Sveinn í Bræðratungu og vikan sem var...

Vikan hefur verið góð ef frá eru talin þau sorglegu tíðindi á miðvikudagsmorgni að Sveinn Skúlason bóndi í Bræðratungu hefði kvatt þá um nóttina. Tengdapabbi hringdi í Elínu og sagði henni frá láti bróður síns. Ég var í þeim töluðu orðum að leggja lokahönd á að senda Sunnlenska í prentun en í því var stutt viðtal við Svein sem Sigurður Sigmundsson hafði tekið. Sveinn hefur verið við hestaheilsu og var að taka fé í hús eftir riðuhreinsun. Andlát hans bar því brátt að þó karlinn hafi verið á áttugasta aldursári. Ég kippti viðtalinu út á síðustu stundu, þó með hálfum huga því það var gott og líflegt. En vitaskuld ekki viðeigandi.

Það mikil eftirsjá í Sveini í Bræðratungu. Hann var hafsjór að fróðleik og fyrir mér íslenskastur alls sem íslenskt er. Stóð traustum fótum í sögunni og þeirri menningu sem hann var fæddur inn í. Tengsl hans við þessa menningu og landið byggði ekki bara á hans eigin ævi heldur var honum sem opin bók og hluti af sjálfsvitundinni öll saga síns fólks. Jonsena, Thorarensena og Austfirskra búhölda. Og samt laus við að miklast af þessum uppruna sínum. Ég læt hér fylgja með mynd af Sveini sem tekin var í fermingarveislu Gunnlaugs, yngsta stráksins hér á Sólbakka síðastliðið vor, ljósmyndari er held ég Egill sonur minn.

En að öðru leyti hefur vikan semsagt verið góð og það fylgdi því vellíðan að sækja gamla rauð á verkstæðið hjá Péturssonum áðan. Það lýsir kannski ákveðinni perversjón en samband mitt við þennan ameríska húsbíl er líkast ástarsambandi. Við möluðum saman út Austurveginn í bláum reyk og mátti ekki milli sjá hvor var hamingjusamari. Kannski líka hluti af nægjusemi hinna gráu hára.

Sunnlenska er nú í mikilli endurreisn eftir krísu sem óneitanlega skapaðist við burtför Kristjáns J. Kristjánssonar. Héldum öflugan ritstjórnarfund í gærkvöldi og á næstu dögum verður tilkynnt um framtíðar ritstjóra og fleira skemmtilegt.

Athugasemdir

[Ásdís Sigurðardóttir, 16.3.2007 kl. 15:53]

Ég kynntist honum líttillega í gegnum pólutíkina og fannst hann bæði skemmtilegur og góður maður.  Blessuð sé minning hans

[óskilgreindur, 18.3.2007 kl. 22:28]

Þetta var þungur og erfiður lestur að lesa þessa blogfrétt hjá þér bjarni - ég hafði ekki frétt þetta áður, enda búsettur erlendis - hef líklega aldrei tárast við lestur moggablogs áður enda ekki tilefni til - en nú er tilefni til, einn af máttarstólpum okkar tungnamanna farinn - blessuð sé minning hans.