Fjölmiðlamenn á mála hjá útrásarvíkingum

Það er vissulega svo að formleg völd samfélagsins liggja hjá stjórnmálamönnum og víst brugðust stjórnmálamenn ekki síður en fjölmiðlarnir. En stjórnmálamaður sem ekki nýtur sanngirni fjölmiðla er í okkar nútíma samfélagi algerlega máttlaus til verka. Sjálfur hef ég verið í hópi þeirra sem átt hefur frekar greiða leið að fjölmiðlum en þó brá mér nokkuð í brún fyrir ári síðan þegar ég árangurslaust reyndi að koma að varnaðarorðum í efnahagsmálum og stóð þá á þeim palli að vera einn þriggja fjárlaganefndarmanna stjórnarandstöðunnar. Fjölmiðlar höfðu einfaldlega ekki áhuga á svartsýni á þeim tíma enda þjónaði það ekki hagsmunum þeirra. Ekki nema viðkomandi væri til í að benda patentlausnir eins og þær að Ísland ætti að ganga í ESB.

Ég vil trúa því að í úttekt á spillingu og ofurgræðgi undanfarinna ára verði grafist fyrir um alla anga þess máls. Einnig hvernig útrásarvíkingar keyptu fjölmiðlamenn til fylgilags og gerðu sjálfir út menn inn í stjórnmálin til að ota sínum tota. Bersýnilegast þar er framganga nokkurra borgarfulltrúa í erindum FL group í máli sem kennt er við REI. En slík úttekt bíður síns tíma.

Sjá nánar í pistli undirritaðs á fréttasíðunni AMX, hér http://amx.is/pistlar/1157/

Athugasemdir

[Einar Áskelsson (IP-tala skráð) 15.12.2008 kl. 22:05]

Algjörlega rétt hjá þér Bjarni.  Myndi forseti vor neita að skrifa upp á sams konar fjölmiðlafrumvarp í dag eins og hann gerði árið 2004?  Ég veit ekki hvort það hefði skipt yfir höfuð máli.  Það sést enn í dag að t.a.m. Fréttablaðið/visir.is og Morgunblaðið/mbl.is hvernig fréttaflutningur er misjafn á milli miðlana þar sem hagsmunir eru greinilega í húfi.  DV málið í dag er bara andskotanum ótrúlegt og þar fékk maður firringuna meira í æð en maður vildi.  En vonandi mun einhver hreinsun eiga sér stað.  Heyrði svo í Birni Bjarnasyni á Hrafnaþingi í kvöld.  Hann tók sem dæmi faglegan mun á milli íslenskra og erlendra blaðamanna á Iðnó fundunum frægu með Geir og Björgvin G.  Vill meina að fagmennsku íslenskra blaðamann sé almennt bágborin.  Ég spyr, hvað þarf t.a.m. blaðamaður hjá DV að hafa til brunns að bera?  Geta spurt réttra spurninga?  Greint mál og sett atburðarrás í samhengi?  Eða bara vera nasty innan ramma laganna.  Svarið felst líklega í hvað eigendum blaðana finnst. 

[Einar Áskelsson (IP-tala skráð) 15.12.2008 kl. 23:07]

Ekki alveg það sem ég var að ýja að, en hugmynd, samt ekkert sérstaklega góð, er það?

[Sigurður Þórðarson, 16.12.2008 kl. 07:52]

Þeir borga fúslega prófkjörsbaráttu þóknanlegra. Þess utan hefur maður sterklega á tilfinningunni að sumir ritstjórar virki eins og glymskratti, þ.e.  spila ekki nema það sé sé sett mynt í þaratilgerða rauf.