Þorgeirsboli fyrir stórtíðindum!

Rumskaði millum draumfara og hlandsprengs rétt að ganga fjögur í nótt. Það sem samt ruskaði mér úr draumalandinu var forvitnin því úti fyrir í vetrarnóttinni heyrði ég langdregið baul. Eilítið dimmraddað en aðallega ógnarlega langt og kveðandinn svolítið rámur eins og af elli. Vinalegur en samt uggandi tónn.

Ég reif mig því úr mókinu og hausinn af koddanum en heyrði þá ekkert nema bílhljóð af Austurveginum inn um opinn svefnherbergisgluggann.

Baul sem þessi hafa nokkrum sinnum heyrst á seinni öldum eða allt frá því fyrst spurðist til hins mikla Þorgeirsbola. Baul hans þykja boða stórtíðindi. Þegar hann baular illskulega getur það verið fyrir hafís, mannfelli eða rosa. En vinalegt baul eins og þetta hefur miklu heldur verið fyrir hvalreka, góðu strandi eða gestakomum.

Engum sögum fer af því í fornum skræðum að boli þessi hafi baulað fyrir sigri í prófkjörsbaráttu en einhverntíma er allt fyrst...

Athugasemdir

[Guðmundur Jónas Kristjánsson, 22.1.2007 kl. 00:24]

Bara til hamingju  Bjarni Harðarsson. Og líka þú Guðni Ágústsson.
Kannski verður þetta til þess, að við nútímanlegar þjóðlegar íhaldssálir (fyrrverandi framsóknarmenn) göngum aftur í okkar góðu  Framsókn  og sigrum með ykkur í vor:)

[Kristján Eiríksson (IP-tala skráð) 23.1.2007 kl. 11:48]

Til hamingju Bjarni en svoa til að vera ekki væminn þá læt ég þessa fljóta:

Baulandi blóði stokkið,
blíðlegt þó tautið,
gengið í framsóknarflokkinn
er frægasta nautið.

Bestu kveðjur
http://blog.central.is/kriseir