Hátíðisdagur með Tungnamönnum

Við Skúli mágur minn áttum hátíðisdag í gær þar sem fórum um Tungurnar og tókum hús á gömlum Tungnamönnum og skráðum minningar þeirra um gamla daga inn á upptökutæki. Betri geta sunnudagar ekki orðið.

Komum fyrst að Miðhúsum til Sighvats Arnórssonar. Hann er Þingeyingur en þó allra Tungnamanna hógværastur. Víðlesinn og vel menntaður bóndi sem unun er að hlusta á segja frá liðnum dögum bæði norðan og sunnan heiða. Eftir kaffiveitingar hjá Geirþrúði dóttur hans lá leiðin til Halldórs Þórðarsonar á Litla-Fljóti sem ég sannfærðist enn og aftur um í gær að mestur sagnasjóður núlifandi Tungnamanna. Halldór man glöggt munnmælasagnir af fjölmörgum 19. aldar Tungnamönnum og kann að lýsa sveitarbragnum eins og hann var við upphaf þess nútíma sem við nú þekkjum. Við sátum þar yfir kaffi á annan tíma og hétum okkur því að koma aftur seinna.

Hvað við gerum við þessi viðtöl - ég veit það ekki. Aðalatriðið er að taka þau og varðveita.

Athugasemdir

[Haraldur Haraldsson, 16.7.2007 kl. 13:57]

Þetta þarf verk og gott,þessar sögur verður að varðveita/Ekkert er betra en að gera þetta svona, annars gleimist margt og hefur gert um tiðina/Halli gamli

[Steingerður Steinarsdóttir, 18.7.2007 kl. 22:31]

Þú átt heiður skilinn fyrir þetta framtak þitt Bjarni. Gangi þér vel.