Hvalveiðimisskilningur

Ég veit ekki nema það sé misskilningur hjá Íslendingum að veiða hvali. Góðu fólki í útlöndum þykir ljótt af okkur að vera að þessu. Sér í lagi Bretum og Könum sem eru upp til hópa gott fólk og gerir yfirleitt ekki flugu mein. Ekki nema þá þeim vondu.

Það er reyndar allt í lagi að pína hænsnfugla, svín og annan búsmala, murka lífið úr fiskum og hérum úti í náttúrunni og binda enda á líf allskonar villidýra suður í heimi. Að þessu slepptu eru allir góðir við alla sem eru góðir og eiga það skilið. .

Ef einhver er vondur er það auðvitað skylda hvers manns að vera vondur á móti og skylda lýðræðissinna að fylgja því eftir. Vonda og ókristilega menn má sprengja og drepa og alla þá sem samneyta þeim, alla frændur þeirra, mæður og börn. Að ekki sé talað um geitfé þessa arma fólks. Heima fyrir má líka beita vont fólk hörðu. Dauðarefsingar og fangabúðir henta ágætlega enda alveg öruggt og yfir allan vafa hafið að gott fólk beitir ekki slíku nema á vont fólk. Annars væri það ekki gott og vonda fólkið ekki vont.

En það er einmitt þarna sem misskilningur hvalveiðanna liggur. Skeiðamaður einn, vinur minn benti mér á grundvallaratriði þessa máls um daginn. Okkur hefur semsagt láðst að segja útlendingum að hvalir eru vondir. Regluleg ódó og heiðnir í þokkabót. Vissulega vitskepnur en nota gáfur sínar til ills. Það þarf ekki annað en að útskýra fyrir útlendingum nöfnin á þessum slepjulegu ólýðræðislegu kvikindum. Náhvalur sem er beinlínis hvalur dauðans. Háhyrningar sem heita reyndar Killer whale í útlöndum. Blettahníðir sem á ef til vill að vera blettaníðir eða hvalur sem fer um með níði og róg. Grindhvalur, vitaskuld af því að hann á heima bakvið rimla og slár. Skíðishvalir sem ekki þarf um að tala eins og mörg illmenni sögunnar hafa náð að forða sér á skíðum. Nægir að vísa þar til Bond mynda fyrir þá sem eru ekki sögufróðir.

Sem kunnugt er lifa hvalir í sjó. Þar lifa líka önnur og smærri dýr. Nú mætti ætla að vitskepnur þessar bæru virðingu fyrir lífi og borgaralegum réttindum þessara meðbræðra í undirdjúpunum. Virtu lýðræðislegan rétt fiska og skeldýra. En því fer fjarri. Hvalir hafa sést fremja miskunnarlaus fjöldamorð með kjaftinum einum saman. Hvalir eru í þessum efnum nauðalíkir morðóðum hryðjuverkamönnum sem fela sig í fjöllum í Afganistan og öðrum vondum bælum þessa heims. Það má með sanni segja að þar hæfi kjaftur skel í samlíkingu skíðishvala við Osama bin Laden og hans illa hyski. Báðir eru langleitir og toginleitir í útliti, skíðishvalurinn og Ósami, klæddir svörtum kuflum og tala tungu sem enginn skilur. Báðir eru af ætt spendýra og báðum getur skolað upp á strandlengjur okkar fagra lands.

Með þessu er ég ekki að segja að við getum réttlætt hvalveiðar eins og þær eru stundaðar í dag enda engin ástæða til. Við getum aftur á móti dæmt þessa morðóðu fjandmenn lýðræðisins í heiminum til dauða. Einn fyrir alla og alla fyrir einn. Skipað svo Kristján Loftsson sem yfirhershöfðingja í sérstakri aftökusveit til varnar hinu vestræna og góða samfélagi. Hver sá sem hefur uppi efasemdir um að ódó þessi séu elt uppi og drepin er óvinur vor.

Athugasemdir

[Ágúst Dalkvist, 26.1.2007 kl. 00:18]

Vona að breski sendiherrann lesi þetta

[Jón Steinar Ragnarsson, 26.1.2007 kl. 00:31]

Ekki nóg með að hvalir séu illþýði og ódó...þeir eru vondir á bragðið líka, sem sannast af því að japanir vilja ekki sjá þá. Oj pjakk! Eða svo er að skilja af hofmóðugum fréttatilkynningum Grænfriðunga undanfarið.

Ég bendi þér  á nokkur vel valin orð í því samhengi á blogginu mínu undir: Er nú birgðahald orðið óeðlilegt....

Rökfærslurnar gegn hvalveiðum eru svo aumkunarverðar að það tekur því varla að andmæla þeim. Þær dæma sig sjálfar jafn óðum. 

[Bjarni Kjartansson, 26.1.2007 kl. 10:01]

Sjáðu til.

Ekki skal hallmæla Halli

Því Hallur er nú í pínu

hallæri er nú á Halli

Hallur missti hana Sínu

Eins er með það PR hallæri sem þjakar forsætisráðherra Breta, þeir verða að splæsa sig við málefni, sem góð geta talist og henta í yfirborðskennda umfjöllun um hvaðeina sem passar inní pólitískan rétttrúnað.

Svo eru menn hissa á því, að umfjöllun um dægurmálin hér, séu á stundum stórfurðuleg.

bestu kveðjur

íhaldsmaður

[Atli (IP-tala skráð) 26.1.2007 kl. 10:20]

Þá grimmar synda grindurnar

og grályndastar hnísurnar

huga myndu höfrungar

að hervirkjum á næturnar.

 

Hvimleitt mjög er hvalastóð

hvergi lög um ránarslóð

virðir rögust vargaþjóð

og víst er skepnan miður góð.

 

Löngum góla langreyðar

ljótust fól og afganskar

eiga ból í úfnum mar

ókindurnar bannsettar.

[Anna Runólfsdóttir, 26.1.2007 kl. 11:10]

Mér er sama um hvali, en ég hef trú á þí að íslenska lambið slái í gegn erlendis, og þá eru þessar hvalveðar að skemma gríðarlega fyrir okkur.

[Jón Valur Jensson, 26.1.2007 kl. 20:22]

Nei, lambið er því miður ekki að slá í gegn, og sem betur fer eru þessar hvalveiðar ekkert að skemma fyrir okkur. Menn mega ekki vera svona trúgjarnir á fréttaflutning af "andstöðu annarra þjóða," flestir þar eru nánast ómeðvitaðir um þetta "vandamál" hvalveiða okkar Íslendinga -- og ef litið er til Ameríku, þá vita jafnvel tiltölulega fáir Bandaríkjamenn, að þeir eru sjálfir að veiða margfalt magn stórhvela á við það litla sem við erum að hirða -- sjá þessa vefslóð mína.

[Sveinn Hjörtur , 26.1.2007 kl. 22:33]

Eru hvalveiðarnir nokkuð að enda eins og Baugsmálið og Íraksstríðið.... Farið fram með fölskum forsendum? Ég bara spyr því ég sá fréttir þar sem hundar í Japan, eða var það Kína, eru að éta hvalkjöt, og þá er illa komið fyrir hvalkjötinu. Ekki það að það sé of gott í hundskjaft, bara svo margt sem við missum... Æ er þetta ekki komið nóg með hvalina? Hvernig endar þetta allt Bjarni?

[pks (IP-tala skráð) 26.1.2007 kl. 22:51]

 Mér finnst sem gömlum sjóhundi rétt að hvalirnir njóti sinna sannmælis og virðingar.  Náhvalur er nú ekkert nema drullurótari með spjóti sínu (sjá fyrri slóð).  Svo ber ég einnig mikla virðingu fyrir háhyrningi sem í snilld sinni snöri sig á bak sitt og saug síldina úr reknetonum í Mjóafirðinum í den. En ekki hefði ég vilja falla útbyrðis á því mómenti.  Maður er kanski að gefast upp á fyrringunni eins og Bjarni er að gefa í skyn.  Láta hana valta yfir sig. Það gefur engan pening að vera að ströggla lengur.  Það má kanski kallast að vera náttúrulaus

http://www.mbl.is/mm/frettir/innlent/frett.html?nid=1249662

http://www.youtube.com/watch?v=CoIAYIgH_6Y&mode=related&search=

[Kristín Gísla (IP-tala skráð) 28.1.2007 kl. 18:29]

Mikið var ég nú ógurlega glöð þegar maðurinn minn kom færandi hendi með súran hval um daginn, hef ekki fengið slíkan herramanns mat í mörg ár.  Ég borðaði súrmat þrjá daga í röð.  Svo finnst mér hrefnukjötið ekkert lakara en kálfakjöt.  Ég sé engan mun á að slátra kálfi eða hval, nú eða litlu sætu lömbunum.

Til hamingju annars með sigurinn í prófkjörinu Bjarni minn.  Þetta var glæsilegt hjá þér. 

kveðja

Kristín Gísla