Fer með Icesave eins og kerlinguna á Þorpum!

Icesave er fíllinn í stofunni, lepur nú hver upp eftir öðrum og vísa þar í myndlíkingu og sálfræðikenningu um tapú inni á brotnu heimili þar sem einn fjölskyldumeðlima er alltaf fullur og heldur öllu í kringum sig í hers höndum með andlegu ofbeldi og öðrum þjóðlegum leiðindum.

En enginn dirfist að nefna það að kannski væri þeim hinum sama hollast að fara á Vog heldur stjákla í kringum þennan fyrirferðamikla sannleik eins og fíl sem stendur á miðju stofugólfi og ekki má nefna.

Bíddu, bíddu, - hvernig getur Icesave verið þessi fíll. Það er ekki svo að enginn hafi þorað að nefna hann, þvert á móti, það hafa allir talað látlaust um þennan meinta fíl þannig að heilbrigðu fólki er ekki lengur óhætt í heitu pottana. Mál sem er samt alls ekki svo stór sem af er látið, meira einhverskonar "keppnis" eins og ungmennin segja, einhverskonar metnaður hver hafi betur meðan milljörðum er sturtað orðalaust í allskonar vitleysu aðra og allt bendir til að málið sé löngu afgert með þrotabúinu. 

Nei, án efa,- Icesave er frekar gamallúinn íkorni og minnir mig líka hálfpartinn á kerlingarniðursetninginn á Þorpum sem var snarað fram og til baka yfir fjörð því báðu megin voru hreppstjórar þeir sem of góðir þóttust til að mylgra ofan í hana síðustu dagana sem öndin blakti. Sagan sú enti þegar kerling tók andvörpin sín þrjú krókloppin úti á firðinum miðjum og var úr sögunni.

Kannski síðasta Icesave krónan renni úr þrotabúinu ofan í bresku kóngstunnuna í miðjum málaferlunum, dómarinn með hamarinn á lofti, marbendillinn Sigurjón hlær en útburðir svikinna hugsjóna væla í bakröddum. 

(Ég lofa að skrifa seinna um það hver hann er þessi bleiki fíll, því hann er til hér eins og á öllum bæjum.)

Athugasemdir

[Jakobína Ingunn Ólafsdóttir, 10.4.2011 kl. 19:22]

Bjarni eigum við ekki að gleðjast yfir þeirri miklu umræðu sem hefur verið vegna Icesave. Varla er það einkaréttur þingmanna að karpa um pólitík.

Umræðan um Icesave hefur verið mikil og hún hefur verið holl. Aðdragandi, þátttaka og niðurstaða kosninganna sýna að fólki er vel treystandi til þess að taka afstöðu til málefna sem varða bæði fjármál og milliríkjasamskipti. 

Hvað sem varðar krókloppnum kerlingum þá held ég að flestir íslenskir karlar og flestar íslenskar kerlingar séu þess vel umkomnar að taka óbrjálaðar þátt í umræðunni. 

[Jakobína Ingunn Ólafsdóttir, 10.4.2011 kl. 19:24]

Já trúlega mun Icesave gufa upp...

[Guðjón Sigþór Jensson, 12.4.2011 kl. 00:19]

Mætti þetta æseif vera komið á sextugt dýpi, og það sem fyrst. Ætli öll þjóðin sé ekki búin að fá nóg af þessari martröð sem upphófst með léttúðlegri einkavæðingu bankanna eftir Hólmsteinsku hugmyndafræðinni?

Betur hefði verið að Íslendingar hefðu varið þessum miklu fjármunum í eitthvað gagnlegra, t.d. skógrækt eins og Skotar. Þá ætti næsta kynslóð aðgang að verðmætri náttúruafurð.

Mosi