Krikketmót og fjórhjólaferð og guðdómlegur seinþroski...

Í gær efndi frú Elín til pulsuveislu og krikketmóts hér á Sólbakkanum og var sigurvegari mótsins jafnframt sá yngsti, Kjartan Tómasson sem keppti í liði með móður sinni, Barböru Gunnlaugsdóttur.

 

Á myndinni eru f.v. Elín, Gunnlaugur eldri í baksýn, Kristín, Gunnlaugur yngri, Helga, Valgerður, Barbara, Tómas og Kjartan.

Af öðrum tíðindum má nefna að í síðustu viku fórum við Egill í fjórhjólaferð um fjöll og firnindi Úthlíðar og Laugdæla ásamt Magnúsi Skúlasyni í Hveratúni sem segir nánar frá ferðalagi þessu og birtir á bloggsíðu sinni kvikmynd af undirrituðum, auk annarra mynda. En hér að neðan er mynd af Agli á fáknum í Úthlíðarhrauni og ég aftar en á þeirri neðstu Magnús við Kawasaki fák sinn í Lambahrauni.

 

Jú og að síðustu úr því að ég er farinn að segja fréttir úr heimahögum þá er Elín á förum til Parísar og verður þar í tvo mánuði í listamannaíbúð við tónsmíðar. Það verður langur grasekkilsdómur. Hún fer á föstudag en þann sama dag þarf ég að skrýðast kjólfötum til heiðurs Ólafi Ragnari.

Milli fundahalda og margskonar anna er ég að lesa frumútgáfuna af Tómasi Jónssyni metsölubók sem ég fann hér í bókaragi. Hef held ég tvisvar byrjað á þessari bók áður, síðast fyrir 15 árum en hafði þá ekki þroska til að botna neitt í svo furðulegri bók og henti henni frá mér. Nú er þetta frábær lesning og ekki eina dæmið um að ég standi sjálfan mig að því að vera guðdómlega seinþroska...

Athugasemdir

[Eyþór Árnason, 29.7.2008 kl. 22:46]

Ég er greinilega seinþroska líka því ég hef ekki enn haft mig í gegnum Tómas Jónsson. Kveðja

[Kristín Gísladóttir (IP-tala skráð) 1.8.2008 kl. 11:52]

Þú verður flottur í kjólfötunum.

[Hafliði (IP-tala skráð) 6.8.2008 kl. 10:57]

Hér mun fólkið vera að spila krokket.