Fyrsta íslenska útlagastjórnin

Við Íslendingar höfum nú átt margskonar stjórnir, bæði utanþingsstjórn, þjóðstjórn, vinstri stjórn, viðreisnarstjórn, nýsköpunarstjórn en aldrei fyrr en nú höfum við átt að hætti stríðshrjáðra landa ÚTLAGASTJÓRN.

Venjulega verða slíkar stjórnir til þar sem réttmætir valdhafar flýja undan innrásarher eða öðrum valdaræningjum. Hér er stjórnin á flótta undan eigin aðgerðaleysi nema þá að Seðlabankastjóri hafi rænt völdum í landinu og hvorki Ingibjörg né Geir þori að tjá sig um hagkerfið nema í gegnum síma í öruggri fjarlægð frá nefndnum bankastjóra...

Á Vísi má lesa að stjórnin er að gera alla aðra hluti en að sinna stjórnunarstörfum hér heima, þannig er Ingibjörg að ræða við Condulezu Rice líklega um lista hinna staðföstu þjóða (NOT), Björgvin og Össur úti í þriðja heiminum að bjarga við mannréttindum og fleiru, Möller í Brussel og sjálfur er Geir á slíkum faraldsfæti að hann þyrfti helst að vera í tvítaki þessa dagana og væri þó enginn tími til að huga að efnahagsmálum. Loks er íhaldskratinn Þorgerður í fríi í Þýskalandi. Þeir sem heima eru,- ja þeir eru allavega ekki að tala við Seðlabankann...

Algert aðgerðaleysi og sinnuleysi ríkisstjórnarinnar gagnvart efnahagsvandanum er orðið að mjög alvarlegu vandamáli. Á sama tíma gýs hér upp verðbólga og enginn sem reynir að stilla saman strengi milli atvinnulífs, almennings, fjármálafyrirtækja og ríkis. Raunar eins átakanlegt sambandsleysi millum ríkis og aðila vinnumarkaðarins ekki sést um áratugi en samráðshópur stjórnarinnar við ASÍ og fleiri var síðast kallaður saman sumarið 2007.

PS: Vísur Gunnars Thorsteinssonar sem hann sendi mér eiga vel við þennan pistil en báðar fjalla þær um útþrá ráðherranna:

Haarde er með Ingibjörgu á randi
með einkaþotu fljúga þau úr landi,
láta fjármuni flæða
og fólkinu blæða.
Þau eru orðinn þjóðhagslegur vandi.

Það er lítt með þessi tvö að gera,
þó væri tveimur vandamálum eytt.
Þau ættu bara í útlöndum að vera,
enginn hérna saknar þeirra neitt.

Athugasemdir

[Gísli Baldvinsson (IP-tala skráð) 14.4.2008 kl. 18:21]

Viltu fá yfirlit um útferði s.l. ríkisstjórnar?

[haraldurhar, 14.4.2008 kl. 18:25]

   Geir er eflaust á námskeiði hjá fræðimönnum á Nýfundalandi,  varðani hvernig er best að standa af því að sameinast annari þjóð.

   Útlagastjórn er gott nafn, og lýsir vel stjónháttum hér.  Hvernig væri að þú Bjarni legðir til tilllögu á alþingi að kortanotun ráðherra, þingmanna og annara ráðamanna, er ráðstafa allmannafé. væri birt mánaðarlega, svo við venjulegir brauðstritarar gætum séð hversu ráðdeildarsamir þið eruð.

   Fordæmið er fyrir hendi er ríkilögreglustjóri birti í málsgögnum sínum kortanotkun Jóns Ásgeirs.

[Helgi Þór Gunnarsson, 14.4.2008 kl. 20:29]

Sæll Bjarni, getur það verið vandamálið með stjórnsýsluna hvað peningahyggjan ræður miklu? Mér hefur fundist það vera allaf meir og meir eftir því hvað ég eldist og þroskast í að fylgjast með pólitík, allavega finnst mér þið pólitíkusar ekki hafa mikil völd. Kær kveðja frá Eyjum.

[Guðmundur Brynjólfsson (IP-tala skráð) 14.4.2008 kl. 23:47]

Útlagastjórnin er allavega meira sannleikanum samkvæmt en Þingvallastjórnin. Altént er þetta fólk meira í útlöndum en á Þingvöllum.

[Guðrún María Óskarsdóttir., 15.4.2008 kl. 02:43]

Sæll Bjarni.

Þú hittir naglann á höfuðið þarna eins og oft áður, útlagastjórn er þó réttnefni svo mikið er víst.

kv.gmaria.

[Haraldur Haraldsson, 15.4.2008 kl. 17:45]

Við virðumst róa á sama Bát um þessar mundir Bjarni útlagastjórn  var það heillin!!!!/Kveðja Halli gamli