... og stígvélin leka

(Svona samhengislaust ætti nú enginn að skrifa en það kemur stundum  í mig púki og ég set þá saman bréf sem líkjast mest frásagnarstíl  Guðrúnar suðu sem var norðlendingur eins og frændinn sem ég  var hér að skrifa í vikunni. Birt hér engum til eftirbreytni.:)

 

Sæll kæri frændi og fyrirgefðu sein svör og enga frammistöðu en stundum er þetta ekki betra þegar vikan er ekki nema rétt sjö dagar og þar af fara átta í vesen og nokkrir þar utan í vinnu sem er tímasóun og eftir það bæti ég mér yfirleitt upp vonsku veraldarinnar með því að liggja í rúminu fram að hádegi þegar ég get og er alltaf þegar kemur að reikningsskilum fjórtán árum á eftir með allt og stígvélin leka.

 

en semsagt, það sem ég vildi sagt hafa, enn er stefnan sett á það að halda fund daginn fyrir 1. maí og þessvegna þori ég ekki að lofa mér norður þó hálfpartinn sé ég orðinn fúll og viðskotaillur ef ekki beinlínis með böggum þeim sem úr kúm leka ofan í flórinn meðan kálfurinn er leiddur frá og skorinn svo ekki verði neitt vesen á bænum en ekki kemur það kýrinni málið við hvað geð mitt verður langsamt heldur hitt að nú held ég að mennirnir séu að heykjast á að halda fundinn þessa helgi og þá verð ég bæði af því að tala við róttækt fólk sem er ekki til hér og eiga ferðalag í norðurlandið sem árnesingurinn í mér segir nú að hljóti að vera ómerkilegt land og óbyggilegt en hin skagfirska taug togar í ekki síst vegna þess að þaðan hef ég bæði montið og kvensemina og vínhneigðina og gott ef ekki ófyrirleitnina af hálfu en hinn hlutinn af þeiri hneigð er kominn frá nonna frænda sem alla drakk undir borð meira að segja í tjaldi

 en svona er nú það, vonast til að geta litið við seinna á þessu sumri og þá spjallað um land og gagn og nauðsynjar ef einhver er slík lengur í landinu. kveðjur kærar -b.

Athugasemdir

[Guðmundur Brynjólfsson (IP-tala skráð) 10.4.2011 kl. 00:13]

Þetta er helvíti gott og hef ég ekki lesið svona skemmtilegan pistil eftir nokkurn mann síðan ég gluggaði síðast í eitthvað eftir sjálfan mig og engan síðri en það geri ég reglulega þegar ég næ að opna skúffuna á litla skrifborðinu sem lengi var eign Slökkviliðs Reykjavíkur en barst síðar í annað fyrirtæki sem ég hirði ekki um að nefna en forstjórinn þar gaf mér svo borðið sem ég gerði upp og hef alltaf verið ánægður með og á ég þá bæði við notagildið og handbragðið á uppgerelsinu.

En aldrei hefði hvarflað að mér að ég færi að skrifa um þetta í annarra manna húsum svo að segja enda ekki neitt sem neinn varðar um en svona fór það nú samt, maður gerir nú ýmislegt þó það sé ekki gáfulegt og hleypi bara illu í sinaskeiðabólguna ... 

[Tobbi (IP-tala skráð) 10.4.2011 kl. 09:21]

Þótt pistillinn sé góður og samboðinn manni ættuðum frá Keldudal hebbði fólk úr Hegranesi þó seint sagt: „...ekki kemur það kýrinni málið við...“ Sérstaklega þó ekki Keldudal þarsem kýr eru margar og afburðagóðar en þar koma málin trúlega kúnni við þótt mjaltatækin komi við kúna. Alltént hebbði Eiður sagt: „Þetta orðalag er ekki í samræmi við hefð og hvorki viðurkennt né viðeigandi.“, og hebbði þar haft nokkuð til síns máls.

[Bjarne Örn Hansen (IP-tala skráð) 10.4.2011 kl. 10:33]

Ekki veit ég, hvort ég voga mér að blanda mér í svona stórbrotin mál. En ég hef alltaf haft það fyrir sið, að hafa skoðanir á öllu.  Þetta er nú líklega norðlendingurinn í mér, þeir þykja vera bíreifnir þar og aka ekki um á bílum, heldur bíla þeir út og suður.

Annars hefði ég haldið að karlinn hafði rétt fyrir sérð að málið komið ekki Kýrinni við, þar sem Kýrin er þolandinn í þessu máli. En það er nú ekki Kúarinnar að blanda sér í svona stórmál.

[Tobbi (IP-tala skráð) 10.4.2011 kl. 14:29]

„En það er nú ekki Kúarinnar að blanda sér í svona stórmál“

Hægt skánar það!