ESB flokkurinn í lykilstöðu eftir kosningar

Um langt árabil hefur Sjálfstæðisflokkur haft heljartök á íslenskum stjórnmálum þar sem allir flokkar hafa komið að fótskör hans eftir kosningar og sagt, viltu vera memm. Nú bendir margt til að Samfylkingin verði í þessari stöðu á komandi kjörtímabili og geti þá valið þann sem best vill dansa í átt að ESB og fullveldisafsali. 

Ég fjalla meira um þetta í úttekt á flokkunum í nýrri grein á Smugunni um ESB klæki flokkanna.

http://www.smugan.is/pistlar/adsendar-greinar/nr/1117

Athugasemdir

[Jón Valur Jensson, 28.2.2009 kl. 14:06]

Þetta er að sjálfsögðu undir því komið, Bjarni, hvort þínu framboði og öðrum nýjum takist eða takist ekki að rjúfa eignarréttarsamstöðu stóru flokkanna um að halda sínum sínum heljartökum á kosningafyrirkomulaginu og yfirburðaaðstöðu sinni til að narra til sín kjósendur og hafa þannig full tök á Alþingi næstu fjögur árin.

5%-múrinn til að fá uppbótarþingmenn ... og annar múr, um 8–9% kjörfylgi í hverju kjördæmi, ásamt með hinni níðangurslegu skiptingu Reykjavíkur í tvö kjördæmi, eru aðal-ranglætis-vandinn við kosningafyrirkomulagið, en sá þriðji er ójafnt vægi atkvæða í þéttbýli og strjálbýli.

Hvað yfirburðaaðstöðu gömlu flokkanna varðar til að narra til sín kjósendur, þá felst hún einkum í á 4. hundrað milljóna króna sem Fimmflokkurinn fær úr vösum alls almennings (ójafnt þó, fer eftir stærð þeirra í þingmannafjölda frá kosningunum 2007), á meðan ný framboð fá ekkert! (nema eftir á, ef þau ná tilteknu lágmarki í kosningunum), og þar að auki eru þingflokkarnir fimm með 63 atvinnumenn í pólitík á háum launum (minnst 540.000+130.000 kr. á mán., líka þá mörgu mánuði sem þingið stendur ekki yfir!), en skv. Einari Mar Þórðarsyni í útvarpsþætti Hjálmars Sveinssonar rétt áðan munu nál. 80% núverandi þingmanna ætla sér að halda þingsæti sínu í kosningunum.

Þar fyrir utan eru gömlu flokkarnir með ríkulegar flokksskrifstofur og starfslið og tugi þúsunda manna á netfangaskrá, þannig að þeim gengur t.d. vel að fá sína 63 frambjóðendur + 63 varamenn á framboðslista + 30 til 40 sinnum fleiri meðmælendur (áskilda) heldur en þessa 63, þ.e. 1890 til 2520 manns yfir landið allt – sem er hins vegar þrautin þyngri fyrir glæný framboð að takast á við að fá eða safna saman. Forskotið og yfirburðirnir eru því hjá "the Establishment" eins og fyrri daginn, og þetta hefur Kerfið einnig tryggt sér með hinni ranglátu kosninga- og kjördæmaskipan, sem ég minntist á áðan. Hef ég skrifað ýtarlegar um þetta á eigin vefsíðum.

Það er til leið til að rjúfa þessa ranglátu yfirburðastöðu og forskot gömlu flokkanna, og það þarf að fara þá leið í stað þess að "fatta" þetta eftir á og fyllast gremju næstu fjögur árin vegna ólýðræðislegs stórbokka-kerfis og vegna þess hve við höfum verið heimsk að átta okkur ekki á þessu í tæka tíð.

Við ætlum að ræða þá leið, Bjarni.

[Jón Valur Jensson, 28.2.2009 kl. 14:23]

ÞRJÚ atriði enn, sem sýna, hvernig gömlu kerfisflokkarnir geta með bolabrögðum sínum reynt að tryggja sér endurkjör í fullum fyrri styrk:

1. Framboðin fá ójafnan tíma í Sjónvarpi til að kynna stefnu sína – flokkarnir með þingstyrk fá mun meiri tíma en hinir. Þetta forskot er þvílíkt, að það ætti a.m.k. ekki að bæta því ofan á að níðast á nýjum framboðum með ranglátum kosningareglum, sem geta auðveldlega látið atkvæði 15–20.000 manna í 3–4 flokkum falla dauð og ómerk.

2. Fjölmiðlar/dagblöð segja nú ójafnt fréttir af framboðunum og birtu t.d. engar fréttatilkynningar frá Borgarahreyfingunni um fundi hennar á fimmtudag né fréttir af honum, sbr. þessa vefgrein varaformanns Borgarahreyfingarinnar.

3. Skoðanakannanir, gjarnan kostaðar eða framkvæmdar af fjölmiðlum, hafa ekki boðið upp á að nefna nein ný framboð. En í þeim könnunum síðan í nóvember hafa þó tæpl. 40% til rúml. 50% aðspurðra ekki viljað svara! Þar í, meðal annars, liggur von þín, Bjarni.