Lýðræðisrök sem gilda ekki lengur

Gunnlaugur Ingvarsson stórvinur minn og idol í barnabrekum uppi í Tungum forðum tíð leggur fyrir mig spurningu hér í bloggathugasemdum og vill að ég svari því á hvaða forsendum VG samþykkti að fara í ESB-umsóknarferli með Samfylkingunni, hvaða fyrirvarar voru samþykktir og svo framvegis. Sjá nánar hér og hér.

Ég var eins og fleiri félagar í VG afar ósáttur við þessa ákvörðun, taldi hana í hróplegri mótsögn við málflutning VG um langt árabil. Síðan hefi ég auðvitað eins og fleiri margoft hlustað á röksemdir þingmanna í þessu efni og bendi í þessu efni á þingumræðurnar (t.d. Steingrímur J.  og Árni Þór) sem eru aðgengilegar hér á vefnum og grein Árna Þórs Sigurðssonar hér á Pressunni.  Í þingræðu tók Árni Þór fram að eitt af skilyrðum Íslands hlyti að vera forræði þjóðarinnar yfir fiskveiðiauðlindinni en nú er ljóst að það stendur ekki til boða og af þeirri ástæðu einni sjálfhætt eins og sjávarútvegsráðherra hefur bent á.

Sterkustu rök Steingríms í þessu máli kristallast í eftirfarandi setningu:

Ef svo reynist að ríkur þingvilji standi til þess að fara í þessar viðræður og sömuleiðis að fyrir liggi vísbendingar um að meiri hluti þjóðarinnar sé þeirrar skoðunar að rétt sé að láta á þetta reyna þó svo að gjarnan í sömu skoðanakönnunum reynist helmingur eða meiri hluti jafnvel þjóðarinnar sem afstöðu tekur andvígur því að Ísland gerist aðili að Evrópusambandinu þá er væntanlega bæði lýðræðislega og þingræðislega rétt að þetta sé gert, að meiri hlutinn ráði þar ferðinni. ... Hins vegar er það sjónarmið líka allútbreitt að það eigi einfaldlega að útkljá þetta mál og það telja bæði þeir sem eru því fylgjandi og einhverjir þeirra sem eru því andvígir að við göngum í Evrópusambandið að eftir sem áður þurfi að fá botn í málið og útkljá það. Ég held að það sjónarmið hafi færst í vöxt á undanförnum árum...

Þau rök að með þessu sé lýðræðinu best þjónað eru nú fallin um sjálft sig.

Það er í fyrsta lagi upplýst að þingmeirihlutinn var fenginn fram með hótunum og kúgun.

Í öðru lagi vegna þess að mikill meirihluti þjóðarinnar vill nú tafarlaust stöðva þetta ferli.

Í þriðja lagi vegna þess að sendimenn ESB hafa hvað eftir annað komið inn í lýðræðislega umræðu þjóðarinnar og telja sig aðila máls. Þar á bæ hefur þegar verið varið umtalsverðu fjármagni til áróðurs hér á landi fyrir ESB-aðild Íslands og mikið meira í farvatninu. Það er ekkert jafnvægi og ekkert lýðræði í umræðu þar sem annar málsaðili hefur bakvið sig skrifræðisbatterí milljóna manna en hinn ekkert nema berar lúkur grasrótarinnar.

Athugasemdir

[Villi G. (IP-tala skráð) 5.8.2010 kl. 12:14]

Semsagt, þú ert á móti lýðræðinu, svo framarlega sem það stangast á við skoðanir þínar. Ættir að sækja um vinnu hjá Mogganum. Þar er mönnum vissulega borgað fyrir að hafa skoðanir einsog þú hefur.

[Ómar Harðarson (IP-tala skráð) 5.8.2010 kl. 14:09]

Lítum nánar á þessi "rök". 

1. Þeir sem standa fyrir því að ná fram þingmeirihluta með hótunum og kúgunum eru væntanlega lögbrjótar (stjórnarskrá). Ásmundur Daði er hins vegar ekki vitni. Hann greiddi atkvæði með minnihlutanum. Þingmeirihlutinn var hins vegar fenginn fram með samþykki beggja þingflokka stjornarflokkanna við stjórnarsáttmála. Hann var með vilja beggja og enginn þvingaður. Þetta er því bara bull hjá þér, Bjarni minn.

2. Túlkanir á skoðanakönnunum eru varhugaverðar. Það hefur líka komið fram, þótt Mogginn hafi ekki hampað því, að í sömu könnun reyndist mikill meirihluti fyrir aðild Íslands að ESB ef samningar næðust sem tryggðu yfirráð yfir sjávarauðlindunum.

3. En þið hafið meirihluta þjóðarinnar á bak við ykkur! Í skrifræðisbatteríinu í Brussel vinna nokkrir tugir þúsunda, þar af flestir við þýðingar og skjalavörslu. Það verður ekki ójafn leikur þegar upp er staðið. Auðvitað verður íslensk kosningabarátta háð með sama hætti og áður. Það hefur meira að segja verið reynsla ESB annars staðar að það er afar varhugavert að skipta sér af.

Þetta er því bara bull hjá þér, Bjarni minn. :)

[Gunnlaugur I., 5.8.2010 kl. 16:54]

Sæll Bjarni minn og takk fyrir svarið sem var svo sem útaf fyrir sig í lagi, en reyndar mjög þunnt í roðinu af þinni hálfu.

En það veldur mér miklum vonbrigðum af því venjulega talar þú nú enga tæðpitungu, en nú bregður svo við að svarar alls ekki neitt 5 sundurliðuðum spurningum mínum, sem ég byrti í athugasemdum hér á blogginu þínu þar næst á undan þessu og ég sé ekki ástæðu til að endurtaka þær hér.

Þó þú vitnir í þingræður Steingríms og einhverja pistla Árna Þórs þá svara þeir heldur alls engu um það sem ég spurði.

Þú sérð það alveg að ef að þetta er eins og ég held og að fyrirvararnir eða varnaglarnir í umsóknarferlinu séu nánast engir og um það snérust spurningar mínar um.  Þá hefur VG brugðist okkur ESB andstæðingum miklu verr en kanski leit út í fyrstu.

Hvet þig samt áfram til að leita sannleikans og gefa ekkert eftir í einlægri andstöðu þinni við ESB !

[Haraldur Haraldsson, 5.8.2010 kl. 22:00]

Bjarni bloggvinur maður verður að vera dálitið sammála Guðlaugi her á undan/en þeir sem setið hafa á Alþingi læra fljótt að svara svona,eiginleg engu/ Kveðja /Halli gamli

[Bjarni Harðarson, 5.8.2010 kl. 22:18]

Mikið rétt - ég svara ekki fyrir það sem ég vil ekki svara fyrir- get tekið undir með ykkur en þið fáið mig aldrei til að verja vitleysur. Það er afar erfitt að svara fyrir flokk í svona máli öðru vísi en að tefla fram vörn sem ég hefi ekki áhuga á að gera...

[Anna Kr. Pétursdóttir (IP-tala skráð) 5.8.2010 kl. 22:23]

Bjarni minn!

Þó að við Gunnlaugur barnæskufélagi minn höfum verið dugleg í barnabrekunum hér áður, þá er þér alveg óhætt að treysta því sem við höfum skoðun á.

Mér finnst þið hafa brugðst það illa í ESB málinu, að annað hvort verður klúðrið í samningaferlinu það magnað að Ísland ræðir ekki næstu aldirnar að stíga fæti hvað þá meir í þennann viðskiptaklúbb...

EÐA að klúðrið verði svo hrikalegt í aðildarviðræðunum að landsmenn vakna einn góðann sunnudag við að Össur er búinn að skrifa upp á aðild  ... og harðneitar að taka gjörðir sínar til baka...  - sé hann í anda stinga af í felur með undirskriftirnar á meðan að verið er að innleiða allar afsalstilskipanirnar...

[Halldór Egill Guðnason, 5.8.2010 kl. 22:37]

"Ef svo reynist að ríkur þingvilji standi til þess að fara í þessar viðræður....."  "Ríkur þingvilji"! Hvernig varð hann ríkur, ef ekki hefði komið til stuðningur VG við umsóknina? Hefðu VG liðar staðið á sinni meiningu, en ekki fengið hugsjónaniðurgang í von um valdastóla, hefði þessi svokallaði ríki þingvilji aldrei orðið til. VG fannst í lagi að láta kúga sig til hlýðni og þar við situr. Allt fyrir valdið og þinglið VG situr sem fastast eins og barðir hundar undir ægivaldi silfurskottunnar, mannvitsbrekkunnar í félagsmálar´ðuneytinu og annari óværu samspillingarinnar. 

[(IP-tala skráð) 6.8.2010 kl. 23:22]

"Ríkur þingvilji"! Hvernig varð hann ríkur, ef ekki hefði komið til stuðningur VG við umsóknina? Geri orð Halldórs að mínum því aldrei hef ég verið svikin jafn hroðalega af þingmönnum og VG gerðu í þessu máli.

[Gunnlaugur Ingvarsson (IP-tala skráð) 7.8.2010 kl. 09:34]

Sæll Bjarni. 

Já Bjarni það er hart að VG sótt vegna þessa máls. Ég veit að sjálfur varðstu ásamt þúsundum stuðningsmanna VG fyrir gífurlegum vonbrigðum með þessa auðsveipni flokksforystunnar í ESB málinu gagnvart Samfylkingunni.

En nú er komið að spurningunni, er VG lýðræðislegur flokkur og lifandi fjöldahreyfing fólksins og alþýðunnar í landinu eins og þeir vilja gefa sig út fyrir að vera og fjöldi fólks innan þeirra raða er.

Eða er þetta svo bara þegar upp er staðið eins og gamall miðstýrður kommúnistaflokkur, þar sem alvitrir flokksbroddarnir ráða allri stefnunni sem máli skiptir og geta í krafti valda sinna haft ótal tækifæri og skipulegar undankomuleiðir til þess að svæfa eða eyða öllum óþægilegum tillögum sem koma frá grasrótinni.

Mér sýndist á síðasta flokksstjórnarfundi nú í vor þar sem mikil andstaða var við ESB aðild meða almennra þingfulltrúa og upp kom tillaga um að afturkalla ESB umsóknina tafarlaust. 

Að þá steig fram einn helsti valdatæknir flokksbroddanna Árni Þór Sigurðsson og kom því til leiðar að aldrei kom til raunverulegra umræðna hvað þá atkvæðagreiðslu um þetta mikilvæga mál, þess í stað var málinu velt áfram og frestað og komið fyrir í einhverri nefnd sem svo á að leggja fram einhverja, ja kanski áfángaskýrslu, kærmi mér ekki á óvart, til að enn væri tæknilegur möguleiki að drepa málum enn á dreif og lengja í þessari vitleysu til að passa að málið sé bara á borðum í innsta valdakjarna flokksbroddanna.

Nei svo á víst nefndin að skila af sér á flokksþingi sem halda á víst í haust, ef því verður ekki frestað.

Auðvitað mun valdatæknirinn Árni Þór þar reyna áfram að stöðva það að lýræðið nái fram að ganga og grasrótin fái að taka raunverulega og efnislega afstöðu til málsins.

Þess vegna kæmi ekki á óvart að eftir málamynda umræður legði Árni fram tillögu um að þessu máli yrði vísað til miðstjórnar flokksins til frekari útfærslu. Semsagt málunum bara snúið hring eftir hring án þess að raunveruleg og lýðræðisleg niðurstaða fáist. 

Ef Árna Þór og hans nótum mun þá með þessum eða eða öðrum hætti takast þetta það er að halda málinu enn og aftur frá opinni og lýrðræðislegri umræðu og ákvarðanatöku innan flokksins, þá er VG svo sannarlega orðinn þessi "gamli miðstýrði kommúnistaflokkur alviturra flokksbroddanna" sem ég lýsti hér að ofan.  

En ég trúi því ekki fyrr en ég tek á því að grasrótin og almennir flokksmenn og þú Bjarni minn látið þessa hringavitleysu og afslátt á lýðræðinu yfir ykkur ganga öllu lengur

Meira að segja flokksforysta Sjálfstæðisflokksins var ekki gert kleift að bera klæðin á báðum öxlum í ESB málinu og á landsfundi þeirra s.l. vor tók grasrótin algerlega völdin og sagði hingað og ekki lengra við flokksforustana sem mátti beigja sig í duftið fyrir vilja meirihlutans.

Ég trú ekki fyrr en ég tek á því að Sjálfstæðisflokkurinn sé lýðræðislegri og opnari grasrótar og alþýðuflokkur heldur en VG, en það skyldi þó aldrei svo vera.

Alla vega man ég eftir því í gamla daga úr sveitinni okkar þegar við vorum báðir ungir menn að þeir nágrannarnir, alþýðumennirnir og garðyrkjubændurnir feður okkar kusu alltaf Sjálfstæðisflokkinn sem sinn alþýðu- og frelsisflokk. 

[Gunnlaugur I., 7.8.2010 kl. 16:51]

Það skyldi þó aldrei fara svo að lokum Bjarni minn fyrir okkur báðum, eftir allt okkar pólitíska brölt allt frá unga aldri, sem byrjaði yst til vinstri en flakkaði svo inn að miðju og svo aftur til vinstri að við báðir eftir 50 ára stöðugt mótþróaskeið við íhalds-feðraveldið okkar að við að lokum fetuðum varlega slóð feðra okkar, sem "frjálslyndir og umbótasinnaðir Sjálfstæðismenn"

Þá myndu nú mörgum vinum okkar og félögum vera brugðið og myndu óttast um andlega og félagslega heilsu okkar.

En ég veit líka að sumir myndu nú kætast mjög bæði hér á jörðu og í efra.

Ég segi þetta nú kannski meira í gríni en í alvöru og veit að þú hefur alveg húmor fyrir svona pólitískum hremminga kenningum.

En öllu gamni fylgir nú samt einhver alvara !

[Árni Gunnarsson, 7.8.2010 kl. 20:03]

Ennþá finnst ESB sinnum það boðlegt að segja að þingviljinn hafi verið fenginn fram með vilja beggja og "enginn verið þvingaður!"

Við sem horfðum á atkvæðagreiðsluna á Alþingi s.l. sumar og heyrðum alþingismenn lýsa yfir andstöðu við það sem þeir samþykktu með greinilegum klökkva í rómnum; heyrðum síðan hvernig þingmenn lýstu eintali við foringja sem höfðu í frammi hótanir og þvinganir á göngum og í skúmaskotum, teljum okkur misboðið með svona andskotans óskammfeilni!

Það helgar enginn tilgangur svona rammt meðal enda er tilgangurinn ekki huggulegur.