Hækkum lægstu laun!

Aukin misskipting og bág kjör bótaþega eru tískuumfjöllunarefni undanfarinna ára. Á sama tíma ber lítið á baráttunni fyrir því að hækka lægstu laun og er mikil glámskyggni.

Miklum hagvexti undanfarinna ára hefur fylgt mikil auðsöfnun og hópur allsnægtanna fer ört stækkandi. Þetta er óhjákvæmilegur fylgifiskur og helst í hendur við útrás okkar, hlutafjármarkaðar og þess að hagur þjóðarbúsins fer batnandi. Vissulega er hægt að býsnast yfir að einstaka síldarbersar strái um sig gullinu en sá pirringur er samt aukaatriði í pólitíkinni.

Hitt vandamálið, bág kjör bótaþega eru miklu alvarlegra vandamál og þarfnast úrlausna. En fyrst þarf að leysa hitt, - að hækka lægstu laun. Harðir markaðsmenn yppta hér öxlum og segja að þetta sé markaðarins að gera, ekki hins opinbera. Verkalýðsforingjar virðast margir sofnaðir og þeir virkustu eru gjarnan fulltrúar hálaunastétta. Málið er engu að síður pólitískt vandamál sem líður fyrir að vaxandi hluti láglaunafólks í landinu er af erlendu bergi brotinn og hagsmunagæslu þess fólks er ábótavant. Stjórnvöld koma að kjarasamningum og geta í þessu beitt sér, bæði með hækkun skattleysismarka og ef ekki vill betur, lögbindingu lágmarkslauna. Lægstu laun nema nú um 690 krónum á tímann og því innan við 120 þúsundum á mánuði. Það má öllum vera ljóst að slík laun eru langt innan við framfærslukostnað.

Bætur, hvort sem er til öryrkja eða ellilífeyrisþega er ekki hægt að hækka upp fyrir lægstu laun og það er þegar varasamt hversu bilið hér í milli er stutt. Undirritaður heitir því að beita sér á þessum vettvangi í pólitískri baráttu næstu ára.

(Myndin er af okkur Rúnari frá Litlu Heiði í Mýrdal, tekin af Sigurði Hjálmarssyni við opnun kosningaskrifstofunnar í Ársölum, Vík.)

Athugasemdir

[Árni Gunnarsson, 11.5.2007 kl. 17:05]

Þó draugar hafi margir verið í minni sveit trúi ég ekki mjög á dulræn efni. Merkilegar vitranir af pólitískum toga höfða ekki til mín degi fyrir kosningar eftir 12 ára setu sjáandans í ríkisstjórn.

Mér er rík í hug vitneskja um eldri hjón, sem eftir að hafa komið á legg stórum barnahópi og unnið erfiðisvinnu alla sína starfsævi urðu að skilja lögskilnaði til að ná óskertum bótum úr kerfinu. Síðustu ár ævinnar verða þau að upplifa ævi sakamanna með því að vita sig brotleg við lög af því einu að sofa í sama herbergi. Alla daga búa þau við þann ótta að upp um athæfi þeirra komist og þau hljóti tilheyrandi refsingu með stórum fébótum til þess ráðuneytis sem Framsóknarflokkurinn hefur stýrt lengur en nemur tvöoghálfföldum tíma uppbyggingar okkar þjóðar á lýðræðisríkinu Írak.

(sem var náttúrlega rétt ákvörðun miðað við þær upplýsingar sem þá lágu fyrir) 

[Haraldur Haraldsson, 11.5.2007 kl. 23:03]

Eg veit að þu meinar þetta Bjarni og ber virðingu fyrir þvi,en mer fynnst alltaf að þu sert i vittleisum flokki????Bestu kveðjur Halli Gamli

[Gunnar Th. Gunnarsson, 11.5.2007 kl. 23:57]

Já þetta er ágætur mælikvarði á ástandið í þjóðfélaginu. Ég er fyrst að fatta það núna... ekki orð um lægstu laun í kosningabaráttunni.

[Guðrún María Óskarsdóttir., 12.5.2007 kl. 00:52]

Það er nú afskaplega ánægjulegt til þess að vita Bjarni minn að þú skulir eygja sýn á þessi mál.

kv.gmaria.

[Árni Gunnarsson, 12.5.2007 kl. 10:02]

Af því ég hef lagt mig fram í að vera andstyggilegur við þig undanförnu vil ég nú gefa hátíðlega yfirlýsingu:

Ef ég mætti velja tvo menn til að endurreisa flokkinn sem ég treysti betur en öðrum flokkum nokkuð langt fram á ævina yrði ég afar fljótur. Þar sé ég nefnilega ekki önnur ráð en að láta ykkur Guðna Ágústsson um það og alveg gæti ég hugsað mér að taka þátt í því með jafn ágætum mönnum.

Þú stóðst þig vel en varst í slæmri vígstöðu.

Og bestu óskir þrátt fyrir allt!