Mynd af fátækt og ríkidæmi

 

 

 

Á degi eins og þessum þegar  hvur maður á síns föður að hefna á versunni og má varla milli sjá af hvoru er meira heimskunni eða rigningunni er langsamlega best og skemmtilegast að blogga um langömmu sína sem stendur hér eins og bedvínaforingi í hópi síns fólks austur á Fáskrúðsfirði fyrir meira en hálfri öld síðan og kerlingarnar báðar tvær í stóískri ró þess sem vel veit að þetta fer einhvernveginn og ef illa þá allavega ekki verr en það en Kiddi frændi lítur prakkaralega framan í veröldina eins og það sé hann sem hafi laumast til að kroppa ofan í miðbikið á myndinni þannig að nú sér enginn hvað Kristbjörg systir hans er að hugsa þennan dag og týnt það andlitið sem fríðast var í þessu litla samkvæmi enda stúlkan sú kannski of skynsöm til að vera nokkuð að bæta hugsunum inn í þessa mynd sem kemur til okkar nú á tímum þegar menn hafa hugsað í hringi og halda að við séum fátæk í ríkidæminu rétt eins og þessar konur sem vissu sig ríkar í fátæktinni en samt voru þær báðar, Sjana hans Sjönu Björns sem er hér til hægri og langamma mín Setta allra kerlinga fátækastar í litlu fátæku plássi og máttu stundum éta slepjað saltket á útmánuðum en vonda soðningu um sumarmál og enginn kvartaði

Athugasemdir

[Ragnhildur Kolka, 11.5.2009 kl. 23:35]

Gaman að þessu. Ekki hafa þær verið fátækari en svo að hafa getað aurað saman í þessa myndatöku. Það er enginn kotungssvipur á þessum konum eins og þú segir og Kiddi frændi er bara nokkuð roggin með sig. Best gæti ég trúað að Kristbjörg hafi náð sér í lús, en er óbeygð af því uppátæki.

Kannast við það. Sjálf fékk ég lús þegar ég óhlýðnaðist ömmu minni og stalst til að leika mér við lúsuga krakka. Mig minnir að það hafi gerst oftar en einu sinni. 

[Baldur Hermannsson, 12.5.2009 kl. 08:33]

Fleiri punkta takk.

[Ólína Kjerúlf Þorvarðardóttir, 12.5.2009 kl. 10:19]

Dásamleg færsla Bjarni - þarna ryðst rithöfundurinn í þér fram í öllu sína veldi.

Meira svona.

[Baldur Hermannsson, 12.5.2009 kl. 11:46]

Ólína hefur augsýnilega ekki lesið A Reader´s Manifesto eftir B.R. Myers. Vona að Bjarni geri sig aldrei framar sekan um jafn glæpsamlega stílleysu.

[Haraldur Haraldsson, 12.5.2009 kl. 17:47]

Maður sem fæddist i kreppunni hefur dágóðan skylming á þessu sem kallast fátækt,Halli gamli

[Bjarni Harðarson, 12.5.2009 kl. 19:46]

kæri baldur - sko - punktar og stórir stafir eru bara hækjur og ekki notaði jón þumlungur slíkar doppur mikið,- frekast semístrik

[Baldur Hermannsson, 12.5.2009 kl. 20:05]

Bjarni, engin undanbrögð, ég geri til þín miklar kröfur af því að ég hef á þér mikið álit.