Af ótímabærum eftirmælum

Það er langt síðan mér datt í hug að dauðinn muni vitja manns með þeim hætti að einn daginn lesi maður um sig dánarfregnir og þvínæst minningagreinar. Ekkert viss um þetta frekar en annað varðandi eilífðarlífið - en rétt að útiloka ekkert. Þessvegna fer ég helst ekki út á morgnana nema gá fyrst hvort ég sé nokkuð sjálfur á minningasíðum Moggans.

Og velti öðru hvoru fyrir mér hvernig tilfinning það verður og hvernig eftirmælin verða yfirleitt um annan eins striga og ég óneitanlega er. Mér hefur aftur á móti aldrei dottið í hug að ég fengi einhvern forsmekk að þessu sprellilifandi. En svo varð.

Eftir að hafa með stuttri tilkynningu sagt af mér þingmennskuí morgun var mér stórlega létt. Fullur tilhlökkunar raunar að mega frekar selja bækur en að sitja á maraþonfundum á aðventunni. Þar sem símtöl tóku drjúgum af nóttinni lagði ég mig um hádegisbil og svaf í um þrjá tíma.

Og - vaknaði við mínar eigin minningagreinar og eftirmæli og skjall og heillaóskir og samúðarkveðjur og hughreystingar og jafnvel lofgerðir. Item áskoranir um að hætta við að segja af mér. Þó mér þyki sjálfum margir mæla hér langt um efni fram um mitt ágæti þá vil ég koma á framfæri þakklæti og biðst velvirðingar á að hafa hvorki náð að svara öllum tölvupóstunum, sms-unum né símtölunum. Við erum að tala um nokkur hundruð rafræn boð - og svo öll hin sem eru borin mér af lifandi fólki. Semsagt takk.

En bara til að fyrirbyggja allan misskilning. Ég sé ekki eftir að hafa sagt af mér, ég er ekki að fara að hætta við að hætta, ég er ekki í rusli yfir ástandinu en kannski svolítið eins og kötturinn, eirðarlaus og uni mér helst við dundur í eldhúsinu. Þar erum við saman, ég og kötturinn sem ég gruna alltaf um að vera krati...

Athugasemdir

[Dunni, 11.11.2008 kl. 18:49]

  Skil þig.

[Ólína Kjerúlf Þorvarðardóttir, 11.11.2008 kl. 18:56]

Þú fórst illa að ráði þínu Bjarni minn - en gerðir það eina rétta í stöðunni.  Ég setti inn smá færslu um málið í dag - minnug góðra daga sem við áttum saman í blaðamennskunni hér á árum áður.

Gangi þér vel framvegis.

[Björn Birgisson, 11.11.2008 kl. 18:59]

Synd hvernig fór. Þú ert talsmaður gamalla og góðra gilda. Nú eiga þau upp á pallborðið á nýjan leik, en talsmönnum þeirra á þingi hefur fækkað um einn. Sárafáir eftir, því miður. Lifðu heill með bókunum þínum og fjölskyldunni.

[Elín Esther Magnúsdóttir (IP-tala skráð) 11.11.2008 kl. 19:38]

Langaði nú bara að senda þér kveðju og stuðning. Veit að þú hefur vaxið frekar en hitt í augum almennings og það kemur okkur ekki á óvart sem kannast við þig.

[einar (IP-tala skráð) 11.11.2008 kl. 19:52]

Ef ég má nota nútíma talsmáta, shit happens! En þessi litli skítur þinn er náttúrulega bara óbærilegur léttleiki tilverunnar, miðað við allann þann flór ŕáðamanna okkar þjóðar sem að svífur yfir höfðum Íslendinga þessa síðustu dagana. Von mín er að þessi drengskapur þinn, að segja af þér, muni hafa þau áhrif á að fordæmi skapast með þeim hætti að stærri höfuð fjúka.
Ég kem í bókabúðina,
Einar

[Guðrún (IP-tala skráð) 11.11.2008 kl. 20:21]

Flott hjá þér að axla ábyrgð, vildi að það gerðu fleiri

[Eyþór Árnason, 11.11.2008 kl. 20:47]

...haltu áfram að blogga og vertu góður við köttinn. Kveðja.

[Gunnlaugur B Ólafsson, 11.11.2008 kl. 20:55]

Ég skrifaði eina "minningargrein" um þig Bjarni, en sé nú að það hefur verið óþarfi að vorkenna þér, fyrst þú átt svona góðan kött. Kær kveðja, G

[H.T. Bjarnason (IP-tala skráð) 11.11.2008 kl. 20:58]

Jæja...núna hefur þú tækifæri til að gera einu bestu bókabúð landsins að enn betri bókabúð.  Hlakka til að renna við hjá þér og kíkja í hillurnar.

[ee (IP-tala skráð) 11.11.2008 kl. 21:32]

Bíðið nú við aðeins............................hvar á Bjarni heima? Selfossi. Litháen..............hvers konar fréttir hafa verið um letta og Lettland?

Virðist eins og einhvers konar endurspegling, lögregla að kanna morð í sambandi við afmælisveislu. Er það tilviljun að afmælisveisla kemur upp í greinum sem skrifaðar eru hér? Er á landinu fullt af glæpafólki í þágu Sjálfstæðisflokksins a la Bush-administrationen sem svona tilviljanir eru. Það bréf sem er skrifað er í október, hver hefur aðgang ?  Á að reyna að koma úlgu í stjórnarandstöðuflokka? Bruninn á kjúklingabúinu? Er það Framsóknarflokkurinn, þar sem um landbúnað er að ræða? Hversu algjörlegar eru hleranirnar og eftirlitin hér á landi í þágu ríkjandi Sjálfstæðisflokks? Þannig mætti athuga í þágu hverra lögregla vinnur. Eru vopn dómsmálaráðherra notuð til að farga öðrum flokkum? Mætti fara að athuga hvernig á þessu stendur og á meðan verður stjórnarandstaða og þeir sem gagnrýnir eru í garð Sjálfstæðisflokksins að vera varsamir.

 Hverra ferða fer Valgerður, pirruð yfir því að þurfa að bera ábyrgð á einkavæðingunni.

[Helga R. Einarsdóttir, 11.11.2008 kl. 21:33]

Gangi þér vel hvað sem þú gerir og hvar sem þú ert.

Skilaðu kveðju til Elínar og klappaðu kettinum. kv.

[Sigurður Hreinsson (IP-tala skráð) 11.11.2008 kl. 21:37]

Bjarni þú gerðir stórmistök með því að segja af þér.  Allt það sem kemur fram í þessu bréfi er satt.  Þú hefðir átt að standa við það.  Þessi kona er ekki stórnmálamaður henni má líkja við Söru Palin varaforsetaefni í Bandaríkjunum (fáfróð).  Hún var dubbuð upp á sínum tíma sem utanríkisráðherra, en hafði ekki hundsvit á utanríkismálum og var síðan sett út í horn þegar samningar stóðu við bandaríska varnarliðið sem síðan yfirgaf Ísland. 

[ee (IP-tala skráð) 11.11.2008 kl. 21:38]

Ath.: Athugasemdir hér ofan skrifaðar í sambandi við frétt um Bjarna: http://eyjan.is/blog/2008/11/11/bjarni-hefur-sagt-af-ser-thingmennsku-politiskur-hiti-hljop-med-mig-i-gonur/

[Sigurður Þórðarson, 11.11.2008 kl. 21:40]

Já, þarna komstu með það, mig hefur stundum grunað þetta en ekki þorað að hafa orð á því: Að  kettir geta verið viðsjálverðir.

[Jenzen (IP-tala skráð) 11.11.2008 kl. 21:51]

Hefðir átt að láta slag standa,og leyfa Valgerði hinni spilltu að væla.

[Marinó Már Marinósson, 11.11.2008 kl. 22:03]

Þetta með köttinn.   Það er alltaf gott að hafa jafnvægi á heimilinu.  Gangi þér vel. 

[HP Foss, 11.11.2008 kl. 22:06]

Ljóti kötturinn það!

Vont að missa eina þingmanninn sem veit hvar Skaftárhreppur er á landinu.

Gangi þér allt í haginn, kaffibollann á ég inni hjá þér.
Kveðja- Helgi

[Kolbrún Stefánsdóttir, 11.11.2008 kl. 22:18]

Sæll Bjarni. Ég hugsa að þú geta treyst kettinum fyrir eldhúsinu og þú ættir að koma þér að öðrum verkefnum.. þín er þörf þó þú kjósir að losa þig frá þingstörfum. kveðja Kolla.

[LS (IP-tala skráð) 11.11.2008 kl. 22:39]

Hey, Bjarni þú rokkar .. fínt.

Skipta bara svo um flokk eða stofna nýjan!

LS.

[Jakobína Ingunn Ólafsdóttir, 11.11.2008 kl. 22:53]

Ljótt að missa svona ferilskrá Valgerðar frá sér.

[Halldór Jónsson, 11.11.2008 kl. 23:03]

Hvurn andskotann gerðirðu eiginlega ? Var þetta nokkuð nema sannleikurinn ?

[Svavar Alfreð Jónsson, 11.11.2008 kl. 23:09]

Njóttu þín nú vel á aðventunni og mættu margefldur og upptendraður til leiks á nýju ári.

[Máni Atlason (IP-tala skráð) 11.11.2008 kl. 23:15]

Sæll frændi.

Þegar ég sá póstinn frá þér í gærkvöldi hugsaði ég nú strax "Helvíti var þetta slysalegt hjá Bjarna...", en ætli þú hafir ekki eftir að senda afritið á alla fjölmiðla spilað eins vel úr þessu og hægt var. Fínt viðtalið við þig hjá Morgunblaðinu.

Það held ég líka að það sé ólíkt skemmtilegra að reka bókabúð en að sitja þingfundi. 

Ég legg til að kötturinn fái bara þurrfóður á næstunni. 

[Magnús Þór Friðriksson, 11.11.2008 kl. 23:28]

Hef aldrei kosið Framsókn og reikna varla með því að ég taki upp á því á gamals aldri, en ég tek ofan fyrir þér að setja þetta fordæmi með afsögn þinni. Ef fleiri færu að taka slíka ábyrgð á gjörðum sínum eins og þú gerðir, þá væri tómlegt um að lítast við Austurvöllinn...

Verður þú samt ekki með í slagnum í vor?? (reikna með kosningum)

[Baldur Hermannsson (IP-tala skráð) 11.11.2008 kl. 23:44]

Kjáni geturðu verið drengur, ég segi nú ekki meir. En þín verður þó minnst fyrir þær sakir að þú felldir ríkisstjórn Framsóknar og Íhalds í beinni sjónvarpssendingu og rýmdir þannig til fyrir kommunum við kjötkatlana. Lát huggast, Bjarni, þín bíður glæsilegur frami hjá Frjálslyndum :)

[Guðmundur Jónas Kristjánsson, 12.11.2008 kl. 00:24]

Sæll félagi Bjarni. Hvet þig sem fyrst að snúa til þings sbr blogg mitt
í dag, með pólitískri pælingu......

[Anna (IP-tala skráð) 12.11.2008 kl. 00:54]

Þetta er nú bara grátlegt .Þú áttir ekki að hætta þú ert góður pólitíkus

[Guðmundur Brynjólfsson (IP-tala skráð) 12.11.2008 kl. 09:30]

Líklega eru allir kettir kratar. Maður veit a.m.k. aldrei hvar maður hefur þá.

[Gunnar Th. Gunnarsson, 12.11.2008 kl. 11:00]

Ef þú hefðir bara sent þetta skrattans bréf undir þínu nafni kinnroðalaust, þá væri allt í fínu nema Valgerður hefði sennilega ekki dansað við þig á næsta balli.

Það er auðvelt að túlka nafnlausu sendinguna sem undirferli, en þar sem þú tókst fulla ábyrgð á þeim mistökum, þá muntu eiga þér pólitískt líf eftir þetta. Kannki verðurðu sterkari en ella fyrir vikið og öðrum til fyrirmyndar og eftirbreytni.

Gangi þér vel, Bjarni

[Sigurður G. Marinós. (IP-tala skráð) 12.11.2008 kl. 11:41]

Gangi þér vel í framtíðinni félagi, ,,þinn tími mun koma‘‘ eins og kellingin sagði. Þú gerðir tvennt sem ég dáist að, 1. Þú sagðir satt.  2. Þú sýndir mikið hugrekki með að seigja af þér. Þetta með ,,köttinn“ æ já já ég bið bara að heilsa honum eins og hinir.

[Imba sæta (IP-tala skráð) 12.11.2008 kl. 12:30]

Þvílkt vesen Bjarni að missa þig og sitja uppi með kellinguna - oj barasta... *afsakið meðan ég æli*

[Sigurður Þór Guðjónsson, 13.11.2008 kl. 20:45]

Mali minn, sem er gamaldags kommúnistaköttur, biður að heilsa eirðarlausa kettinum.