Davíðshús - tólf stig

Ég hef oftast misst af júróvísjón en minnir samt að tólf stig séu þar fullt hús stiga. Davíðshús á Akureyri fær tólf stig. Hér er afar gott að vera, gott að skrifa og bærinn er einstaklega þægilegur. Mátuleg heimsborg fyrir Flóamann, í þessum höfuðstað er allt og samt ekki of af neinu. Eymundsson, fornbókabúðin hjá Olgu og Amtsbókasafnið. Hvað þarf maður meira? Jú, Bautinn ef maður nennir ekki að sjóða hrossaket heima hjá sér.

En allir draumar taka enda og í dag er heimfarardagur. Friðrik Olgeirsson segir frá því í ævisögu Davíðs að hann hafi tekið höfðinglega á móti gestum en hellti samt ekki upp á könnuna enda var það kvenmannsverk og hann konulaus, hvunndags allavega. Þess í stað bauð hann gestum upp á gos, viskí og tóbak.

En heimur versnandi fer. Ég þarf nú að enda mína sæluviku hér í norðrinu á að skúra! Hvað hefði Davíð gert í mínum sporum? 

Athugasemdir

[Kalli Sveinss (IP-tala skráð) 27.4.2012 kl. 17:59]

Félagi Bjarni ?

 Hvað Davíð hefði gert  í þínum sporum ? - Borðgleegjandi, fengið kvenmann í skúringarnar - enda skáldið nær aldrei konulaust !

 Meira að segja kom hann með danska hjúkrunarkonu og " hélt" hana hjá sér á þriðja ár !

 Sú hafði hjúkrað skáldinu þegar hann var að vinna á þunglyndinu á heilsustofnun í ríki Danakonungs stuttu eftir seinni heimstyrjöld

 Fleiri andans menn en Churchill hafa kynnst þeim skelfilega hundi " the black dog".

 Afhentu gestgjöfum þínum norðan heiða flösku af 18 ára " Black Johnny Walker whisky" - í minningu Davíðs.

 Bókstaflega ekkert hefði glatt skáldið meira !

 Enda er gott áfengi ( drukkið í hófi) , það sem Rómverjar sögðu.: Vis medicatrix naturae" - þ.e. " Lækningamáttur náttúrunnar" !

[H.T. Bjarnason (IP-tala skráð) 28.4.2012 kl. 02:14]

Akureyri er fínn staður, en verst hvað fornbókabúðin er dýr.

[Valgeir Matthías Pálsson (IP-tala skráð) 28.4.2012 kl. 08:24]

Flottur Bjarni.

Haltu áfram góðu gengi.

Kær kveðja.

Valgeir.