Davíðshús - tólf stig

Ég hef oftast misst af júróvísjón en minnir samt að tólf stig séu þar fullt hús stiga. Davíðshús á Akureyri fær tólf stig. Hér er afar gott að vera, gott að skrifa og bærinn er einstaklega þægilegur. Mátuleg heimsborg fyrir Flóamann, í þessum höfuðstað er allt og samt ekki of af neinu. Eymundsson, fornbókabúðin hjá Olgu og Amtsbókasafnið. Hvað þarf maður meira? Jú, Bautinn ef maður nennir ekki að sjóða hrossaket heima hjá sér.

En allir draumar taka enda og í dag er heimfarardagur. Friðrik Olgeirsson segir frá því í ævisögu Davíðs að hann hafi tekið höfðinglega á móti gestum en hellti samt ekki upp á könnuna enda var það kvenmannsverk og hann konulaus, hvunndags allavega. Þess í stað bauð hann gestum upp á gos, viskí og tóbak.

En heimur versnandi fer. Ég þarf nú að enda mína sæluviku hér í norðrinu á að skúra! Hvað hefði Davíð gert í mínum sporum? 

Smá ESB lýðræði ...

ESB og lýðræðið eru andstæður. 

Það að Sarkozy lofi að það verði kosið um ESB sáttmála eru nú talin svik við hinar ESB þjóðirnar. Síðast þegar Frakkar fengu að kjósa um eitthvað tengt ESB þá felldu þeir nýja stjórnarskrá sambandsins. Kosningin var svo ógilt með því að skipta um nafn á plagginu og kalla það Lissabon sáttmála.  

Sarkozy lofar þjóðaratkvæði

Skemmtanagildi

Þegar á það var bent í ársbyrjun að Hreyfingin hefði gengið til liðs við ríkisstjórnina og verði hana nú falli þá þrætti Þór Saari fyrir það og hafði uppi stór orð um þá vondu menn sem héldu slíku fram.

Nú segist Þór aftur á móti ætla að hætta að styðja stjórnina nema gengið verði að nýjum skilyrðum.  Það er skrýtið að ætla að hætta að gera eitthvað sem maður hefur aldrei gert.

Það eru menn eins og Þór Saari sem gefa fréttatímunum skemmtanagildi. 

Tilbúnir að styðja vantraust

Við Mensalder ...

Við Mensalder erum á Akureyri. Það er nautnalega gott að sitja hér í höfuðstað Norðurlands við skriftir. Elín var með mér hérna fyrstu dagana, svona meðan ég var í aðlögun og við gengum á beitarhúsin í Vaglaskógi á afmælisdaginn hennar. Svo flaug hún suður og ég er hér einn eftir, einn með Mensa. 

Mensi hét fullu nafni Mensalder Raben Mensaldersson og var bóndi í Húsum í Ásahreppi. Ég er þessa dagana að leggja lokahönd á skáldævisögu um þennan fátæka 20. aldar bónda og konurnar í lífi hans. Þetta er semsagt ástasaga, eldheit ástasaga úr íslenskri sveit af konunum sem bitust um hann, konunni sem hélt í hann og konunni sem beið eftir sínum Mensalder.

Við þessir venjulegu eiginmenn og eitt sinn unnustar getum aldrei látið okkur dreyma um að komast með tærnar í sporin hans Mensa í Húsum.  

Vitleysa ...

Þessi niðurstaða Landsdóms er vitaskuld bara vitleysa. Auðvitað mátti alveg sakfella Geir og ég held að það hafi einmitt átt að sakfella hann fyrir margra ára meðvirkni með glæpsamlegu fjármálakerfi og ennfremur fyrir þátt í að koma því upp. Þar skiptir engu máli hvort einhverjir aðrir hafi átt þar stærri þátt í að koma svikamyllunni upp. Í réttarríkinu gildir að hver maður er ákærður fyrir það sem hann gerir og þó að aðrir sleppi þá eru þeir sem nást jafnsekir.

En þetta Landsdómsmál var allt orðið útþynnt og vitleysislegt. Að sakfella Geir fyrir að ræða ekki á fundi það sem allir voru að ræða allan daginn og alla daga, það er bara barnalegt. 

Hvað þá með Björgvin og Ingibjörgu miðað við þessa niðurstöðu?

Sigur Breiviks

Fréttastofur og netmiðlar flytja okkur nokkra tugi frétta af Breivik á degi hverjum, við vitum orðið meira um hugsunarhátt hans en flestra annarra. Þó að ég sé farinn að slökkva þá situr eitt og annað eftir. Ég man ekki eftir sambærilegum ofur-fréttum af réttarhöldum yfir öðrum hryðjuverkamönnum á Vesturlöndum. Reyndar man ég ekki nafn á neinum einasta sem tók þátt í árásunum á Spáni, NY 9/11 eða öðrum sambærilegum illvirkjum. En nafn Breiviks verður uppi löngu eftir að Hamsun og Bruntland verða gleymd.

Það er eitthvað að í okkar Skandinavísku veröld að þessu auðvirðilega og geðsjúka illmenni skuli tryggður svo sætur sigur.

„Ég er ekki geðveikur“

Mótsögn í ESB skruminu

Það getur ekki orðið til samningur um ESB aðild nema til sé orðið plagg sem báðir viðsemjendur eru sáttir við og mæli með að verði að veruleika. Annað er ekki samningur, hvorki í lagalegum skilningi né heldur út frá almennum málskilningi.

Það þýðir að ríkisstjórn Íslands hlýtur þá að ætla að mæla með aðild samkvæmt samningi sem fyrir liggur. 

Nú hefur hluti ríkisstjórnarinnar lýst því yfir að hún sé á móti ESB aðild. Sé þeim ráðherrum alvara þá geta þeir aldrei mælt með samningi sem gengur út á að Ísland gangi í ESB. 

Þar með gerist hið augljósa, ef ríkisstjórnin er ekki sammála um að ganga í ESB þá getur hún ekki gert samning um það og málið strandar.

Nema það sé eitthvert skrök hér á ferðinni, hinir meintu andstæðingar innan ríkisstjórnarinnar séu það ekki endilega eða sú það bara í plati. Getur það verið?

Alþingi taki ákvörðun um samninginn

Rangt hjá formanninum

Ástkær leiðtogi okkar vinstri manna olli mörgum okkar vonbrigðum í gær. Tilefnið var umræða ESB aðildarferlið og minnt var á að Steingrímur hefði sjálfur haft orð á því sumarið 2009 að til þess gæti komið að ferlið sýndi það að ekki yrði staðið við fyrirvara Íslands og þá ætti að standa upp og slíta viðræðunum. En nei, sami Steingrímur sagði í gær:

"...Ég sé ekki að í neinu tilviki hafi nokkrum tekist að færa fram sönnur um að í einu eða neinu hafi verið hvikað frá því að standa vörð um þá grundvallarhagsmuni sem skilgreindir voru hér vorið 2009. Og á meðan svo er ekki að þá hafa menn lítið efni í sín upphlaup hér um þessi mál."

Nú er vitaskuld ekki hægt að ætlast til að formaður VG lesi Morgunblaðið en allmargir hafa orðið til að vitna í skrif Guðrúnar Hálfdánardóttur blaðamanns þar um ræðu Kolbeins Árnasonar um ESB viðræðurnar. Kolbeinn er ekki bara maður úti í bæ heldur formaður samningahóps Íslands í viðræðum okkar um sjávarútvegsmál í aðildarviðræðunum. Hann benti á það á fundi hjá Viðskiptaráði í nóvember síðastliðnum að Ísland gætu ekki haldið forræði sínu yfir deilistofnum og erlendum útgerðum verður við aðild heimilt að kaupa upp íslensk útgerðarfyrirtæki.

Það er því einfaldlega rangt hjá formanni VG að engum hafi tekist að færa sönnur á neitt í þessu efni. Þegar formaður íslenska samningahópsins um sjávarútveg gefur yfirlýsingar sem þessar er ljóst að samninganefndin ætlar ekki að halda fram þeim kröfum sem eru þó skýrar í þeim skilgreiningum og umboði sem Alþingi gaf samninganefndinni með ályktun sinni 16. júlí 2009.

Samninganefnd Íslands er komin út fyrir það umboð sem Alþingi gaf og þeir VG þingmenn sem styðja umsóknina hafa vitaskuld ekkert umboð til þess frá sínum kjósendum.

(Skreytnin hér í upphafi greinar að kalla formann VG ástkæran er alveg merkingarlaust og bara bókmenntaleg áhrif frá síðasta bloggi sem fjallaði um ástarrómana sem eru miklu skemmtilegri en ESB karp.)

Ástarrómanar og fleiri rómanar

Með harðfylgi tókst mér að losna úr þeim viðjum að lesa eingöngu 19. aldar ástarrómana á borð við Kapítólu og Einþykku stúlkuna og snöri mér að bókmenntunum!

Las þessvegna Oddnýju Ævarsdóttur og Jón Kalman en hvort sem það sat svona mikið eftir mér af fyrri lestri eða annað þá urðu þetta líka að ástarrómönum, vellulegum en velskrifuðum vísindum um heilastarfsemi á hormónaskeiði. Hjarta mannsins er nautnalega vel skrifuð en endar einmitt í dulítið óraunsæislegum og reifarakenndu keleríi þar sem fólk kýs frekar að vera nakið en í blautum fötum í lífshættulegum kulda.

Þeir sem reynt hafa vita að það er mikið betra að vera í blautum fötum en engum.

Kátleg mynd af meintum andstæðingum

...
Öðrum þræði er það kátleg mynd að þeir sem segjast vera hvað mest á móti ESB aðild vilji að ESB lestin fari sem hraðast. Í hinu margbrotna og flókna aðlögunarferli ESB er nefnilega ekkert sem heitir bara að kíkja og sjá, það verður að gera og græja um leið, svo notað sé götumál. Aðeins með aðlögun eins og þeirri sem farið er fram á í landbúnaði núna, fá Íslendingar að „vita" hvað er í ESB pakkanum. Reyndar er þetta með að sjá ofan í pakkana svoldið eins og að horfa ofan í pappakassa í myrkri því enginn veit hvaða áhrif hafi þau ókjör af reglufári sem við blasa.

Sjá nánar á Vinstri vaktinni, http://vinstrivaktin.blog.is/blog/vinstrivaktin/entry/1233723/