Frásagnargleðin ræður ríkjum

Sunnudaginn 28. nóvember, 2010 - Menningarblað/Lesbók

Bækur -

Riddari útrásarinnar

Sigurðar saga fóts ***--

Bjarni Harðarson tekur efnið nýjum tökum „og frásagnargleðin ræður ríkjum."

Eftir Bjarna Harðarson Sæmundur 2010

 

 Sigurðar saga fóts segir frá feðgum sem hefjast til æðstu metorða í viðskiptalífinu á Íslandi, uppgangi þeirra og örlögum. Höfundur rekur söguna frá millistríðsárunum. Forfaðir aðalsöguhetjunnar selur laxveiðihlunnindin undan bújörð sinni og greiðir leið auðugrar og valdamikillar ættar inn í sveitina. Það leiðir til upplausnar bændasamfélagsins og hefur ýmis áhrif á fjölskylduna. Úr þessum dal liggur leiðin í gegn um hermang, brask, skuldafen fyrirtækja og yfirtökur upp á hæstu hæðir í höfuðborginni, í forystu Stóra Þjóðbankans.

 Sigurðar saga Fóts - íslensk riddarasaga er önnur skáldsaga Bjarna Harðarsonar. Hann sendi frá sér bókina Svo skal dansa á síðasta ári.

 Sagan um Sigurð fót á fátt sameiginlegt með samnefndri riddarasögu frá fimmtándu öld sem Íslendingar skemmtu sér vel við í baðstofunum, annað en nafn sitt og aðalsöguhetjunnar. Hetjan er óneitanlega fyrirferðarmikil á síðum bókarinnar, konur og átök. Þá kemur brennivín, dóp og kynlíf einnig við sögu, eins og ef til vill tilheyrir í nútíma íslenskri riddarasögu.

 Höfundurinn notar ákveðin minni úr texta Megasar við lagið Furstinn og segir frá því að lagið hafi verið drifkraftur við ritun sögunnar.

 Sigurðar saga fóts hefur sögulegan kjarna. Höfundur tínir til ýmislegt sem gerst hefur - eða gæti hafa gerst, lagfærir, ýkir og bætir við og spinnur úr því eigin sögu um ris og fall viðskiptaveldis. Kunnuglegir drættir eru fengnir að láni hér og þar frá útrásarriddurum Íslands. Sumir þeirra koma meira við sögu en aðrir en þó ekki í einni sögupersónu því þær eru blandaðar.

 Höfundurinn er fundvís á ýmis skondin atvik úr lífi venjulegs fólks sem flestir ættu að kannast við og jafnvel talið sína persónulegu upplifun. Þá er sagan hlaðin skemmtilegum lýsingum á atburðum og samskiptum fólks og tilsvörum.

 Þetta margtuggna efni er tekið nýjum tökum og frásagnargleðin ræður ríkjum. Bókin er því hin skemmtilegasta lesning.

 

Helgi Bjarnason