Af pólitísku dánardægri okkar Gústa!

Ágúst Ólafur er hættur í pólitík en útilokar ekki endurkomu enda maðurinn ungur. Ágústi kynntist ég vel á mínum stutta þingtíma. Við sátum meðal annars vetrarlangt vikulega í spjallþætti á Bylgjunni saman og vorum guðdómlega ósammála um næstum alla hluti. En varð vel til vina og ég tel að kratarnir hafi þar tapað einum sinna betri manna fyrir borð og geta mest sjálfum sér um kennt. Ágúst er eins og hann á ætt til vænn maður og greindur.

Sjálfur stend ég alsæll með svuntuna í bókakaffinu flesta dagana og er stundum spurður hvort ég sé bara hættur í pólitík. Allt búið! Get svarað eins og veðurfræðingurinn vinsæli forðum að allar fregnir af pólitísku andláti mínu eru stórlega ýktar. Þessa dagana bíð ég átekta og hlusta á allskonar tilboð og hugmyndir manna en tel rétt að gera allt hægt. Það er vitaskuld ekkert útilokað að ég verði bara bóksali og kaffidama á næsta kjörtímabili en það er heldur ekki slæmt hlutskipti. Og mikil pólitík í kaffihúsinu dag hvern.

Þessutan er ég í hálfu starfi hjá Heimssýn sem gætir að því að Ísland lendi ekki í Evrópusambandinu og hefi hvergi séð árangur verka minna í stjórnmálum jafn glögglega. Nú er orðinn mikill viðsnúningur í afstöðu manna í þeim efnum og það er mest að þakka mikilli umræðu um ESB mál. Þar er svo sannarlega gaman að hafa lagt hönd á plóginn og verður áfram.

Athugasemdir

[Adam (IP-tala skráð) 28.1.2009 kl. 07:37]

Með Ágústi Ólafi varstu sannarlega í góðum félagsskap þó að ykkur hafi greint á í Evrópumálum og vafalaust ótal mörgu öðru. Það er eftirsjá af ykkur báðum af Alþingi svo og Brúnastaðabónda, þeim litríka fyrrv. formanni Framsóknarflokksins. Gangi ykkur öllum allt í haginn. Í Guðs friði.

[Dunni, 28.1.2009 kl. 08:54]

Verð að segja eins og er að mér finnst pólitískum ferli ykkar Ágústar hafa lokið fullfljótt á hinu háa Alþingi.  Ekki veit ég af hverju Ágústi var ekki treyst til stærri verka af flokksfélögum sínum.  Hann virðist vænn drengur og óvitlaus séð úr dómarasætinu í stofunni í Gjerdrum í Noregi. 

Vona að þú hafir að fínt í bókakaffinu og að dýralæknirinn bæti á sig minnst 100 grömmum við hverja heimsókn.

[Loftur Altice Þorsteinsson, 28.1.2009 kl. 11:49]

Hlutirnir ské hratt þessa dagana Bjarni. Fjármálakreppan er að opna augu alls almennings fyrir hlutum sem einungis fáir greindu áður. Þessa stundina er mér ofarlega í huga fall flokksræðisins.

Forsetinn er loksins að gera mönnum ljóst að Valdið (með stórum staf) er hjá forsetanum, en ekki ráðherrum. Þetta er líka fullkomlega rökrétt því að forsetinn er kosinn af þjóðinni en það eru ríkisstjórnir ekki.

Ég held því fram að það sem menn nefna framkvæmdavald og löggjafarvald sé í raun ekki vald, eða þá í bezta falli vald með "litlum staf". Raunverulegt Vald með "stórum staf" er Vald forsetans.

Það er forsetinn sem skipar ríkisstjórn og veitir henni lausn. Það er forsetinn sem setur Alþingi og slítur því. Umboð Alþingis og ríkisstjórnar er því fengið frá forsetanum, á hliðstæðan hátt og trésmiður og pípari fá umboð frá eiganda húsnæðis til að vinna ákveðin verk.

Að halda því fram að forsætisráðherra hafi Vald til að slíta Alþingi er heimskulegt bull. Forsetinn getur skipað ríkisstjórn mönnum sem ekki eru á Alþingi. Ætti forsætisráðherra þannig skipaður að geta slitið Alþingi ? Eiga ekki skörp skil að vera á milli framkvæmdavalds (vald með litlum staf) og löggjafarvalds (vald með litlum staf) ? Hví ætti píparinn að geta rekið trésmiðinn heim ?

Kveðja.

[Ína (IP-tala skráð) 28.1.2009 kl. 12:12]

Af hverju treystir þú ekki þjóðinni til að kjósa um aðild að ESB. Þetta er forræðishyggja sem er barn síns tíma. Nýjan hugsunarhátt og nýtt Ísland takk fyrir!

[Kolbrún Stefánsdóttir, 28.1.2009 kl. 21:08]

Sæll Bjarni. Gott að þú ert ánægður með þig með svuntu og alles. Ætli Guðni sé kominn bak við eldavélina. Datt í hug af því þú nefnir "tilboð" að það þykir ekki allsstaðar fínt. Allt er nú hægt að kalla forræðishyggju. Ég er í Heimssýn einmitt út af því að ég hafna forræðishyggjunni sem felst í því að fylgja regluverki sem sett er yfir fjöldann án þess að taka mið af aðstæðum í hverju landi. En kannski verðum við einhvertíma svo aum að við þurfum að segja okkur á "sveitina" eins og það var kallað í gamla daga. kveðja Kolla.