Að vakna hjá múvístar og vera það samt sjálfur

Í morgun vaknaði ég hjá kvikmyndaleikkonu sem er auðvitað ekkert merkilegt því eins og allir vita getur allt gerst á nýársnótt þegar jafnvel nautpeningur mælir fram Hávamál og byssuhvellir kveða við í friðsælum bæjum en álfar aka á trailerum um þjóðvegina og hafa tólgarskildi til viðbits.

En svo ber við um þessar mundir (alveg sama hvort pláss verður á gistihúsinu) að tónskáldið á Sólbakka verður stórleikari í kvikmynd sem frumsýnd er í sjónvarpinu á morgun og segir frá Húsinu á Eyrarbakka sem fegurst er húsa í Flóanum og merkast. Auk þess að vera þar í gervi Guðmundu Nielsen semur Elín tónlistina við þessa fallegu mynd sem enginn ætti að láta fram hjá sér fara og enda ekkert betra að gera á jórturdegi jólahátíðar. 

En ég var svosem ekki einn um þessa upplifun á suddalegum nýársmorgni því sama sagan var af konunni sem vaknaði við hliðina á manni sem hreinlega brilleraði í áramótaskaupi í gærkvöldi og ég er enn að velta því fyrir mér hvernig við Jón Bjarnason náðumst þarna á mynd því ekki dettur mér í hug að halda nokkur hafi getað hermt atvik og takta svo nákvæmlega eftir.

Athugasemdir

[Kolbrún Stefánsdóttir, 2.1.2011 kl. 10:26]

Gleðilegt nýtt ár Bjarni og takka fyrir gamla árið. Ég er alveg sammála þér með hæfileika þína sem komu fram í leikritinu um ekki neitt sem kallast áramótaskaup. Þið Jón voruð assgoti flottir báðir. Ég óska frúnni velgengi á þyrnum stráðri braut leiklistarinnar. Bestu kveðjur Kolla 

[Jón Logi (IP-tala skráð) 2.1.2011 kl. 12:07]

Gleðilegt ár bóksali góður, og hafðu þökk fyrir að vekja mann upp með villandi byrjunarsetningu.

Konan mín vaknaði reyndar við hliðina á kvikmyndaleikara í morgun, en það var bara ég. Einu sinni lék ég í Hollívúddmynd og hafði upp úr því  4 vikna harðsperrur, hernaðar-reynslu, og þá ánægju að sitja við hliðina á Eastwood karlinum og éta með honum saltstengur daglangt á meðan ég beið eftir myndatöku af sundurskotnu fésinu á mér.

Ógleymanlega gaman.

[hilmar jónsson, 2.1.2011 kl. 20:03]

Gleðilegt ár Bjarni. Skemmtilegur pistill hjá þér.

[Haraldur Haraldsson, 2.1.2011 kl. 22:39]

"Af mistökunum skulum við þekkja þá " Valdi og Sylli/en kveðja og gleðilegs  ára og  friðar ,þakka það gamla bloggvinur Bjarni og Family