Bensín á kókflöskum og einkasala á bókum

Þegar ég ók á vespu inn í Sahara fyrir nokkrum árum komst ég langt út fyrir þau svæði að olíufélögin ættu þar sína glæsiskála með rafknúnum dælum en það var alltaf hægt að fá bensín. Við litla kantaða leirkumbalda hlupu berfættir krakkalingar út úr húsasundum með bensín í litlum gler-kókflöskum sem selt var á prúttverði. Og áfram skröltum við vespan inn í sandana.

Það vill til að ég sel kók í gleri hér í bókakaffinu og núna þegar bensínstöðvar landsins eru farnar að selja bækur þá veit ég ekki nema okkur  bóksölum þessa lands beri skylda til að bjóða upp á bensín. Nóg er hér af glerinu. Ég gæti geymt flöskurnar bensínfullar í óræktargarðinum bakvið og vantar eiginlega ekkert nema krakkana til að hlaupa með þessa krúttlegu mólotovkokteila.

En það er margt í þessum heimi krúttlegt á okkar síðustu og verstu tímum. Eins og bara það að sjá fyrrverandi viðskiptaráðherra sem átti sér hugsjónir um betri viðskiptahætti koma snemmbúinni ævisögu sinni fyrir í einkasölu hjá mesta einokunarfyrirtæki þessa lands og það með þeim sértæku kjörum að bókinni má ekki skila. 

Þetta verður alveg eins með  bensínið hjá mér, það fær enginn að skila því sem keypt hefir...

Athugasemdir

[Kalli Sveinss (IP-tala skráð) 6.12.2010 kl. 14:31]

Félagi Bjarni !

 Hárrétt - en gleymdu aldrei að fyrrverandi viðskiptamálaráðherra er krati - og hverjir héldu lengstum uppi grimmilegri vörn fyrir Baugs-einokunina allt þar til yfir lauk ? ! Krúttlegt - ekki satt ?? !

 "Ég þekki mína, og mínir þekkja mig" sagði forðum Meistarinn mikli.

 Kratar hafa lengstum haft mörg andlit, og því rétt sem Rómverjar sögðu: " Vultus est index animi" - þ.e. "Andlitið er spegill sálarinnar " !!

[Haraldur Haraldsson, 6.12.2010 kl. 21:33]

Bjarni bloggvinur: þú ferð á kostum þarna/Kveðja