Best í heimi...

Best í heimi er að vakna klukkan átta á sunnudagsmorgni og lúra sér ofan í góða bók, þangað til maður er kominn með náladofa í hendina en herping neðan við vömbina og fara þá fram og koma aftur í rúmið með mikið kaffi og ristað brauð með gulu marmelaði og setja það við hliðina á konunni sinni og lesa svo áfram og borða öll ristuðu brauðin og nöldra í henni að ná nú í meira af því ég náði í áðan og sofna svo með margar ristabrauðssneiðar og líter af kaffi í maganum og konan er ýmist í rúminu eða ekki og stundum nakin að striplast við rúmgaflinn eins og nývaknaðar konur gera og böðuð og það er lykt og það er löngu kominn dagur og bókin er þykk og góð og kaffið gutlar í maganum og samt sofnar maður smá og hrekkur upp og nær jafnvel að hafa smá móral yfir að vera latur og drekkur kaldar dreggjar af þykku kaffinu og það er ennþá smá biti eftir af síðasta brauðinu en Elín vill hann ekki og er farin og kemur aftur nokkrum sinnum í svona mjög kvenlegu húsrábi, alklædd og fer að tala um skúringar en er samt miklu skárri en konan hans Lúðvígs í bókinni hans Braga Ólafssonar með langa nafninu sem er eiginlega svo leiðinleg,  konan en ekki bókin, að úr því að hún er aftur komin inn á söguna set ég örlítið bréfsnifsi innan í hana miðja, ekki konuna enda myndi ég aldrei gera það heldur bókina, loka og fer í sokkana sem lykta af támeyru og hugsa um að kannski eigi ég að skipta um sokka þegar ég er búinn að skúra eða skúra sokkalaus nema það sé hægt að nota þetta með sokkana sem einhverskonar viðbáru gagnvart þeim ósköpum að þurfa að skúra en svo horfi ég á konuna sem er ekki í bókinni heldur á svefnherbergisgólfinu og sé að þetta er allt vonlaust...

Athugasemdir

[Haraldur Haraldsson, 21.11.2010 kl. 14:05]

Menn gerast mjög svo skáldlegir svona á´Sunnudagsmorgni,það gott /Kveðja og góðar óskir til ykkar

[Elín Gunnlaugsdóttir (IP-tala skráð) 21.11.2010 kl. 14:29]

:)

[Þórdís Bára Hannesdóttir, 21.11.2010 kl. 19:25]

Leyfir konan ristað brauð í rúminu?

[Sigga Pje (IP-tala skráð) 21.11.2010 kl. 19:51]

Hahaha ;)

[Kalli Sveinss (IP-tala skráð) 21.11.2010 kl. 22:32]

"...konan  ýmist í rúminu eða ekki, stundum nakin eða að striplast við rúmgaflinn" !

 Sveimér ef mönnum verður ekki hugsað til lýsinga í bók T.L. Lawrence, " Lady Chatterley´s Lover" - í þýðingiu Kristmanns!

 Var kölluð " Bláa bókin" og Ragnar í Smára laumaðist í að lesa bókina. Varð svo hugfanginn að hann lét prenta í Víkigsprenti.

 Fyrir okkur strákana sem  var að vaxa grön, var skruddan algjör opinberun !

 Hinsvegar niðurlagsorðin hjá þér örlítil ráðgáta, þ.e. " konan sem ekki er í bókinni heldur á svefnherbergisgólfinu " !

 Ja, hérna, Nú hefðu Rómverjar líklega sagt pent og kurteislega.: " Vox faucibus haesit" - þ.e. " Maður mállaus af undran" !!

[(IP-tala skráð) 23.11.2010 kl. 13:58]

Mikil öndvegis gæðablóð og umvafið umburðarlyndi og það langt út yfir allt venjulegt  meina ég , er hún Elín þín, EF hún í alvörunni leyfir ristað brauð upp í rúmi.