Ofbeldi í glundroða

Glundroðaástand eru kjöraðstæður fyrir ofbeldi hverskonar, ekki bara líkamlegt heldur alveg eins pólitískt. Ögmundur Jónasson hefur nú opinberað þá umræðu sem var í gangi í hruninu þar sem nokkrir af ASÍ forkólfunum vildu nota bankahrunið til að knýja á um ESB-inngöngu. Umsóknin sem kom svo hálfu ári seinna var angi af sama ofbeldi en það er önnur saga. Ögmundur kallar þetta réttilega ofbeldi og það er mikilvægt að taka ofbeldismenn úr umferð, jafnt í pólitík sem annarsstaðar.

Sjá nánar á nýjum og frábærum fréttavef um Evrópumál, www.evropuvaktin.is 

Það kostar að spara!

Sparnaður í rekstri bæjarsjóðs hefur skilað umtalsverðum árangri og það er ljóst að nú hillir undir betri tið eftir áföll kreppunnar. En það kostar að spara og þá bitnar það á íbúum. Þannig urðu biðlistar á leikskóla um tíma í vetur og sundlaugin okkar hér á Selfossi var lokuð á sumardaginn fyrsta eins og ég fjalla aðeins um í nýjum pistli mínum á fréttavefnum Sunnlenska.is

Hart sótt að Steinunni en hvað með Össur?

Það er hart sótt að Steinunni Valdísi og hún er nú sú í liði Samfylkingarinnar sem spjótin beinast að vegna hárra styrkja sem hún fékk frá helstu leikendum í útrásarleikritinu. Ég ætla ekki að gerast dómari í þessu máli en séu styrkir þessir afsagnartilefni þá hefði Steinunn átt að axla þá ábyrgð miklu fyrr.

Hitt er miklu alvarlegra að nú hefur Össur Skarphéðinsson viðurkennt að meðan hann var formaður Samfylkingar hafi flokkur þessi ef til vill verið handbendi Jóns Ásgeirs. Hvergi meðal nágrannaþjóða okkar hefði stjórnmálaforingja liðist að gefa út aðra eins yfirlýsingu án þess að þurfa að svara betur fyrir hana. 

Ég tek það fram án þess að það skipti máli að mér hefur líkað mætavel við bæði Össur og Steinunni Valdísi og tel þau hina mætustu menn. En í ljósi þessara játninga Össurar fer að verða tímabært að krataflokkurinn taki alvarlega til skoðunar hugmynd þá sem Steinunn Valdís henti nýlega á lofti að allir í þeim flokki sem á þingi sátu fyrir hrun rými bekki. 

 

Af köttum, krötum og drykkjumönnum

Kötturinn minn Elvis er með böggum hildar. Vitaskuld útaf pólitík en þessi angurværi og sjálfselski einstaklingur er hægri krati og kysi Alþýðuflokkinn ef það væri ennþá hægt.

Nú alveg nýverið rakst hann á það að reglur um kattahald hafa verið hertar í Árborg þannig að kettir mega helst ekki vera á almannafæri nema í bandi og vitaskuld hefur kattarafmánin áhyggjur af þessu. Veit sem er kettir hljóta að hengjast af sjálfræðisfrekju sinni sé sett á þá tjóðurband.

Það kemur reyndar fram í blaðaviðtölum við kattafangara bæjarins að skepnur þessar séu látnar eiga sig meðan ekki er kvartað. Ég hef verið útskýra þetta fyrir Elvis að eðlilega gildi sömu reglur um ketti og drykkjumenn enda skyldleikinn augljós. Það er semsagt bannað vera drukkinn á almannafæri á Íslandi og hér á Selfossi er líka bannað vera köttur á götunni. En allir vita þó að kettir eiga til að skjótast milli húsa og ráða því nú tæpast sjálfur þó að það fljúgi páfagaukur eða annað fiðurfé upp í skoltinn á þeim.

Sama á við um drykkjumenn sem þurfa oft og einatt að færa sig frá heimili að knæpu í misjöfnu ástandi. Það er látið óátalið svo lengi sem þeir fara ekki akandi. Þetta síðastnefnda finnst Elvis reyndar algerlega óskiljanlegt því að úr því að vitaskuld er drykkjumaðurinn meira og lengur á almannafæri gangandi en keyrandi. Ég varð að syngja fyrir hann lagið góða, ég held ég gangi heim, ég held ég gangi heim.

Mjá, sagði kötturinn og ákvað að hætta sér út fremur en að leggja viðkvæm tóneyru sín undir þá pínsl að heyra mig syngja.

Skýrslan er komin að kveða burt...

Nei, nei nei, ég skal hlífa ykkur við yrkingum en fjórða sending af Skýrslu Rannsóknarnefndar Alþingis er nú komin í hús hér í bókabúðinni og loksins það mikið til af henni að ég þori loksins að vekja athygli á henni. Fram að þessu höfum við ekki annað pöntunum en við vonumst til að geta nú sinnt öllum.

Þetta er vitaskuld reifari ársins, lygasaga aldarinnar, biflía framtíðarinnar og lesefni á kvöldvökum barnabarna okkar eftir að öll rafmagnsljós hafa verið slökkt á Íslandi og þjóðin situr á ný í torfbæjargreni við grútarljós.

Þá verður lesið í þessum bókum um þá kappa sem borðuðu gullhúðaða glassúrsnúða meðan þjófstolnir milljarðar runnu ofan í peningatanka á enn fátækari eylendum suður í heimi, ráðherra sem tóku í nefið og viðurkenndu að þeir hefðu ekki vit á neinu því sem þeir létu kjósa sig til og forsetaólukku sem tekur langt fram þeim Merði Valgarðssyni og Loka Laufeyjarsyni til samans.

Hægt er að panta hér eða í síma 4823079 - þeir sem vilja sækja á staðinn merki við það í reit fyrir sendingarmáta. 

Gróðavænlegt sorp

Hér á Selfossi eins og víðar er mikil samkeppni í sorpinu og tvær móttökustöðvar rísa nú í okkar litla bæjarfélagi. Ég drap aðeins niður penna um þessi mál í Sunnlenska í vikunni, sjá hér.

Kjaftháttur og ófyrirleitni

Hafi einhverjum dottið í hug að við bankahrunið væri Björgólfur Thor og aðrir peningalegir hryðjuverkamenn þjóðarinnar stikkfrí og lausir undan öllu án eftirmála - þá getur verið að fyrir þeim hinum sama séu þetta einhver tíðindi.

Staðreyndin er aftur á móti sú að ef Björgólfur gæfi út yfirlýsingu um eitthvað annað, svo sem að hann ætlaði bara að borga hluta sinna skulda þá væri honum skylt að lýsa sig, eða viðkomandi félög, gjaldþrota. Víst eru þetta margar kennitölur, sautján sem eru nafngreindar og vafalaust fleiri. Það dettur engum heilvita manni í hug að trúa að trúa að þær muni allar lifa af en kannski gera einhverjar þeirra það.

Því er algerlega ósvarað eftir yfirlýsingu Björgólfs Thors hvaða ábyrgð hann telur sig bera á skuldum sem lenda á ríkissjóði vegna Landsbankans og Straums. Og í öðru lagi að hve miklu leyti umrædd fjárfestingafélög högnuðust á ævintýrum þessara stofnana t.d. á Icesave.

Það að Björgólfur yngri haldi áfram í vafasömu braski sínu út um allan heim eftir að hafa sviðið fjárhag Íslands niður í rót er ekkert annað en blaut tuska framan í íslenskan almenning.

Þetta slær ekki ryki í augu neinna, Björgólfur!

Lánin verða gerð upp

Kreppan og fátæktin

Mikilvægast í baráttunni við kreppuna er að hækka lægstu launin. Þeir lægstlaunuðu höfðu af engu að taka þegar krónan hrundi og því þarf engan að undra langar biðraðir eftir matargjöfum. Sjá nánar í grein minni á frábærum fréttavef Sunnlenska.is

Hvað hættir Þorgerður lengi?

Það er ljótt að smjatta á óförum annarra og það vil ég ekki gera. En þær eru ekki stórmannlegar plat-afsagnir þingmanna þessa dagana. Illugi og Björgvin G. segja sig frá störfum þangað til það sama hefur verið sannað í hvað, þriðja eða fjórða sinn. Þá ætla þeir aftur á þing!

Útyfir tekur þó Þorgerður sem bíður svo sem einskis af nefndum eða dómstólum en augljóst er að hún var óeðlilega flækt í peningabrall Kaupþings. Hún hefur því ekki við neitt að miða þegar kemur að hinu tímabundna leyfi en af henni mátti samt skilja að hún ætli að segja af sér fram yfir kosningar því ekki má skemma fyrir FLOKKNUM.

Þegar lýðurinn hefur svo kosið til sveitarstjórna má einu gilda hvað hann hrópar.

Landafræðiþekking fréttamanna

Það er ekki laust við aumingjahroll þegar fylgst er með gosfréttum hér austanfjalls. Ekki af því að fréttamenn séu ekki nógu kjarkaðir að fara á staðinn heldur vegna þess hvað öll þekking þeirra á svæðinu er í molum.

Á fimmtudagskvöldið var hrópað á fólk í Fljótshlíð að yfirgefa bæi sína vegna flóðs sem æddi niður Markarfljót. Síðan kom lögreglan og taldi upp hvaða bæir þetta voru og nefndi 10 eða 15 bæi í Landeyjum og á Bakkabæjunum. En útvarps- og sjónvarpsmenn héldu samt áfram að tönglast á Fljótshlíðinni. Þegar raunveruleg vá er fyrir dyrum getur skipt máli að fréttamenn þekki til staðhátta en það gera þeir ekki. Í gærkvöldi birtist svo á vef RÚV:

Í kjölfarið ákvað lögregla að loka þjóðveginum austan Víkur sem og veginum um Mýrdalssand.

Þegar kemur að raunverulegri vá eða rýmingu í Vík þá skiptir máli að fréttamenn RÚV viti að leiðin austur frá Vík liggur um Mýrdalssand!