En þó að þeir rausi og rugli...

Það var mikið ort í kosningabaráttunni og fæstu af því hef ég náð að halda saman. Á kjördag kom Helgi Jónsson á Selfossi með eftirfarandi til mín á blaði sem á fullt erindi hér á bloggið enda laglega gert.

Í framboði flækjast þeir víða um sveit

og ferðast með stefnuskrá ljósa

og hræra í mér svo ég hreint ekki veit

hvern þeirra ég á að kjósa.

 

Í litfögrum blöðum með loforðafjöld

þeir lýsa því hverju skal breyta

svo upp renni betri og fegurri öld

með auðsæld til sjávar og sveita.

 

En þó að þeir rausi og rugli í mér

og rök færi fyrir því arna

af festu ég krossa á kjörseðil hér

og kýs núna B fyrir Bjarna.

 

(Höfundur Helgi Jónsson, Selfossi - á enga mynd af honum en hér eru nokkrar frá kosningaskrifstofunni af mætum og góðum liðsmönnum og gestum.)

Athugasemdir

[Haukur Nikulásson, 15.5.2007 kl. 23:44]

Til hamingju með þingsætið Bjarni. 

[Guðrún María Óskarsdóttir., 16.5.2007 kl. 00:08]

Gaman að þessu.

Þú ert örugglega frjálslyndur Framsóknarmaður he he...

kv.gmaria.

[Gunnar Ásgeir Gunnarsson, 16.5.2007 kl. 08:12]

Ég er afar sæll að sjá  þig á þingi þó ég sé argasta íhald.  Þú átt fullt erindi þangað

Til hamingju 

[Sigurgeir Jónsson, 16.5.2007 kl. 08:13]

Til hamingju Bjarni,Guðni,Jónína, og Siv, með nýjan landbúnaðarráðherra í suðurkjördæmi, Björgvin G. Sigurðsson sem þið hafið leitt til öndvegis.Nú er ekkert fyrir landsbyggðafólk annað að gera en að stofna Landsbyggðaflokkinn.Ykkar bíður nú eyðimerkurganga eins og á tímum viðreisnar, sem verður þó ólík því sem gerðist þá þar sem Ingibjörg S. mun mynda ríkisstjórn að fjórum árum liðnum ´N aðkomu Framsóknarflokks.

[Sigurgeir Jónsson, 16.5.2007 kl. 08:20]

Beðist er afsökunar á ritvillu,Í fyrri athugasemd minni átti að að standa,, án aðkomu Framsóknarflokks.Hafðu það svo gott Bjarni Harðarson, kannski sé ég þig í Landsbyggðaflokknum.

Kveðja.

[Már Högnason (IP-tala skráð) 16.5.2007 kl. 09:52]

Áfallahjálp í boði Sjálfstæðisflokksins

Saman hafa talað tveir

og tár af Jóni strokið

sýnir honum samúð Geir

því samvinnunni er lokið.

[Kristján Sig. Kristjánsson (IP-tala skráð) 16.5.2007 kl. 11:25]

Bjarni Harðason er greinilega hættur í pólitík, hann hefur ekkert að segja meir.

[Þorvaldur Gamlgerðingur (IP-tala skráð) 17.5.2007 kl. 21:27]

Það særir gamlan sveitamann að sjá að brageyra þjóðarinnar er fyrir bí. Sum „skáldin“ ættu að finna sér eitthvað annað að gera en setja saman „vísur“ eða breyta þeim.