þar á meðal sem ég hefi margoft beðist forláts á) kaus árum saman yfir sig þá flokka sem gáfu bankana og leiddu glæpalýð til valda í viðskiptalífinu. "

...þannig að það að kjósa besta flokkinn er "skammarleg atlaga að lýðræðinu"  þegar valið stendur á milli þeirra og hinna "sem gáfu bankana og leiddu glæpalýð til valda...".

Og hlífðu okkur við einhverju bulli um að flokkar í Reykjavík séu eitthvað betur siðaðir en ófögnuðurinn á þinginu!

Hér á síðu þessa ágæta bóksala held ég að eigi vel við að vitna í heimsbókmenntirnar -  "þessir rómverjar eru klikk...!"

[Auðbergur Magnússon (IP-tala skráð) 31.5.2010 kl. 00:37]

Afhverju er þér svona uppsigað við þetta fólk Bjarni? 

Þetta er bara fólk einsog þú.  Þarna er meira að segja einn bóksali :).

Ef að þín skoðun á því að atlaga sé gerð að lýðræðinu með því að bjóða sig fram utan "fjórflokksins" þá ert þú í sömu tilvistarkreppu og þeir stjórnmálaforingjar sem að hunsa þessi úrslit og lýsa yfir stórsigrum eða "varnarsigrum".  Þeir eru ekki í nokkru sambandi við fólkið í landinu og eru ekki tilbúinir að hlusta á það.

[Anna Sigríður Guðmundsdóttir, 31.5.2010 kl. 00:54]

Sæll Bjarni minn! Nú er ég svolítið hissa á skrifum þínum? En ég tel að þú þekkir ekki Jón Gnarr og félaga og þess vegna er ótti þinn skiljanlegur?

En ég get sagt þér það að óttinn er óþarfur! Þetta ágæta fólk í Besta flokknum eru boðberar réttlætis og lausna. Þú verður orðinn stuðningsmaður Besta flokksins áður en þú veist af M.b.kv.

[Hörður B Hjartarson, 31.5.2010 kl. 02:08]

    Er ekki Bjarnfreðarson eingetinn sonur tveggja úr tungunum  - þaðan kemur jú , hlýtur að vera það sem betra er en undanrennan , mjólkin já og jafnvel rjóminn sbr.: Gullhrepp os.frv.  

[Grétar Ómarsson, 31.5.2010 kl. 03:02]

Sæll Bjarni, af hverju hættir þú sem þingmaður?

Ef fjórflokkarnir byrja ekki á að ræða við Jón Gnarr og félaga mun það teljast athlægi að lýðveldinu, Þú verður líka að átta þig á að það voru ekki fjölmiðlar sem bjuggu til fylgi besta flokksins heldur fjórflokkarnir sjálfir með slakri og bjánalegri valdagræðgi, það er ekki eins og þeir flokkar sem voru í borgarstjórn hafi haft hag borgarbúa að leiðarljósi í öll þau skipti sem mynduð var ný borgarstjórn með tilheyrandi tilfærslum í borgarstjórastólnum ofl.

Gefðu Jóni séns, rétt eins og þú fékst á þínum tíma.

vonandi sýnir hann flokknum og um leið kjósendum sínum meiri tryggð og heiðarleika en sumir ónefndir sem kosnir hafa verið af lýðnum í sveitastjórnir eða á alþingi.

[lalli (IP-tala skráð) 31.5.2010 kl. 07:41]

Bjarni, hvernig í ósköpunum getur nýtt framboð verið atlaga að lýðræðinu??   Svona segja bara þeir sem eru andvígir því að ALLIR hafi jafnan rétt.  Í lýðræðinu felst einmitt sú hugmyndafræði að HVER SEM ER geti tekið þátt frjálsum kosningum.  Ef þú hefðir verið uppi á þar síðustu öld þá hefði þér væntanlega þótt það aðför að lýðræðinu að kjellingar væru að ota sínum tota í stjórnmálum.

Skammastu þín Bjarni fyrir að vita ekki hvað lýðræði er. 

[Bjarni Harðarson, 31.5.2010 kl. 07:48]

Takk fyrir góða umræðu. Ég mun stinga niður penna um þetta og fjórflokkinn aftur innan skamms. Einhverjir kjósa að misskilja mig þannig að ég telji fulltrúa Besta flokksins hið versta fólk. Það tel ég alls ekki og kannski á það bara eftir að standa sig prýðilega. Og fráleitt er að eigna mér þær skoðanir að ég telji að fjórflokkskvikindið eigi eitt að fá að bjóða fram. Ég tel aftur á móti að þeir sem bjóða fram með það að markmiði að lítilsvirða lýðræðið með aulahúmor, já að slíkt fólk sé að stunda skammarlegan og afar hættulegan leik og eigi því að skammast sín!

[Katrín Snæhólm Baldursdóttir (IP-tala skráð) 31.5.2010 kl. 08:42]

Bjarni nú þykja mér skrif þín skrítin.  Þú talar um að "lítilsvirða lýðræðið með aulahúmor" þegar staðreyndin er sú að með beittu háði tókst Jóni Gnarr og félögum að ná athygli borgarbúa og fjölmiðlanna og varpa um leið ljósi á hversu fáránleg vinnubrögð stjórnmálanna hafa verið. Og þá ekki síður svokölluð kosningabarátta frasakenndra og ruglingslegra stjórnmála.

Þú hlítur að hafa farið framúr vitlausu megin í morgun Bjarni minn fyrst þetta snýr allt svona vitlaust fyrir þér. En svona getur óttinn við hið óþekkta stundum leikið menn....og þá vilja þeir bara ríghalda í það sem þeir þekkja. Jafnvel þó þeir viti og þekki af eigin raun hversu afskaplega vont hið þekkta er.

[Tryggvi Gíslason (IP-tala skráð) 31.5.2010 kl. 10:51]

Ekki hef ég alltaf verið sammála þér, Bjarni, en í þessum pistli þínum kristallast mikill sannleikur. Innkoma Jóns Gnarrs og fylgismanna hans á leiksvið stjórnmálanna er aðeins nýr þáttur í skopleik íslenskra stjórnmála. Ofur skiljanlegt er að almenningur sé sár og reiður, en skrípislæti leiða okkur ekki út úr eyðimörkinni. Jón Gnarr og fólk hans er hins vegar hvorki betra né miklu verra en fólk upp og ofan - en það er svo önnur saga.

[Ómar Bjarki Kristjánsson, 31.5.2010 kl. 11:31]

Hér er stefna flokksins í fjölskyldu/jafnréttismálum, sem dæmi:

„Besti Flokkurinn setur manninn og velferð hans í öndvegi og þar er konan hans ekki undanskilin. Það þarf að hlusta meira á konur. Hættum að segja: “Þetta eru bara einhverjar kellingar að röfla.” Þetta eru ekki kellingar heldur konur og þeirra rödd skiptir líka máli. Við viljum opna Kvennastofu þar sem konur geta komið og fengið sér allskonar kaffi með bragðefnum eins og vanillu og kanil. Og svo mega þær tala eins og þær vilja og það verður allt tekið upp og geymt“
http://bestiflokkurinn.is/um-flokkinn/stefnumal

Þetta verður mjöög skemtilegt.  Alveg bara:  Hahaha hohoho hihihi etc.

[Ágústa Andersen (IP-tala skráð) 31.5.2010 kl. 13:04]

Bjarni, ef þú ætlar að eiga séns í að vera áfram marktækur í pólitík verður þú að endurskoða átakapólitíkur-arfleifðina og átta þig á boðskapnum að baki þessari sögulegu kosningu BF. Ég skora á þig, vertu með í byltingunni, gerum raunverulegar breytingar, og byrjum á því að hætta að frussa gremjunni yfir hvert annað. Ekki víst nema það virki betur en endalausar tilraunir til að "sigra andstæðinginn"?

[Kjósandi á landsbyggðinni (IP-tala skráð) 31.5.2010 kl. 13:25]

Talandi um fjölmiðlana í þessu öllusaman, að mér fannst ótrúlegt hvað þeir leyfðu Jóni Gnarr að bulla bara einhverja steypu án þess að ganga á hann og spurja hvað hann eiginlega meinti.

Ef einhver annar stjórnmálamaður hefði svarað svona út í loftið hefðu fréttamenn gegnið mun harðar að og spurt hreinlega hvaða rugl þetta væri.

Eins og í Kastljósinu daginn fyrir kosningarnar að þá var verið að spurja oddvitana um stefnu og hvað þeir ætluðu að gera og í þrígang fór Jón að babla um eitthvað hvítflibbafangelsi .. engum datt í hug að leiðrétta hann og benda honum á að ríkið sæi um fangelsismál. Þetta var orðið pínlegt á tímabili.

Og ísbjörn í húsdýragarðinn og ætleiða róna osfrv.

En svona fengu þeir að bulla fram og aftur án þess að nokkur gekk á þá og hreinlega pressaði á þá að segja frá STEFNU SINNI og hvað þeir ætluðu að gera til að bæta líf borgarbúa.

Ég fylgdist vel með kosningabaráttunni og á kosningadaginn var ég engu nær hvað Besti flokkurinn stendur fyrir eða hvað þeir ætla að gera eða hverju þeir ætla að breyta.... hvaða annar stjórnmálaflokkur hefði getað komist upp með í viðtölum í sjónvarpi og annarstaðar að babla og bulla bara út í gegn og hinir frambjóðendurnir horfðu t.d á Jón Gnarr í kastljósinu eins og mongólítan í fjölskyldunni sem er að standa sig svo vel.

Afhverju svöruðu frambjóðendurnir ekki Jóni, spurðu hvaða vitleysa þetta var ?? það var eins og enginn þorði að benda á fíflaganginn.

Og þetta rugl fær 6 borgarfulltrúa.

Það voru ný framboð, reykjavíkurframboðið, H listinn sem var náttúrulega Ólafur F, en hann stóð sig heldur ekki vel í viðtölum. Fólk fékk á tilfinninguna eins og hann væri ekki í neinu jafnvægi. F listinn var með nýtt fólk sem var reiðubúið að vinna fyrir borgina. En þeir fengu ekkert fylgi né hin nýju framboðin.

Það var bara sjálfstæðisflokkurinn, samfylkingin og síðan vitleysan. En VG náði síðar einum manni inn.

Það er ekki skrítið hvernig ástandið hér á landi er, ef ekki þarf meira en frægan grínista sem bullar út í gegn alla kosningabaráttuna og er hættur að vera fyndinn í lokin, heldur kemur með einhverjar spekingslega þvælu.. þetta var bara pínlegt.

[Vendetta, 31.5.2010 kl. 14:10]

"En VG náði síðar einum manni inn", þ.e.a.s. Sóleyju Tómasdóttur. Sem var skammarleg atlaga að lýðræðininu, þar eð Þorleifur átti það sæti með réttu.

[Ómar Bjarki Kristjánsson, 31.5.2010 kl. 14:48]

Það sem komið hefur berlega í ljós að undanförnu, því miður, er að fjölmiðlar á íslandi eru meira og minna ónýtir. (Kom td greinilega fram í icesaveskuldarmalinu)

Þeir eru ófærir um að efna til málefnalegrar umræðu.

Líklega má svo sem  segja að þeir dragi visst dám af samfélaginu.

Staðreyndin er að í frjálshyggjufylleríi sjalla undanfarin ár var landinu rústað- og flestu sem landinu fylgir.   Bara öllu.  Fjölmiðlar stórlöskuðust.  Pólitískum skilningi eða pólitískri  þekkinu almennings var líka rústað.  Öll málefnaleg umræða var jörðuð af sjöllum.  Valtrað yfir hana fyrst áfram - og síðan bakkað yfir hana.

Uppúr þessari flatnesku sprettur síðan Jón og/eða höfðar inní hana.  Talar inní tómið.  Vissulega var listrænn stíll yfir þessu hjá honum.  Hefur þó nokkuð mikið listrænt gildi.  Viðurkenni það alveg.   Að bjóða sig fram og segja bara eitthvað - og verða stærsti flokkurinn.   Það er list. 

það merkilega er í rauninni að það sem fært var fram á pappír sem stefna var hvorki fyndið né eitthvað sneddý.  Að mestu leiti eitthvert bull bara og sumt enganvegin við hæfi fullorðinna manna.

Merkilegast var samt framganga Jóns persónulega í umræðuþáttum o.þ.h.  Þó eins og áður sagði að listrænt gildi hafi verið talsvert, þá sagði hann bara andsk. ekki neitt.  Nánast þagði. Og ef hann neyddist til að segja eina setningu þá kom:  Hm. eee. ööö. og svo eitthvað súrreal.

[Hörður B Hjartarson, 31.5.2010 kl. 15:04]

        Bjarni !   Ert þú búinn að ættleiða Jóa B  ?

        Það er kannske engin þörf á því , þar eð hann er ríkasti maðurinn á Selfossi .

        En er Eyþór byrjaður að undirbúa ísbjarnarbúr í sundlauginni  ?

[Bjarni Gunnarsson (IP-tala skráð) 31.5.2010 kl. 15:25]

Nú finnst mér þú vera á villigötum nafni. Vandi lýðræðisins er ekki að nýr flokkur bjóði fram, heldur sá að hér hafa atvinnustjórnmálamenn getað gengið að fylgi sínu vísu, þó svo það færi kannski upp eða niður um fáein prósent. Og síðan makkað um völdin eftir kosningar - sýndarkosningar, mætti jafnvel segja. Því var í raun aldrei hægt að "kjósa annað yfir sig". Sé þetta atlaga er hún í besta falli verðskulduð. Við höfum sofið á verðinum.

[Ómar Bjarki Kristjánsson, 31.5.2010 kl. 15:35]

Ps. þar sem segir "Pólitískum skilningi eða pólitískri  þekkinu" væri etv. betra að segja pólitísk meðvitund.  Hún er engin hjá stórum hluta fólks.  Það er pólitískt blakkát.  Það er oft þannig ef teygað er of mikið af miði þá endar það í blakkáti.  Ef teygað er of mikið af frjálshyggju og tala ekki um ný-frjálshyggjugambranum = Pólitískt blakkát.

Eða hvernig stóð á því að fólk áttaði sig ekki á hættunni af innmokstri erlends lánsfés með stórtækum vinnuvélum?  Undir það síðast voru menn farnir að seilast í vasa evrópskskra sparifáreigenda.

Hvernig var það túlkað hérna uppi? Jú, það var "góðæri" og það var að þakka sjöllum auk genatiskrar snilli íslendinga!  Halló.  Hve vitlaus og viti sínu fjær er hægt að vera?

Enda var teórían hjá Sjöllum að pólitísk meðvitund fólks ætti að snúast um að græða á daginn og grilla á kvöldin. 

[Jón Valur Jensson, 31.5.2010 kl. 16:18]

Athyglisverður pistill, Bjarni, og rétt að mæla gegn Gnarr-smjaðrinu!

Bendi á eftirfarandi viðvörun mína og hvatningu:

Tekur Jón Gnarr freistingu borgarstjóralauna fram yfir hagsmuni Reykvíkinga?

[Haraldur Haraldsson, 31.5.2010 kl. 17:18]

mikið sammála þessu hjá þér Bjarni///"Mey skal að morgni lofa" segir máltækið,Kveðja Halli gamli

[Brjánn Guðjónsson, 31.5.2010 kl. 19:21]

hvernig er hægt að tala um skammarlega atlögu að lýðræðinu?

Besti flokkurinn hlaut lýðræðislega kosningu. hvað er skammarlegt við að veita þeim sem telja sig eiga stjórnmálin og kalla aðra „ekki alvöru?“ allir þegnar eru bærir í stjórnmál og ef eitthvað er, þá frekar venjulegt fólk utan úr bæ en útungaðir flokksdindlar, sem þekkja ekkert annað en málfundafjas og frasastjórnmál.

fyrr má vera spældur en grútspældur.

[Brjánn Guðjónsson, 31.5.2010 kl. 20:24]

'veita þeim flengingu' átti það að vera

[Guðlaug Hestnes (IP-tala skráð) 31.5.2010 kl. 22:35]

Verði Reykvíkingum að góðu.

[Sævar Einarsson, 31.5.2010 kl. 23:37]

Bjarni, "Ef þú smælar framan í heiminn þá smælar heimurinn framan í þig" :) *smile*

[sandkassi (IP-tala skráð) 1.6.2010 kl. 02:41]

Bjarni þetta er nú ekki mjög viturlegur pistill. Ég vona að hér sé ekki í raun og veru verið að tala niður til listamanna sem skipa Besta flokkinn?

Þú talar um atlögu að lýðræðinu, tja fólkið kaus sér 6 menn úr Besta Flokknum. Er það ekki lýðræði?

Það er ég nú hræddur um.

Síðan talar þú um "alvöru stjórnmálamenn ættu að sjá sóma sinn í að sneiða hjá þeim í samstarfi".

Nei hættu nú alveg, hverjir eru "alvöru stjórnmálamenn"? Ég bara spyr,,,.

látum sjá,,,,Óskar Bergsson? Ekki myndi ég kalla hann Alvöru stjórnmálamann.

hmm,,,,,Dagur B. Eggertsson? Ekki heldur,,,,ég gæti haldið áfram.

En Óttar Proppe, Jón Gnarr, Einar Örn, ég vil sjá hvað þessir strákar ætla að gera enda hafa þeir allir afrekað mun meira í sínu lífi og á sínum starfsvettvangi en þeir "alvöru stjórnmálamenn" sem nú munu víkja sæti fyrir þeim.

Ólafur F.,,,,alvöru stjórnmálamaður? Nei.

Gísli Marteinn? Nei ekki heldur.

,,,,,,,,,,,,,,,,,,,,,,,,,,hmm

[Halldór Egill Guðnason, 1.6.2010 kl. 04:02]

Mey skal að morgni lofa segir Haraldur hér að ofan. Mikið rétt, en er ekki rétt að láta nóttina líða fyrst? Atlaga að lýðræðinu? Ég skil ekki með nokkru móti hvaða áhyggjur bókakaffiseigandi á Selfossi hefur af góðri útkomu fersks flokks í Reykjavík. Er það eitthvað náttúrulögmál að "reyndir" pólitíkusar eigi einir rétt á sætum í bæjarstjórnum eða til Alþingis? Vissara fyrir þig Bjarni minn að hafa rótsterkt á könnunni næstu daga og jafnvel eiga einn eða fjölmarga fleiri "hjartastyrkjandi" í pitlu, ef ske kynni að samræðurnar drægjust á langinn, einhvern næstu daga.  Þetta með atlöguna að lýðræðinu þarfnast töluverðrar umræðu.

[Grefillinn Sjálfur - Koma svo! (IP-tala skráð) 1.6.2010 kl. 13:55]

Ég skil ekki heldur hvernig hægt er að fá það út að meirihlutavilji sé "atlaga að lýðræðinu" bara vegna þess að maður er ekki sáttur við kosningataktík viðkomandi framboðs.

Væri það þá ekki alveg eins "atlaga að lýðræðinu" að kjósa eitthvað annað?

[RIKKO, 1.6.2010 kl. 15:54]

svaraðu nú þessum athugasemdum Bjarni... ef þú þorir!

[ThoR-E, 1.6.2010 kl. 16:25]

Alveg finnst manni merkilegt að ekki sé stefnan að auglýsa eftir borgarstjóra. Fagmanni.

Það var full mikil bjartsýni enda stefnir Jón Gnarr ótrauður á að setjast í borgarstjórastólinn.

Enda maðurinn hokinn af reynslu ...............ekki satt?

Þetta verður skrautlegt.

[RIKKO, 1.6.2010 kl. 17:18]

AceR: Það fer eftir því hvað þú kallar reynslu, ég tel að Jón Gnarr sé með meiri reynslu en allir hinir frambjóðendur til samans.

[ThoR-E, 1.6.2010 kl. 17:48]

Ja .. hann er með mínum uppáhalds leikurum, ekki bara á Íslandi.

Var einmitt að horfa á Bjarnfreðarson þar sem hann fer á kostum. Einnig í næturvaktinni og hinum 2 vöktunum.

Ætli næsta verði Borgarstjóra-vaktin ? ;)

[ThoR-E, 1.6.2010 kl. 17:50]

Vantaði inn í:

[...] uppáhalds leikurum, og hann hefur mikla reynslu í leiklist. Þannig að jú, á því sviði hefur hann eflaust meiri reynslu en hinir.

En hvaða reynslu hefur hann af því að reka borg með starfsmönnum sem eru í þúsundatali.

Las einhverstaðar að hann hefði verið í bölvuðum vandræðum með að reka litla bókasölu sem opin var 4 daga í viku. Það hafi allt farið á hliðina.

Þannig að það er margt sem þarf að taka inn í þetta ... ekki nóg að vera bara frægur og vinsæll ..

[sandkassi (IP-tala skráð) 1.6.2010 kl. 23:11]

Láttu ekki svona AceR, þetta eru bara strákar sem klára sín verkefni, þeir koma með víðtæka reynslu úr atvinnulífinu inn í borgarmálin. Einar Örn er blaðamannsmenntaður, annar er arkitekt.

Borgarstjóri þarf fyrst og fremst að hafa common sence, hann þarf ekki að vera viðskipta eða skipulagsfræðingur því það er nóg af slíku fólki í vinnu hjá borginni. Hann þarf að geta unnið með fólki, hlustað á fólk og tekið upplýstar ákvarðanir.

Hann þarf leiðtogahæfileika og sjálfstæði.

Ekkert af þessu lærir fólk í skólum. 

Þú segir; "En hvaða reynslu hefur hann af því að reka borg með starfsmönnum sem eru í þúsundatali"

Hver hefur það?

[Jón "Nonni" (IP-tala skráð) 1.6.2010 kl. 23:29]

Ekki frekar atlaga að lýðræði en lélegir bloggarar.

Þekking og reynsla er nokkuð sem stjórnmálamenn hafa ekki. Dabbi og kó hefði sennigega gengið betru frá bankamálum ef þeir hefðu einhverja hugmynd um hvar þetta endaði.

Reykvíkingar kusu. Þeir munu þurfa að þola grínið í 4 ár... nú eða 8 ef vel gengur ;-)

[Þórólfur Júlían dagsson (IP-tala skráð) 1.6.2010 kl. 23:49]

ég ætla að mæla með því að jón gnarr reddi öllum óánægðum sjálfstæðis og framsóknaflokks mönnum fría KLÚTA svo þið gétið grenjað í þá

[Jón Valur Jensson, 2.6.2010 kl. 00:05]

En af hverju voru þá svona margar útrstrikanir á Einari Erni?

[ThoR-E, 2.6.2010 kl. 00:21]

Hef reyndar ef ég á að segja eins og er fengið aðeins meira álit á Jóni eftir það sem ég hef heyrt frá honum nú eftir kosningar. Nú talar hann bara eðlilega og talar um það sem þarf að gera osfrv.

Var bara svo hissa á þessu rugli t.d í Kastljósinu daginn fyrir kosningadaginn. En það hefur (held ég) þá bara verið grínið sem talað er um. ;)

En jæja, nú tekur alvaran við......vonandi =)

[sandkassi (IP-tala skráð) 2.6.2010 kl. 02:27]

já já, mér lýst ágætlega á hugmynd þeirra að tekjutengdum leikskólagjöldum.

Hljómar ágætlega bara.

[Einhver Ágúst, 2.6.2010 kl. 09:19]

Sæll Bjarni og þakka þér innilega við stuðninginn, athyglisverðar pælingar um lýðræði frá framsóknarmanni en aftur takk frá Besta flokknum.

Kv Ágúst

[Óskar Arnórsson, 2.6.2010 kl. 10:06]

 Hroki og sjátrungsháttur er einkennadi fyrir atvinnupólitíkusa. Skemmd hugsun þeirra er með ólíkindum og lifa þeir eins og þeir séu fastir í leikriti. Þeir tala og haga sér eins og enskir aðalsmenn á Viktoríutímabilinu og er algjörlega fyrirmunað að skilja hvernig áhrif þeir hafa á aðra og er alveg sama um það líka. þetta er ákveðin kynslóð sem betur fer er að deyja út og engin mun sakna hennar neitt. Þetta fólk á það m.a. sameiginlegt að það lifir fyrir það eitt að gera öðru fólki óleik...

[Ómar Bjarki Kristjánsson, 2.6.2010 kl. 13:32]

Ok. nú hefur það sem BF sagði fyrir kosningar verið útskýrt í nokkrum viðtölum ma. í ruv í morgun varðandi Fjölskyldustefnuna.

Að sem sagt, að þetta áti hvorki að vera fyndið eða stefna.  Heldur, að manni skilst einna helst, svona háð á ríkjandi hugmyndir eða ástnd - ?

Td. að ættleiða róna - það var í raunnni ádeila á ástandið í málefnum útigangsmanna?  Og vekja ólk til umhugsunar líklega.

Það að setja konur í sér kaffihús og taka tal þeirra upp - það var háð eða ádeila á umræðuna í þeim málaflokki?  O.s.frv.

Mér finnst þetta veikt og hljóma eins og eftirá afsökun yfir vitleysisgangnum.   Og hver er þá stefnan í td. ofannefndum atriðum.  Eg er engu nær.  Er það bara súrrealískt túlkunaratriði eða?

Hver var þá punkturinn með isbjörninn í húsdýragarðinn?  Ádeila á aðbúnað húsdýra eða?  Ísbjörn er náttúlega ekki húsdýr svo.  Nei, eins og eg segi.  Maður spyr sig.

[Einhver Ágúst, 2.6.2010 kl. 13:55]

Nei en það er nú selur ekki heldur, svo fordæmin eru til staðar.

Ísbjörninn verður glæsilegt verkefni.....vittu til.

Kv Ágúst

[ThoR-E, 2.6.2010 kl. 14:29]

Spurning Ómar hvort verið sé að draga í land með fíflaganginn og menn orðnir virðulegir borgarfulltrúar núna ? ;) skyldi þó ekki vera.

Verður gaman að fylgjast með þessu.

[Óskar Arnórsson, 2.6.2010 kl. 18:09]

Jón Gnarr mun standa sig glæsilega miðað við þá sem hafa verið undarfarið í borgarstjórn. Hann var kosinn vegna þess að fíflagangur  "atvinnupólitíkusa" var orðin hættulegur. Svo þarf að loka þennan ísbjörn inn í Alþingishúsinu svo það verði nýjar Alþingiskosningar sem fyrst...

[Ragnar (IP-tala skráð) 2.6.2010 kl. 23:58]

Þetta er líklega í fyrsta sinn sem þjóðin verðskuldar ekki það sem hún kýs yfir sig. Síðustu árin hefur þjóðin kosið yfir sig fáráðlinga og geðsjúklinga úr eigin hópi og því er hrunið ekkert annað en verðskulduð táknmynd þeirrar vitfirringar.

Jón Gnarr á eftir að sanna sig, að öllum líkindum mun hann gera það og um leið gera þig og ýmsa aðra að ómerkingum.

Eitt er víst, Jón Gnarr ber ekki ábyrgð á skuldastöðu minni, það gera hins vegar þau Valgerður, Davíð, Halldór, Friðrik og margir fleiri...

Svona grjótkast úr glerhúsi framsóknarflokksins er ein af ástæðunum fyrir því að framsóknarflokkurinn er að nálgast eins-stafs prósentutölu. Enjoy.

[Brynjar Jóhannsson, 3.6.2010 kl. 08:27]

Það var engin að lítisvirða lýðræðið með aulahumor. Hið rétta er að margoft hefur lýðræðið verið lítisvirt með innihaldslausum loforðum sem enginn fótur er fyrir. Lýðræðið var ítrekað lítisvirt á síðasta kjörtímabili þar sem þrír meiri hlutar skiptust um völdin og verk þá drýgð sem voru verri enn nokkur brandari Jón Gnarrs fyrr eða síðar.

Bjórkælirinn tekinn úr sambandi til að losa sig við róna úr miðbænum er líkast til eftirminnilegasti brandarinn hann Villhjálms Villhjálmssonar.

Þrisvar sinnum skipt um borgarstjórnarmeiri hluti og með framgöngu Ólafs F Magnússyni náði lýðræðið algjörlega nýjum lægðum og á maðurinn þann vafa sama heiður að vera óvinsælasti borgarstjóri fyr eða síðar.

Jón snéri út úr poltískum lofyrðum og sannaði að keisarinn væri ekki í neinum fötum. Fólk vissi nákvæmlega hvað klukkan sló og þegar það var farið að hræða fólk með því að upphrópa þennan flokk sem flaggbera heimskunnar þá sló botnin endanlega úr þessum umræðum. Fólk vissi að núverandi politíkusar eru engu færari en það fólk sem er á þessum lista og fékk því nóg og kaus yfir sig þennan gæfulega meiri hlutia í staðin fyrir sama bullið aftur og ítrekað.

Ég get ekki lesið úr þessu annað en tapsárni og afneitun á því að fólk vill fá nýjar breytingar. Hvað kemur á daginn ? Dagur B Eggertsson vill einmitt fara í samstarf við þessa menn og er þegar farinn að tala um breytingar í politík.

Er það virkilega svo slæmt eftir allt saman. Því eitt er ljóst að hingað til hefur politíkin ekki verið upp á marga fiska.

Ég tek undir með þeim fyrstnefnda. Vínberin eru súr. 

[Rúnar Þór Þórarinsson, 4.6.2010 kl. 17:46]

Ég vona það Bjarni minn, þótt ekki sé vegna þess hve mikið álit hann karl faðir minn hefur á þér fyrir að segja af þér þingmennsku vegna siðferðisbrests (og þar með hreinsað mannorðið), að þú áttir þig á því að orðum þínum ætti með réttu að vera ÞVERÖFUGT farið.

Lýðræðið hefur verið fótum troðið og gert að athlægi á Íslandi löngu áður en BF kom fram. Þinn svokallaði "aulahúmor" er öllum ljóst að er ein mesta umbótatilraun sem fjöldinn hefur kallað eftir til handa lýðræðinu. Ekki er hægt að skamma Fjórflokkinn kyrfilegar en að velta honum af stalli og setja trúð í staðinn.

Trúð sem reyndar standa vonir til að sé betri gaur en margir halda.

Hugsaðu frekar um þetta sem rússneska rúllettu þar sem eitthvert hlutfall kúlnanna eru raunverulegar og aðrar eru miði til himnaríkis og að vilji fólks sé að taka fremur sénsinn á því en bullinu og vitleysunni í spilltu og getulausu liðinu sem er í stjórnmálum sem einhverri atvinnu.

Nú þarftu endilega að ná þessu Bjarni, hætta að horfa á þetta með þessum gleraugum sem þér var rétt af flokknum. Flokkarnir gömlu eru EKKI hið eina rétta. Þeir eru EKKi lýðræðið.

[sandkassi (IP-tala skráð) 4.6.2010 kl. 23:31]

Reyndar er Besti Flokkurinn hálfgerður Trójuhestur