Ábyrgðin er hjá EES

Þrátt fyrir seinar afsakanir eru athyglisverðir sprettir í landsfundarræðu Geirs H. Haarde og hann staðfestir nú og enn og aftur þá skoðun sína að EES samningurinn er mestur orsakavaldur bankahrunsins á Íslandi. Með honum voru innleiddar reglur sem engan vegin geta hentað litlu hagkerfi - og reyndar vafamál að þær henti nokkru hagkerfi.

Hitt atriðið sem vakti athygli mína í ræðu Geirs voru hugmyndir hans um tvær atkvæðagreiðslur. Nú er mjög líklegt að það yrði samþykkt af meirihlutanum að leyfa ESB sinnum að fara í viðræður. En um leið og samninganefndin færi til samninga með slíka atkvæðagreiðslu bakvið sig þá veikir það stöðu hennar til samninga,- með vissum hætti væri samninganefnd ESB með þann meirihluta á bakvið sig í því keppikefli að það yrðu að takast samningar. Þessvegna er hugmyndin um forkosningu fyrir samningaviðræður afar vanhugsuð.

Það mætti aftur á móti velta fyrir sér sérstakri atkvæðagreiðslu um það hvort þjóðinni sé alvara með að afnema fullveldisákvæði Stjórnarskrárinnar.

Verkefni dagsins er aftur á móti að fá fram endurskoðun á EES-samningnum sem kannski er lag til eins og Jón B. Lorange hefur bent á.

Athugasemdir

[Siggi (IP-tala skráð) 27.3.2009 kl. 11:34]

Þetta er eins og að kenna afnámi bjórbannsins við alkahólisma frænda síns.

Bjarni, komdu þér út úr moldarkofanum!

[Helgi Jóhann Hauksson, 27.3.2009 kl. 12:45]

Komið er í ljós varðandi EES að við slepptum því að setja bönkunum allskyns skilyrði og takmarkanir sem aðrar þjóðir í EES gerðu og samningurinn heimilar sérstaklega. 

- Jafnvel Bretar töldu sig ekki hafa efni á að ábyrgjast innlán íbúa annarra landa og bönnuðu því sínum bönkum að taka við innlánum annarra en breskra borgara með bresk lögheimili. Það varð hinsvegar eitt sóknarfæra Íslendinga vegna þessara takmarkanna á sóknarmöguleikum banka EES-landsins Bretlands að þjónusta Breta búsetta utan Bretlands, - því hér gilti aðeins það að setja engar takmarkanir sem við værum ekki skildug til að setja, þegar ýmsir aðrir settu allar hömlur sem mátti setja.

[Jón Óskarsson (IP-tala skráð) 27.3.2009 kl. 13:16]

Kosningarnar nú eiga að snúast um hvernig komast eigi út úr bankahruninu. ESB/Evra er ekki leiðin akkúrat í dag.

Hún ætti að vera síðari tíma rifrildi. 

Stuðlum að því.

[Helgi Jóhann Hauksson, 27.3.2009 kl. 13:42]

ESB og evra er sá grunnur sem við verðum að byggja á. Það hefur lengi talist gáfulegt að vita hvar á að taka grunninn áður en byggt er.

[G. Valdimar Valdemarsson, 27.3.2009 kl. 16:08]

Gallar EES samningsins eru fyrst og fremst þeir fyrir íslendinga að við erum ekki við borðið þegar reglurnar eru til umræðu og afgreiðslu.  Það er lýðræðishalli á samningnum sem er óásættanlegur fyrir Íslendinga.   Það er um tvær leiðir að ræða til að bæta úr því annaðhvort að segja samningum upp eða ganga í Evrópusambandið.  

Það er fyrir langa löngu búið að kveða upp úr með það að hálfu Evrópusambandsins að það hefur engan áhuga á að endurskoða samninginn.   Allar hugmyndir um slíkt koma frá mönnum sem stinga höfðinu í sandinn og hafa ekki fylgst með umræðunni undanfarin ár, eða þá að þeir kjósa að hafa rangfærslur og útúrsnúninga að leiðarljósi í sýnu lífi.

[Birgitta Jónsdóttir, 28.3.2009 kl. 12:37]

Ég frétti frá starfsmanni sem vann í prentsmiðju þar sem öll ees gögnin voru prentuð að enginn hafi náð sér í allt lesefnið til að undirbúa sig fyrir samningsgerðina nema einn maður og það var Hjörleifur Guttormsson. Kannski hefðu flokksfélagar þínir nýlega fyrrum sem þá voru í ríkisstjórn átt að vinna betur heimavinnuna sína.