Fáum við ESB útaf borðinu!?

Fjölmargir ESB andstæðingar hafa kokgleypt þá hugmynd að með einföldum aðildarviðræðum við ESB og síðan kosningum þar sem þjóðin hafnar aðild séum við að vinna pólitískri umræðu í landinu þann ómetanlega greiða að fá málið út af borðinu.

Gegn þessu eru óteljandi rök:

- ESB er aldrei út af borðinu, það er ekki reynsla Norðmanna þar sem ESB-sinnar eru sífellt að efna til ófriðar um málið þó kosið hafi verið tvisvar og sama er að segja úr Svíaveldi þar sem naumur meirihluti ESB-sinna sigraði aðildarkosningar.  Fullveldisbarátta smáþjóða er eins og mannréttindabarátta og önnur pólitík ævarandi barátta við heimsku og fordóma.

- Við getum ekki farið í aðildarviðræður nema meirihluti þings og ríkisstjórnin vilji í aðild. 

- Við getum ekki reiknað með að kosning um aðildarsamning verði kosning um aðild eða óbreytt ástand. ESB er ófeimið við að beita þrýstingi og því miður vafamál að Ísland hafi samningsstöðu til að segja nei ef landið sest að samningaborði. Við getum með aðildarumsókn hrint af stað atburðarás sem stórskaðar okkar samninga við ESB löndin eins og þeir eru í dag - og eru samt ekki of góðir.

-  ESB yfirráðastefnan er landvinningastríð. Ísland er gómsætur biti með auðlindir á við milljónaþjóð og skuldir sem eru ekkert miðað við auðlindirnar. ESB mun búa til "tilboð" sem er ekki hægt að hafna og taka það svo allt til baka á næstu árum þegar ríkjabandalagið þróast yfir í ríki! 

- Ísland getur hæglega breyst í afskekktan útkjálka. Öll hagkerfi hafa tilhneigingu til að draga fé, fólk og völd að einum miðlægum punkti. ESB er þar engin undantekning og sá miðpunktur verður álíka fjarlægur Raufarhöfn og Reykjavík...

 

Athugasemdir

[Gunnlaugur Ingvarsson (IP-tala skráð) 13.5.2009 kl. 10:25]

Auðvitað hefði verið langsamlega lýðræðislegast að hleypa þjóðinni sem fyrst að ákvarðanaferlinu um ESB málið með beinni þjóðaratkvæðagreiðslu.

Vegna þess að það hefur aldrei verið kosið neitt um ESB eða - EKKI ESB.

En gott og vel ef það er þingmeirhluti nú fyrir því að hefja aðildarviðræður þá væri ágætt að þessi meirhluti þingsins kæmi sér saman um hvernig standa ætti að þeim viðræðum og hvaða skilyrði og samningsmarkmið þjóðin ætti að setja sér í þeim viðræðum

Síðan ætti þjóðin auðvitað að fá að kjósa um það og þessi samningsmarkmið og hvort leyfa ætti stjórnvöldum að sækja formlega um ESB aðild og síðan fara í aðildarviðræður á grundvelli samningsmarkmiðana.

Nei þessa lýðræðiislegu leið meiga ESB sinnar ekki heyra á minnst þrátt fyrir allt gasprið þeirra um lýðræði og að þjóðin eigi að fá að segja álit sitt.

Þeirra hernaðaáætlun gengur útá það að fara strax og með hraði í aðildarviðræður við ESB og strax verði búið svo um hnúta að ESB komi með stórt Evru lán til handa okkur Íslendingum, til að styrkja gengið verður það látið heita, en jafnframt verður gengi krónunnar strax fastsett við EVRU. Síðan verður haldið áfram með samningaviðræðurnar.

Þetta hafa sumir af æstustu ESB aðdáendunum beinlínis sagt berum orðum.

Það á semsagt að beita sama skítabragðinu og myrkrahöfðingar og landráðahyski allra landa hefur svo oft beitt við svona aðstæður.

Það á semsagt að klyfja skrautbúinn ASNA af gulli og gersemum og senda hann frá Brussel yfir hafið og inn fyrir landamæri Íslands.

Þar mun ESB fjölmiðlaelítan svo sjá um að kynna asnann af sínu víðkunna hlutleysi og í Silfri Egils verður Asninn eflaust gegnum lýstur og launaðir Evrópusérfræðingar Evrópusetranna eins og Eiríkur Bergmann með sín fræðilegu gleraugu munu segja okkur að lílega leynist enn meira af gulli og dementum inni í iðrum ESB- Asnans.

Síðan þegar asninn verður búinn að spranga og hrista sig um íslenska grund og heiðar um stund þá munum við þjóðin loksins allra náðasamlegast fá að að kjósa: UM ESB GULL- ASNANN ! 

[Hilmar Gunnlaugsson, 13.5.2009 kl. 10:53]

Það er ekkert óeðlilegt við það að kosið sé um sambandið oftar en einu sinni en þá með löngu millibili.

[Kommentarinn, 13.5.2009 kl. 11:14]

Fyndið að þú skulir segja að ísland geti "breyst" í afskekktan útkjálka! Hvar hefur þú eiginlega verið? Hefuru litið á heimskort! 

[Haraldur Baldursson, 13.5.2009 kl. 11:21]

Þetta er hættulegt ferli og við gærum lent undir af þeim sökum einum að raunmarkmið ESB er ekki endilega fiskurinn, heldur olían...meira hér.

[Offari, 13.5.2009 kl. 11:25]

Ég tel að aðildarviðræður muni ekki auka trú annara þjóða á okkur. Ég tel að aðildarviðræður muni ekki styrkja okkar krónu þegar hagkvæmara er fyrir Evrópu að yfirtaka Ísland á veiku gengi.

Ég tel að Ísland missi fæðuöryggið ef við göngum í Esb.  Nei takk ég vill ekki skoða hvað er inn í þessum pakka. Ríkisstjórnin ætlar að hefja aðildarviðræður í júlí en það furðulega er að samkæmt þeim upplýsingum sem ég hef fengið er ekki öll ríkistjórnin fylgjand aðildarviðræðum.

Hvar ætlar ríkisstjórnin að sækja þingmeirihlutan? Verður kosningin opin fáum við að vita hvaða þingmenn eru tilbúnir að fórna okkar lýðræði?

[Haukur Nikulásson, 13.5.2009 kl. 11:56]

Það verður erfitt að eiga við seiglu og fjármagn ESB. Þeir gefast ekki auðveldlega upp og ætla sér að klára þessa innlimun með öllum ráðum bæði gylliboðum um styrki, betra líf og meira sólskin! Í ofanálag eru þeir með launaða landráðamenn í skólakerfinu þar sem innrætingin um dásemdir ESB er unnin á fullu.

Ágæt samantekt hjá þér Bjarni.

[Gunnlaugur Ingvarsson (IP-tala skráð) 13.5.2009 kl. 13:21]

Það er líka rétt hjá þér að þessu ESB trúboði verður ekki auðveldlega sópað útaf borðinu þó svo að við ESB andstæðingar myndum sigra í þjóðaratkvæðagreiðslu um málið.

Það mun enginn friður verða fyrir þessum trúboðum líkt og öðrum sannfærðum trúboðum heimsins sem telja sig hafa fundið hinn eina sanná STÓRA SANNLEIKA LÍFSINS. 

Það kom glöggt fram hjá Árna Páli Árnasyni ESB yfirtrúboða Samfylkingarinnar þegar hann tjáði sig um málið um daginn, þegar hann sagði að mjög mikilvægt væri að vel og vandlega yrði faið í þessar aðildarviðræður. Það væri ekki síður mikilvægt fyrir okkur andstæðinga ESB aðildar því að ef þetta yrði fellt þá væri það bara til merkis um það að ekki hefði verið staðið nógu vel að verki og því myndu þeir ESB sinnar fara strax aftur í það að undirbúa aðra atlögu.

Það getur nefnilega alls ekki verið að þeir geti haft rangt fyrir sér.

[Tómas Ibsen Halldórsson, 13.5.2009 kl. 13:35]

Eina leiðin til að þjóðin fái frið frá ESB-trúboðinu er að leggja Sandfylkinguna niður.  Það verður að koma Sandfylkingunni frá völdum og halda henni sem lengst frá ráðherrastólunum, þá er von til þess að friður náist frá ESB-elítunni, ekki fyrr.

[Kolbrún Hilmars, 13.5.2009 kl. 16:41]

Að sjálfsögðu á að slá ESB aðildarviðræður út af borðinu.  Okkur liggur ekkert á,  því ESB aðild myndi hvort sem er ekki bjarga neinum af þeim "innanhússmálum" sem þjóðin þarf að leysa nú og næstu árin. 

[Páll A. Þorgeirsson (IP-tala skráð) 13.5.2009 kl. 16:49]

Hlustum á þjóðina, og sættum okkur við það sem meirihutinn velur.  Þannig virkar lýðræðið.

sýnishorn af vilja þjóðarinnar  varla stendur ESB á bak við þessa lista 

Fjöldi skráðra 13.5.09.  kl. 16,39,08

sammala.is         14.925

osammala.is         4.974

[Kolbrún Hilmars, 13.5.2009 kl. 17:04]

Ágæti Páll, ég myndi ekki flagga þessum tölum í þínum sporum.

ESB flokkurinn fékk 55.758 atkvæði í nýafstöðnum kosningum, allir hinir flokkarnir 131.422.  Vissulega eru sumir hinna síðartöldu fylgjandi  ESB aðild, en fyrr má nú vera að lýsa því yfir að einhverjar netsíður hafi uppgötvað sannleikann.

[Ragnhildur Kolka, 13.5.2009 kl. 17:42]

Bjarni, það er tálsýn að ætla ESB umræðunni að deyja út við það eitt að hafna aðild í atkvæðagreiðslu. Hvergi hefur það gerst og þrátt fyrir yfirlýsingar um annað  hafa menn hvergi getað kosið sig út aftur. Kerfið er svo alltumlykjandi  að þegar þjóð er einu sinni kominn inn er hún föst í netinu og losnarðu ekki aftur. Samþykki er eina svarið sem Brusselvaldið tekur mark á og  ef minnsti vafi leikur á vilja þjóðar, þá er hræðsluáróðursherferð hrundið af stað.

ESB stendur nú frammi fyrir því að Íhaldsmenn vinni stórsigur til Evrópuþingsins og Cameron sem er ESB-efasemdamaður hefur lofað að taka Lissabonmálið upp að nýju komist hann til valda.  Merkel sendi honum nýlega þá kveðju að "Þýskaland og Frakkland knýja Evrópuvélina áfram og þau muni ekki vera samvinnufús þeim sem andsnúnir eru Lissabon samningnum". Þetta verður ekki skilið sem annað en hótun og ágæt áminning til okkar sem erum u.þ.b. 60 milljónum færri en Bretar.

Ástæðan fyrir yfirlýsingu Camerons er að stór hluti Breta er tilbúinn að láta reyna á ýmis mál sem angrað hafa þá vegna þátttöku sinnar í Evrópusamstarfinu. Breska þjóðin hefur aldrei samþykkt að afhenda Brussel allt það vald sem í Lissabonsáttmálanum felst. En eins og menn muna sveik Verkamannaflokkurinn loforð við kjósendur og brá Gordon Brown sér í skjóli nætur til Lissabon til að setja stafina sína undir sáttmálann. 

Ekkert stoppar ferð ESB-hraðlestarinnar og við erum að sjá að þrátt fyrir að Írar hafi ekki enn gefið sitt þvingaða "samþykki", þá er undirbúningur vegna gildistöku Lissabonsáttmálans kominn á fullt skrið.

ESB er bæði löng og ljót saga um svik við lýðræði og kjósendur.

[Hans Haraldsson (IP-tala skráð) 13.5.2009 kl. 19:42]

Hér gilda leikreglur evrópsks lýðræðis. Í evrópsku lýðræði tekur almenningur ekki ákvarðanir heldur samþykkir þær - fyrr eða síðar.

Ef hann samþykkir ekki í fyrstu atrennu þarf að kjósa aftur og aftur þangað til samþykki næst. Þegar hann svo kýs rétt er ekki kosið meir.

Það er alls ekki sanngjarnt að gagnrýna fullveldissinna fyrir að standa á bremsunni í þessu máli. Ef ESB-sinnar fengju sínu fram yrði kosið um málið annað hvert kjörtímabil þangað til rétt niðurstaða fengist og svo aldrei aftur.

[Gunnlaugur Ingvarsson (IP-tala skráð) 13.5.2009 kl. 20:09]

Hans Haraldsson lýsir mjög vel þessari sýndarmennsku og pappakassa lýðræði sem ESB hefur innleitt með vaxandi þunga á sínu yfirráðasvæði.

Bráðum mun einhver embættisnefndin komast að því að almennar kosningar séu með öllu óþarfar og gamaldags afgreiðsla á yfirráðasvæði ESB.

Vegna hvers spyrjum við ?

Jú vegna þess að allar fínu ESB nefndirnar og kómmízara-ráðin með doðrantana sína og flottu tilskipinarnar geti nú með yfirburða sérfræðiþekkingu sinni og uppsafnaðri reynslu haft vit fyrir okkur þegnunum á öllum sviðum mannlegs samfélags !

Það styttist óðfluga í þessa einstöku tilskipun frá sjálfri framkvæmdastjórninni !

[Hjörtur J. Guðmundsson, 13.5.2009 kl. 21:17]

Páll A. Þorgeirsson er fyndinn. Undirskriftasöfnunin Sammála.is hefur verið í gangi síðan 22. marz sl. eða í eða verða 2 mánuð. Hún hefur verið auglýst í fjölmiðlum fyrir milljónir króna. Söfnunin á Ósammála.is hefur verið í gangi síðan 22. apríl sl. (mánuði eftir hina söfnunina), hún hefur hvergi verið auglýst í fjölmiðlum og ekkert hefur verið kostað til við hana nema að koma síðunni upp. Finnst Páli þetta sambærilegt?

[Páll A. Þorgeirsson (IP-tala skráð) 13.5.2009 kl. 23:50]

Ágæta Kolbrún og Hjörtur J. Guðmundsson.

Ósköp erum við viðkvæm, ég var bara að benda á "sýnishorn" af tölum  

[Kolbrún Hilmars, 14.5.2009 kl. 00:26]

Sæll aftur ágæti Páll.   Þú skrifaðir sjálfur þessi orð:  "Hlustum á þjóðina, og sættum okkur við það sem meirihutinn velur.  Þannig virkar lýðræðið."

Ég biðst afsökunar á viðkvæmni minni, en verð að játa að ég ber litla virðingu fyrir marklausum sýnishornum, jafnvel þótt þau séu framreidd í tölulegu formi.  Hvað þú meinar með með lýðræði í þessu samhengi, áttu þó enn eftir að útskýra.

[Ásgeir Rúnar Helgason, 14.5.2009 kl. 09:46]

Sæll Bjarni!

Auðvita er heilmikið til í þessu sem þú ert að segja. Ég var einn af þeim sem hvöttu til þess strax í upphafi að málið yrði sett í sér farveg innan Alþingis til að "fá það útaf borðinu" í stjórnarmyndunarviðræðunum. En auðvita mun þetta mál aldrei hverfa af borðinu meðan til er ein manneskja á landinu sem vill að Ísland gangi í þetta bandalag.

Auðvita er alltaf hætta á því að lítill meirihluti þjóðarinnar sé hlynntur aðild á ákveðnu augnabliki, eins og nú þegar búið er að keyra hér allt í botn. Ekki síst í ljósi þess að ESBé (EU) sinnar virðast hafa mikinn og greiðan aðgang að auglýsingafjármagni og fjölmiðlum.

En við skulum bíða og sjá, það er nefnilega alls ekkert víst að farið verði í þessar aðildarviðræður!

Hvað varðar þessa undirskriftalista "Sammála" vs. "Ósammála" þá mun ég seint skrifa undir lista sem ber yfirskriftina "Ósammála" þó ég sé innilega sammála því að Íslandi sé best borgið til framtíðar sem fullvalda sjálfstæðri einingu milli tveggja efnahagsrisa.

Látum ekki ESBé (EU) sinna stela frá okkur jákvæðninni. Þeim tókst það í Svíþjóð og ég er viss um að það hafði neikvæð áhrif fyrir þá sem voru fylgjandi því að Svíþjóð stæði utanvið EU.

Þegar valið stendur milli "JÁ" og "NEI" er létt að prófílera "Nei-segjara" sem neikvæða vælupúka sem vilja bara stöðnun og "Já-segjara" sem framsækna jákvæða framtíðarsinna. Í kreppu er líklegt að sumt fólk velji frekar "Já" en "Nei" óháð því um hvað málið snýst. Þannig var hugsun EU sinna í sænsku EU kosningunum og þeir sem voru hlynntir því að Svíþjóð stæði utanvið EU féllu beint í gildruna. Því miður!

Ef við eigum að setja í gang undirskriftalista þá á hann að vera með jákvæðum formerkjum t.d. "Fylgjandi - fullveldi Íslands milli efnahagsbandalaga" eða eitthvað í þeim dúr.