Höftin, evran og leikvöllurinn

Frá því um hrun hafa gjaldeyrishöft verið við lýði á Íslandi. Með reglulegu millibili koma ESB sinnar og vinir þeirra laumu-esb-sinnarnir og reka upp mikið skaðræðisvein. Höftin séu áþján á þjóðinni, þau séu að drepa atvinnulífið. Vegna haftanna sé enginn hagvöxtur, engar erlendar fjárfestingar og allur leikvöllur kapítalismans ónýtur.

Almenningur hlustar á þetta og vorkennir vitaskuld vesalings mönnunum að geta ekki leikið sér með fjármagnstilfærslum og gjaldeyrisbraski. En óhagræði hins almenna borgara af gjaldeyrishöftunum eru ekki augljós. Við getum eftir sem áður ferðast út og með greiðslukorti eytt meiru en við höfum gott eða gaman af.

Þegar við svo berum saman tölur hér og í nágrannalöndum okkar þá dúkkar upp sú undarlega mynd að hagvöxtur og uppgangur á hafta-Íslandi er skömminni til skárri en í evrulöndunum í nágrenni okkar þar sem engin höft eru. Sum evrulandanna eru farin lóðbeint á hausinn og þurftu engin höft til. Þegar málið er skoðað ofan i kjölin kemur einmitt í ljós að höft hefðu getað bjargað þessum löndum.

Fyrir heimilin í landinu og almenna lántakendur hafa höftin bjargað miklu og tryggt hér meiri stöðugleika heldur en við gátum vonast til fyrst eftir hrun. Upphrópanir um höftin og hina hræðilegu krónu eru ekkert annað en tilraun til að fela það að evru-málstaðurinn um að Ísland verði að taka upp annan gjaldmiðil er löngu sigldur í strand.

Vitaskuld er endurreisnarstarfi eftir bankahrunið ekki lokið. Við þurfum næst að semja okkur frá snjóhengju aflandskrónanna sem er eðlilegast að gera með því að greiða krónur bara í krónum. Eftir það getum við smám saman losað um höftin en ættum um leið að taka upp alvarlega umræðu um það hvort við viljum galopna hagkerfið fyrir fjármálagangsterum eins og var hér frá gildistöku EES og allt fram að hruni.   

Athugasemdir

[Atli Harðarson (IP-tala skráð) 2.2.2013 kl. 12:39]

Það sem er eiginlega fyndnast við þennan hluta af garginu í fjölmiðlum er að sömu raddir og telja að höftin séu allt að drepa skammast líka út í einhverja frjálshyggju sem kvað hafa farið með flest til fjandans.

[Kolbrún Hilmars, 2.2.2013 kl. 17:58]

Almenningur verður ekki einu sinni var við að það séu gjaldeyrishöft.  Ferðagjaldeyrir er að vísu skammtaður, en fólk hefur enn kreditkortin fyrir allar umframþarfir.

Fyrirtæki í innflutningi greiða hindrunarlaust erlenda reikninga með bankamillifærslu á sama hátt og fyrir "hrun".

Er þar með ekki öllum eðlilegum þörfum landans fullnægt?

[Stefán (IP-tala skráð) 2.2.2013 kl. 19:08]

Gjaldeyrishöftin skaða þá sem eru ekki fastir inn í kassa.

Þó þau skaði ykkur ekki, þá merkir það ekki að þau skaði ekki aðra einstaklinga.

[Erla Magna Alexandersdóttir, 2.2.2013 kl. 20:49]

HVERJIR ERU ÞEIR SEM HAFA VANDRÆÐI AF ÞESSUM - ;GJALDEYRISHÖFTUM ?

 Eru það  þeir sem flytja inn vörur ?  Ekki er það almenningur ! Almennigur á ekki meir peninga en þarf fyrir sólarlandaferð- en - gæti verið að þeir sem vilja án eftirlits koma miljónum úr Landi hafi vandræði af þessu ?

   ÆÆ- svo slæmt !!

[Lúðvík Júlíusson, 2.2.2013 kl. 23:22]

Hverra hagsmuna ertu að gæta Bjarni?

http://www.visir.is/hagnast-um-66-prosent-a-kaupum-rikisbrefa-med-aflandskronum/article/2011628557058

http://www.ruv.is/frett/aflandsfelog-fjarfesta-a-islandi

[Lúðvík Júlíusson, 2.2.2013 kl. 23:23]

Eins og Kolbrún bendir á þá veit fólk ekki einu sinni af því hvernig er verið að sópa verðmætum í fang fárra auðmanna í gengum gjaldeyrishöftin.

[Anna Sigríður Guðmundsdóttir, 3.2.2013 kl. 01:10]

Ef ég væri á slitastjórnarlaunum, þá myndi ég kaupa allt sem væri búið til úr gulli, raða gersemunum hringinn í kringum líkamann, og skrá mig síðan um borð í næsta flug út úr landinu.

Síðan myndi ég selja gullið erlendis, og setja gróðann í skattfrjálst bankahólf.

Þetta er uppskriftin!

Eða, nei annars. 

Ég myndi líklega fá samviskubit, ef ég myndi fara á svona samfélagslega lágt siðblinduplan. Ég myndi ekki geta gert svona, enda er ég talin heimsk af sumum dollara/evru-frelsis-trúboðum "réttlætisins".

M.b.kv.

[Kolbrún Hilmars, 3.2.2013 kl. 10:57]

Eins og Lúðvík bendir á veit fólk almennt eðlilega ekki hvað er verið að bauka í skjóli gjaldeyrishafta.

En veit ríkisstjórnin það?

[Bjarni Harðarson, 3.2.2013 kl. 11:40]

Þetta innlegg Lúðvíks er allrar athyglisvert en ekki nýjar fréttir þó. Það er rétt að ákveðinn forréttindaaðall getur hagnast á þessum aðstæðum en það er samt lítið miðað við það sem sami aðall og miklu stærri hópur gat hagnast og baukað með skortsölum og gjaldeyrisbraski meðan leikvöllurinn var galopinn.

[Lúðvík Júlíusson, 3.2.2013 kl. 12:26]

Bjarni, ertu semsagt hlynntur því að heimila þessum aðilum að kaupa landið með aflandskrónum?

Hvers vegna ekki annað hvort banna það eða heimila öllum að gera það sama?

Ég skil ekki það fólk sem réttlætir ranglæti með öðru ranglæti, hvers vegna ekki bara gera hlutina rétt til að byrja með?

[Halldór Jónsson, 4.2.2013 kl. 18:51]

Man enginn eftir kommissjóninni sem var notuð í tíð fyrri gjaldeyrishafta?