Frá foreldrarölti og 19. aldar cappuchino

Var í foreldrarölti á laugardagskvöldinu. Afar mikilvægt og ekki þungbær kvöð því ég held að það séu alls tvö kvöld fyrir hvern ungling. Þetta gerir fjölmennið hér á Selfossi. Þó svo að okkur þyki allt í allrabesta lagi með unglingana er mikilvægt að sofna ekki á verðinum. Hlutirnir eru í lagi af því að það er unnið fyrir því en ef við sofnum á verðinum getur hallað á. Það á við um unglingauppeldið eins og allt annað gott.

Við skálmuðum því í frostnepjunni þrjú, ég og hjónin Hjalti og Hildur frá Gufuhlíð. Afar skemmtilegt þó það hefði mátt vera hlýrra. Sáum ekki neina unglinga sem til okkar heyrðu en utan við pakkhúsið voru pæjur og töffarar á fjölbrautaskólaaldri.

Annars hef ég átt róllega helgi og notið þess að sitja yfir ævisögu Eldeyjar Hjalta sem ég eignaðist um daginn austur á Höfn. Mögnuð lesning. Hjalti segir þar m.a. frá kaffidrykkju austur í Mýrdal fyrir hartnær hálfri annarri öld. Húsfreyjan í Kerlingardal, annálaður skapvargur og sóði, skammtaði þar kaffi með þeim hætti að hún hellti fyrst kaffi í bolla allra og tók svo rjómaskál, stakk í rjómann hornspæni (skeið á nútíma íslensku) og skammtaði einni skeið á hvern bolla en í stað þess að demba úr skeiðinni í bollann nostraði hún við með því að stinga rjómaskeiðinni upp í sig og spýtti svo ofan í kaffið. Söguhetjan, Eldeyjar Hjalti var lítið hrifinn af þessari trakteringu og ég lái honum það svosem ekki. En velti því samt fyrir mér hvort kerlingin hafi ekki með þessu verið að ná fram svipuðum áhrifum og við gerum með því að flóa kaffimjólkina í dag,- þ.e. að þetta hafi verið nokkurskonar cappuchino 19. aldar manna sem þarna er lýst. Með spýtingunni hefur rjóminn náð að blandast kaffinu með líkum hætti og ná má með gufuspýtingu nútíma kaffivéla.

Ég hef ámálgað þessa vinnuaðferð við kaffidömurnar mínar á bókakaffinu en fengið fremur dræmar undirtektir. bara íhaldssemi!

Athugasemdir

[Guðrún María Óskarsdóttir., 26.2.2007 kl. 01:19]

Sæll Bjarni.

Já foreldraröltið og gott fyrirbæri og nauðsynlegt sannarlega, gaman að sunnlenskum frásögnum og þessi með kaffið er ein af mörgum.

kv.gmaria.

[Feliximo (IP-tala skráð) 26.2.2007 kl. 01:21]

Sammála, sammála, sammála, meeen yeah

http://blog.central.is/burtmedframsokn

[Ester Sveinbjarnardóttir, 26.2.2007 kl. 04:19]

Það að foreldrar og börn virði útivistatíma er mjög mikilvægt, fór líka stundum í svona foreldraröld, mjög skemmtilegt.  Við vorum farin að fá börn úr öðrum hverfum til okkar, en það stoppaði starx og röltið fór af stað.  Ég las líka sögu Eldeyjar Hjalta á sínum tíma, sunnlendingar eru magnaðir karektar. ;)