Fullveldissinnar draga framboð til baka vegna ólýðræðislegra aðstæðna

L - listi fullveldissinna mun ekki bjóða fram í komandi Alþingiskosningum. Ákvörðun um þetta var tekin á fundi sem haldinn var í Hafnarfirði í dag, föstudaginn 3. apríl. Hreyfingin mun áfram starfa sem frjáls framboðs- og sjálfstæðishreyfing.

L-lista fullveldissinna treystir sér ekki til að uppfylla þau skilyrði sem ólýðræðislegar aðstæður skapa nýjum framboðum á þessum stutta tíma sem liðinn er frá því ákvörðun var tekin um kosningar. Þaulseta Alþingis fram undir kosningar með allri þeirri athygli sem störf þess fá skipta hér miklu.

Annað sem skiptir máli er sá múr sem 5% lágmark setur nýjum framboðum og krafa um 126 frambjóðendur í sex kjördæmum. Þá skapar opinber fjárstuðningur ríkisins til eldri stjórnmálahreyfinga mikinn aðstöðumun framboða. Síðast en ekki síst vegur þungt hvernig fjölmiðlar hafa hundsað óskir okkar um jafnræði í umfjöllun.

Þegar boðað var til framboðs L-listans var því spáð að bæði Sjálfstæðisflokkur og Vinstri hreyfingin grænt framboð myndu kúvenda í afstöðu til aðildar Íslands að ESB.

Niðurstöður  þessara flokka urðu aftur á móti að halda í fyrri stefnur um andstöðu við aðild. Í því er fólginn mikill varnarsigur eftir stórsókn ESB sinna á nýliðnu ári. Svo virðist sem aðildarsinnum hafi um sinn mistekist að nota sér ótta almennings í fjármálahruninu til að grafa undan fullveldi Íslands.  Í bæði Sjálfstæðisflokki og VG var þó gefinn óþarflega mikill slaki gagnvart þeim þjóðhættulegu hugmyndum sem nú ríða yfir að Ísland skuli setjast á kosningavagn Brusselvaldsins.

L-listi fullveldissinna varar við allri tilslökun í þessu máli og hvetur stuðningsmenn sína til að kjósa ekki þau framboð sem hafa beinar aðildarviðræður að ESB á stefnuskrá sinni.

L-listi fullveldissinna þakkar fjölmörgum stuðningsmönnum framboðsins ómælda elju og baráttu og minnir á að barátta smáþjóðar fyrir frelsi sínu og fullveldi er ævarandi.

Þórhallur Heimisson

Kristbjörg Gísladóttir

MárWolfgang Mixa

Sigurbjörn Svavarsson

Bjarni Harðarson

Guðrún Guðmundsdóttir

Athugasemdir

[Baldur Hermannsson, 3.4.2009 kl. 18:25]

Það er dálítil eftirsjá að þessu framboði en ég óska ykkur til hamingju með þessa ákvörðun. Það er ábyggilega þörf fyrir þennan félagsskap.

[Ragnhildur Kolka, 3.4.2009 kl. 18:56]

Synd. Fjölbreytileiki er af hinu góða. 

[Anton Valgarðsson (IP-tala skráð) 3.4.2009 kl. 20:27]

Þetta þykja mér mjög slæm tíðindi. Þetta framboð var sem ljós í myrkri.

Framboð ykkar var einni valkosturinn fyrir marga vegna þess að maður vissi í fyrsta sinn hvað maður var að kjósa.Það er best að orða flokkinn á þá leið að hann var eins og heilbrigð sál í heilbrigðum líkama.

[daði (IP-tala skráð) 3.4.2009 kl. 20:33]

Það verður eftirsjá af þér Bjarni.  Eini heiðarlegi stjórnmálamaðurinn.

gangi þér vel.

daði

[Hjörleifur Guttormsson, 3.4.2009 kl. 20:38]

Sæll Bjarni.

Þetta er skiljanleg ákvörðun miðað við aðstæður. Með tilraun ykkar hafið þið þó lagt lóð á vogarskálar í stærsta framtíðarmálinu sem er að treysta undirstöður fullveldis Íslendinga með því m.a. að hafna aðild að Evrópusambandinu. Í því efni þurfa sem flestir að leggjast saman á árar. Við skulum vona að drjúgur meirihluti þjóðarinnar standist prófið nú og framvegis.

Óska þér og þínu fólki velfarnaðar. Kannski lít ég við í bókabúðinni við hentugleika.

[Kalli Sveinss (IP-tala skráð) 3.4.2009 kl. 21:36]

Félagi Bjarni !

 Einstaklega viturleg ákvörðun!

 Var margbúinn að hvetja ykkur til þessa.

 Alltaf talið ykkur, þig og klerk til vitmanna !

 Heilbrigðar sálir!

 Mundu, Sjálfstæðisflokkurinn hafnar alfarið ESB !

 Enda þar í flokki flestir sem Rómverjar sögðu forðum.: " Mens sano en corpore sane" - þ.e. " Heilbrigðar sálir í hraustum líkömum" !!

[Glúmur (IP-tala skráð) 3.4.2009 kl. 22:08]

Kalli Sveins, 

Sjálfgræðgisflokkurinn eins og Rómverjar? Við vitum hvernig það endaði og hvers vegna.

[Jón Valur Jensson, 3.4.2009 kl. 22:23]

Mens sana in corpore sano, Kalli minn Sveins.

Ég birti fyrir kvöldmat AFAR mikilvæga grein, ásamt með þungvægum upplýsingum í athugasemdum mínum þar á eftir í umræðunni, um einmitt þetta mál, Bjarni:

Skipulagsbundið ofríki Fjórflokksins afhjúpað fyrir umheiminum, sem fjallar um það skammarlega kosninga- og kjördæmalaga- og margvíslega annað misrétti gagnvart nýjum flokkum og hreyfingum, sem í dag hrakti L-listann frá framboði sínu.

Svo hvet ég L-listamenn til að KÆRA allt þetta ranglæti til Öryggis- og samvinnustofnunar Evrópu, RÖSE (sem er vel að merkja EKKI eitt útfrymið af EBé; 56 ríki frá Evrópu, Asíu og Norður-Ameríku eiga aðild að þessari alþjóðastofnun).

RÖSE-menn eru reyndar nú þegar í aðdraganda þessara komandi kosninga farnir að fylgjast með okkar SKELFILEGA óýðræðislegu háttum í sambandi við kosningakerfið, kjördæmaskipan, atkvæðavægi o.s.frv. Þeir hafa hér verk að vinna – hjálpum þeim að afhjúpa andlýðræðishyggjuna! Já, niður með ólýðræðislega einokunarstarfsemi þinglýsta alþingiseigendafélagsins, Fjórflokksins skinheilaga! – samansvörnu svikaranna við lýðræðisleg réttindi þjóðarinnar, þeirra hinna sömu sem sumir hverjir leita færis til að svíkja lýðveldið undir erlent stórveldi.

Gjörið svo vel að taka þátt í umræðunni á tilvísaðri vefslóð minni.

[Linda Samsonar Gísladóttir, 3.4.2009 kl. 22:45]

Leitt að svona skuli komið...... hvað getur maður sagt annað?

Kveðja,

Linda Gísladóttir

[Loftur Altice Þorsteinsson, 3.4.2009 kl. 22:53]

Þetta er eðlileg ákvörðun Bjarni. Ef Sjálfstæðisflokkurinn hefði hafnað fullveldinu, er enginn vafi að leið margra Sjálfstæðismanna hefði legið til ykkar. Nú ættuð þið að fjölmenna til okkar Sjálfstæðismanna og hjálpa til við að halda forustu okkar flokks við efnið.

Nú þurfa allir fullveldissinnar að berjast gegn landráðastefnu Samfylkingarinnar. Ekki er hægt að stóla á VG, sem langar svo mikið í ríkisstjórn með Sossunum. Ekki ætlið þið Laugvetningar að sitja hjá, þegar tekist verður á um fullveldið.

[Ragnar Gunnlaugsson, 3.4.2009 kl. 23:30]

Hefði kosið ykkur ef Sjálfstæðisflokkurinn hefði ekki tekið einarða afstöðu gegn ESB á landsfundinum um síðustu helgi.Verið velkomnir í Sjálfstæðisflokkinn hann hefur margt lært á liðnum mánuðum. Samfylkingin söm við sig sér engin úræði nema ganga í ESB.

[Jón Daníelsson, 3.4.2009 kl. 23:34]

Minn kæri gamli félagi.

Mér þykja þetta vond tíðindi. Að vísu eiga skoðanir okkar á Evrópusambandinu ekki samleið. Engu að síður hefði ég lagt pínulitla peninga í kosningajóð ykkar - eftir efnum mínum og aðstæðum. Ástæðan er einföld: Sérhver skoðanahópur ætti að eiga málfrelsi á Alþingi.

Hitt er svo annað mál að ef engin lágmarksmörk væru sett, ættum við á hættu að þingið yrði illa starfhæft vegna fjölda lítilla flokka, sem hver um sig setti skilyrði fyrir stuðningi við ríkisstjórn.

Mér sýnist þessi atburður sanna enn betur en ég vissi fyrir að við þurfum að taka fyrirkomulag lýðræðisins til athugunar. Ég kann ekki svarið. Enda er það minn háttur að hlusta fyrst, áður en ég mynda mér afstöðu.

En sem sagt: Þetta var skítt.

[Glúmur (IP-tala skráð) 4.4.2009 kl. 00:28]

Dómur reynslunnar er að Evrópubandalagið er mun betri kostur en Fjórflokkurinn . En dýrin læra af reynslunni en Íslendingar ekki.

[Ómar Ragnarsson, 4.4.2009 kl. 00:40]

Á grundvelli eigin reynslu frá kosningunum 2007 votta ég aðstandendum L-listans samúð mína.

Hin napra staðreynd er að þótt gömlu flokkarnir fái einn þingmann fyrir hver 1,57% atkvæða sem samtals eru greidd, gildir þetta ekki um flokka sem fá minna en 5%.

Flokkur sem fær 4,9% atkvæða og fylgi sem ætti að nægja fyrir 3 þingmenn, fær engann.

Meðan Íslandshreyfingin var með ríflega 5% í skoðanakönnunum um þetta leyti fyrir tveimur árum, kom hún 2-3 iðjagrænum þingmönnum inn og felldi stóriðjustjórnina.

Um leið og fyrsta skoðanakönnunin sýndi 4,8%, sem var í raun óbreytt fylgi vegna skekkjumarka, sáu fjölmiðlanotendur þingmennina hverfa á skjám og í blöðum og stóriðjustjórnina standa.

Í stað þess að þetta efldi fylgi við hreyfingu sem tók frá stjórnarflokkunum, hræddi það fólk frá að kjósa I-listann.

Allar hinar hindranirnar voru svosem meira en nóg þótt þetta bættist ekki við.

[Ómar Ragnarsson, 4.4.2009 kl. 00:41]

Afsakið innsláttarvilluna "engann" með tveimur n-um. Kann ekki að leiðrétta svona beint en sá þetta strax, en þó of seint.

[Jón Valur Jensson, 4.4.2009 kl. 01:12]

Bjarni minn, ég held þú hafir gert afgerandi mistök með því að bjóða þig ekki fram í Suðurlandskjördæmi, þar sem þú nauzt mikils persónufylgis.

Hvernig gat þetta gerzt? Það ræði ég auðvitað á vefsíðunni sem ég vísaði á, en fleiri hliðar eru á þessum málum.

Fyrst þó þetta: Það er tvöfaldur skaði að þessu: Fyrir fullveldissinna að missa þennan flokk – og að fá ekki jafn-ágætan mann og þig á þing. En verður þetta ekki skammætt harmkvælaþing?

Nú eru um 56% Íslendinga andvíg því að sækja um að ganga í þetta ólukkans Evrópubandalag. Fylgisleysi ykkar í skoðanakönnunum var í undarlegri mótsögn við þetta, en kannski erum við Íslendingar bara svona vel tamdir.

Svo vonuðu Sjálfstæðisflokksmenn, að sá flokkur sviki ekki í málinu, enda 3/4 stuðningsmanna hans á móti því að sækja um inngöngu í þetta yfirríkjabandalag. Bjarni ungi Ben. var reyndar mjög eindreginn í orðum um þetta í Kastljósi í kvöld, andvígur inngöngu, kannski búið að tala utan í hann í Valhöll?

Aðhald að þessari pólitísku atvinnumannastétt er víst það, sem þarf á næstu mánuðum og misserum, og vertu nú kært kvaddur (og þú Ómar minn líka, inn í gin úlfsins).

[Haraldur Haraldsson, 4.4.2009 kl. 01:15]

Aðstæður leifa  þetta framboð ekki að sinni,en þetta misrétti verður að laga !!!!,en samt hreyfinginn stendur ,og við vonum hið besta,að Sjálfstæðisflokkur V.G. og frjálslindir haldi sig  við að ganga ekki i ESB/,en við skoðum málin/Kveðja Halli gamli P/s en ómar gekk í ESB sistemið það ver óvænt!!!!

[Anna Ólafsdóttir Björnsson, 4.4.2009 kl. 01:32]

Við Vinstri græn reynum sannarlega að standa vaktina, ekki veitir af, samt er Samfylkingin svolítið ein og hjáróma sem stendur, það er ekki verra. Skrýtið að sjá forystuþáttinn í kvöld og vita að það voru bara nokkrar klukkustundir sem réðu því að þú varst ekki með. Held að 5% mörkin hafi verið breyting til hins verra fyrir blessað lýðræðið en svona eru lögin eins og sakir standa.

[HN (IP-tala skráð) 4.4.2009 kl. 01:51]

Að mínu mati er ekki mikill missir af þessu kverúlenta framboði með Bjarna Harðar í broddi fylkingar. Mannsins sem varð sjálfum sér til skammar þegar hann sennilega sýndi sitt rétta andlit af undirferli og falskháttum þegar hann reyndi að stinga flokksystur sína í bakið úr launsátri og þurfi að segja af sér þingmennsku í kjölfarið. Farið hefur fé betra og við höfum ekkert að gera með svona lítilmenni á þingi. Nóg er samt.

[Andrés Magnússon, 4.4.2009 kl. 03:02]

Ég sýti það að þið skulið hafa hætt við áform ykkar um framboð, þó ég hefði ekki kosið ykkur. Það veitir nefnilega ekki af því að þjóðhollt fólk haldi landráðaseggjunum við efnið.

En varðandi ástæðurnar, þá langaði mig aðeins að minna á tvær færslur, sem ég skrifaði 2006 um hvernig sitjandi flokkar á Alþingi hefðu gripið til óþokkabragða til þess að halda nýjum framboðum utan vébanda Alþingis og sjálfum sér í áskrift að fjármunum almennings. Sú fyrri hét einfaldlega Óvinir lýðræðisins og hin seinni Ókeypis menn.

Það stendur allt enn, en það sást og sést best á því hvernig stofnað var til Ofríkisstjórnarinnar og hvernig hún hefur farið fram, að allar ráðstafanir hennar hafa snúist um sjálfsbjargarviðleitni flokkanna sem að henni standa. Allar hinar meintu, göfugu forsendur hennar hafa reynst yfirvarp fyrir hitt. Nú sjá menn enda árangurinn og ernidisleysu hennar.

[Jón Valur Jensson, 4.4.2009 kl. 09:39]

Frábærar greinar, sem þú vísar þarna í, Andrés. Þú bendir á, að þrír þingmenn greiddu atkvæði gegn þessari sjálftökulöggjöf sameinaðs Fimmflokksins: Einar Oddur Kristjánsson, sá mæti maður með sína næmu réttlætiskennd, og frjálshyggjumennirnir Birgir Ármannsson og Sigurður Kári Kristjánsson, sem þarna voru sjálfum sér samkvæmir í hugmyndastefnunni.

Sjálfur var ég farinn að skrifa snemma (í DV og löngu síðar á Moggabloggi, fyrir um tveimur árum) um það ranglæti að skipta Reykjavík í tvö kjördæmi, en mörgum sést algerlega yfir þá staðreynd, að það var engu síður skeinuhætt nýjum flokkum og frelsi manna til að hafa lýðræðisleg áhrif með atkvæði sínu heldur en 5%-reglan, en vitaskuld á að fjarlægja hvora tveggja lagaregluna, svo að Alþingi verði sér ekki til ævarandi skammar fyrir að þrengja kosti lýðræðis á Íslandi (með a.m.k. sexföldum hætti, eins og ég lýsi í greininni og aths. efst á vefsíðu minni núna).

Þessu máli og slagnum um það er alls ekki lokið. Það er rétt að byrja.

(PS. "HN" talar hér um undirferli og fals, en stundar það hér sjálf(ur) að stinga heiðvirðan mann í bakið úr launsátri síns hetjulega nafnleysis. Verði hans/hennar IP-tala bönnuð hér á síðunni vegna illmælis, dettur trúlega einhverjum í hug að segja eins og oftar í slíkum aðstæðum: "Farið hefur fé betra og við höfum ekkert að gera með svona lítilmenni.")

[Baldur Hermannsson, 4.4.2009 kl. 09:49]

5% reglan er skynsamleg. Fáránlegt að fylla hér allt af smáflokkum. Nógu erfitt getur reynst að mynda ríkisstjórn með 2 flokkum, hvað þá 8 eða 12. Þið sem haldið öðru fram eruð vitleysingar. Það er lágmark að frambjóðandi hafi traust í sínu eigin kjördæmi. Maður sem ekki ávinnur sér traust kjósenda á ekki erindi á Alþingi. Bjarni Harðarson er vitaskuld eðalgaur en hann er búinn að klúðra sínum pólitíska ferli - því miður. (Nema hann sé köttur í mannslíki og eigi sér 9 líf, hvað veit ég).

[Jón Valur Jensson, 4.4.2009 kl. 10:04]

Nei, Baldur, 5%-reglan er smánarleg og lýsir heigulslegri hræðslu Fjórflokksins við lítil framboð og sér í lagi billegri samtryggingarviðleitni hans til að berja með ofríki niður möguleikann á klofningsframboðum í hans eigin herbúðum.

Þannig er fyrir fram verið að setja réttlætistilfinningu manna og kjörfrelsi stólinn fyrir dyrnar. Sitjandi alþingismenn eiga ekki að stýra þannig og stjórna í eigin þágu – þeir eiga að vinna Í ALLRA ÞÁGU.

Hver er annars afstaða þín til þess að gera svipaðan hlut og þessa 5%-reglu með því að skipta Reykjavík í tvö kjördæmi, svo að 4–5% íbúa geta ekki tryggt flokki þar þingsæti, heldur þarf a.m.k. 8–9% til?

Að hafa Reykjavík EITT kjördæmi mundi endurvekja aukin lýðræðisréttindi kjósenda þar, og þetta mundi ekki draga hætishót úr lýðræðisvaldi kjósenda úti á landi, heldur þvert á móti gefa kjósendum nýrra framboða þar meiri möguleika á að ná uppbótarþingsæti í krafti þess, að þegar hafi náðst það fyrsta kjördæmakosna þingsæti, sem skv. núverandi reglum er skilyrði fyrir því, að flokkar fái uppbótarþingsæti.

Klúður Bjarna í vetur var örugglega eins og feilspor fermingardrengs í samanburði við ýmis leynileg bolabrögð íslenzkra stjórnmálamanna í marga áratugi fram að því.

[Baldur Hermannsson, 4.4.2009 kl. 10:12]

Jón, Reykjavík er alltof stórt kjördæmi. Það var alltof lítið skref að kljúfa Reykjavík niður í 2 kjördæmi. Reykjavík ætti að vera 10 eða 12 kjördæmi. Við þurfum að endurheimta gömlu, þjóðlegu, íslensku einmenningskjördæmin. Annað hvort hefur frambjóðandi traust kjósenda eða hann hefur það ekki. Svona er það í Englandi og Bandaríkjunum og sjálfsagt víðar. Þessi stóru kjördæmi með urmul þingmanna eru búin að stórspilla lýðræðinu fyrir okkur. Þau eru gróðrarstía kúkalabba sem skríða inn í skjóli betri manna.

Klúður Bjarna var alls ekki e-mailið á fjölmiðlana. Það bréf átti fullan rétt á sér. Fyrra klúður Bjarna var að segja af sér þingmennsku. Seinna klúður Bjarna var að strunsa úr Framsóknarflokknum. Bjarni er flottur en hann verður að hlusta á mig og gera eins og ég segi - ef það er þá ekki of seint.

[Loftur Altice Þorsteinsson, 4.4.2009 kl. 10:28]

Það er mikið verk óunnið við að koma á lýðræði í landinu. Þessi 5%-regla er auðvitað graftarbóla á andliti þjóðarinnar og hana þarf að hreinsa burt, með góðu eða illu.

Höfum í huga, að samkvæmt Stjórnarskránni eru þingmenn einungis bundnir af samvitsku sinni, ekki vilja flokkanna. Þingræðið hvílir því ekki á stjórnmálaflokkunum, heldur einstaklingum. Enda eru stjórnmálaflokkarnir ekki nefndir í Stjórnarskránni og er það ekki neyðarlegt, miðað við ofríki þeirra ?

Reglan um 5%-fylgi er í hróplegri andstöðu við framangreint ákvæði Stjórnarskrárinnar um samvitsku þingmanna. Hún er einnig gróft brot á jafnrétti kjósenda.

Einnig verður að rass-skella fjölmiðlana sem leyfa sér ótrúlega mismunum. Um fjölmiðlana verður að setja ákvæði í Stjórnarskrána um jafna kynningu á frambjóðendum. Þessi regla verður að ná til frambjóðenda innan flokkanna ekki síður en um frambjóðendur flokkanna.

Auðvelda verður framboð einstaklinga og afnema allar hömlur á frelsi þeirra til framboðs til Alþingis. Hollusta manna við stjórnmálaflokkana verður að víkja fyrir hollustu við frelsi einstaklinganna og Stjórnarskrána.

[Baldur Hermannsson, 4.4.2009 kl. 10:35]

Nei Loftur. Það þyrfti að vera meiri mismunun, ekki minni. Það var ferlegt að hafa þá þarna í gærkvöldi, geimverurnar Þór Saari og Ástþór Magnússon. Svona menn gereyðileggja vitræna umræðu hvar sem þeir koma. Sá sem hyggur á framboð verður að hafa pottþétta málefnastöðu og þrótt til að kynna hana, hann verður að gefa sér tíma til að vinna sér og málstaðnum fylgi. Það er ekki hlutverk fjölmiðla að búa til fylgi handa pólitískum spjátrungum.

[Jón Valur Jensson, 4.4.2009 kl. 10:44]

Baldur, þetta svar þitt til mín er þér alls ekki verðugt né sæmandi. Viltu þvinga upp á okkur tveggja flokka kerfi? Af hverju að taka mannréttindi af stórum minnihlutum?

En ég er sammála því, sem þú segir (og leiðréttir mig) um klúður Bjarna! – tvöfalt klúður hans, nei, raunar þrefalt: að bjóða sig líka fram í Reykjavík.

[Jón Valur Jensson, 4.4.2009 kl. 10:51]

Lesið nýjustu skrif mín um Öryggis- og samvinnustofnun Evrópu (og í aths. þar ofar, 3.4. kl. 20:36), þá stofnun sem fylgist með því, að lýðræðisréttindi fólks séu höfð í heiðri.

Nú eru þeir mættir hér og eiga eftir að taka íslenzka stjórnmálaelítu í bakaríið.

[Baldur Hermannsson, 4.4.2009 kl. 10:53]

Jón, þú verður að sætta þig við þá staðreynd að við erum ekki sammála um allt. Ég er algerlega, fullkomlega og gersamlega ótvírætt andvígur núverandi skipan til Alþingiskosninga. Ég gæti kannski fallist á þremenningskjördæmi. Frambjóðandi yrði þá að fá minnst þriðjung atkvæða til að komast inn á þing. Það er óþolandi að menn sem sárafáir treysta skuli komast inn á þing og fara þar að ráðskast með málefni þjóðarinnar. Kjördæmin eiga að vera trygging fyrir því að þeir einir komist á þing sem eru færir um að afla sér trausts almennings.

[Jón Valur Jensson, 4.4.2009 kl. 11:01]

Hvor er í takti við þjóðarviljann, ég eða þú, Baldur?

Í skoðanakönnun á vefsíðu Jóns B. Lorange – http://islandsfengur.blog.is/ – er boðið upp á persónukjör um þingframbjóðendur, og þar er Bjarni Harðarson með 16,3% atkvæða, en 363 hafa greitt þar atkvæði.

Á minni vefsíðu er önnur skoðanakönnun, þar sem spurt er: Viltu fá nýja framboðsflokka á Alþingi? 50% hinna 58, sem svarað hafa, segja já, 50% nei, og í þann hópinn munu meðal annars flokksvarðhundar ýmsir sverja sig.

[Loftur Altice Þorsteinsson, 4.4.2009 kl. 11:13]

Mér fannst vitlegra Baldur, það sem þeir Ástþór og Þór höfðu að segja en hinir foringjarnir. Þeir Þórs-menn höfðu hugsað málin, sem aðrir höfðu ekki gert. Ég verð þó að viðurkenna, að ég skildi ekki Ástþór að fullu, en það er sjálfsagt vegna minna eigin takmarkana. Þór skildi ég vel, sérstaklega það sem hann sagði um peningastefnuna, er enda maðurinn hagfræðingur.

Það sem fulltrúar gömlu flokkanna höfðu að segja um efnahagsmálin var hrikalega heimskulegt og steinrunnið. Ljóslega höfðu þeir engin tök á viðfangsefninu, heldur fóru með gamlar þulur sem þeir höfðu lært í stjórnmálskólanum.

Þessi gamla tugga um að halda verði í Krónuna um mörg ókomin ár, er versta dæmið um þetta. Er ekki hrikalegt, að þjóðin skuli þurfa að hlusta á foringja flokkanna flytja þann þvætting að halda þurfi Krónunni til að koma á efnahagslegum stöðugleika. Ekki megi hrófla við neinu þar til Seðlabankinn er búinn að leysa málin. Hvenær hefur seðlabanki leyst einhver vandamál ?

Þjóðin hrópar á efnahagslegan stöðugleika. Allir vita sem vilja vita, að lítil og einhæf hagkerfi geta ekki komið á efnahagslegum stöðugleika nema með fastgengi. Hvernig koma menn á fastgengi ? Við vitum að það tekst ekki undir stjórn seðlabanka. Við vitum að einungis er hægt að ná "fastgengi undir stjórn Myntráðs".

Hvers vegna er þá ekki komið á "fastgengi undir stjórn Myntráðs" ? Er um að kenna heimsku eða er verið að vinna skemmdarverk í nafni erlendrar hugmyndafræði ?

[Baldur Hermannsson, 4.4.2009 kl. 11:17]

Jón, við skulum nú ekki fara að draga einhvern "þjóðarvilja" inn í þetta litla, sæta karp okkar tveggja. Hefur þú einhvernt tíma verið á harðahlaupum eftir "þjóðarvilja"? Ekki hef ég lagt það í vana minn og ætla ekki að byrja á því núna.

Loftur, er það ekki fremur spurning um "hvenær" en "hvort" krónar víki?

[Jón Valur Jensson, 4.4.2009 kl. 11:26]

Það er til lítils að berjast fyrir lýðræði fyrir fólk sem hugsar eins og þú, Baldur minn.

[Baldur Hermannsson, 4.4.2009 kl. 11:38]

Ég minnist þess nú ekki að hafa beðið þig eða nokkurn mann annan að berjast fyrir mig, kæri Jón. Ég bý við ágætis lýðræði og hef gert alla mína ævi. Margt gæti verið betra en ég er alveg einfær um að koma kvörtunum á framfæri telji ég það nauðsynlegt.

[Bjarni Harðarson, 4.4.2009 kl. 12:05]

Hvað er að gerast á þessari síðu hér undir nótt þegar Loftur Altice er farinn að trúa hagfræði Þórs Saari og Ástþórs og Baldur farinn að trúa bullinu um að krónan sé ónýt. Þarf ég að heimta að menn séu edrú hér á síðunni!

[Loftur Altice Þorsteinsson, 4.4.2009 kl. 12:44]

Já Baldur, við verðum að losna sem fyrst við þessa "handstýrðu flotkrónu". Jafnvel Davíð tóks ekki að hemja hana, svo að við getum afskrifað allar hugmyndir um að það sé mögulegt.

Að taka ástfóstri við hugmyndina um "handstýrða flotkrónu" er eins og að taka að sér flækings-kött. Hann verður aldreigi til neins gagns, étur allt nema rotturnar og skítur í öllum hornum. Það sem þó er verst, er að "handstýrð flotkróna" er eins og stjórnlaus Kamikaze-flugmaður, enginn veit hvar hann lendir.

[Jón Valur Jensson, 4.4.2009 kl. 13:03]

Það mætti nú halda það, Bjarni, að íslenzk þjóð liggi í dag í ofmiklum mæli í timburmönnum, svo litlu láta menn sig það skipta, að lýðræðið sé nánast ónýtt nú um stundir fyrir þá þjóðfélagshópa, sem lýðræðið á einmitt að taka fullt tillit til samkvæmt bókinni, þ.e. þá sem í minnihluta eru. Eða virkar þetta bara, þegar um er að ræða ennþá minni hópa eins og samkynhneigða, sem fá öllum sínum kröfum framgengt í merkilegri auðsveipni nánast allra stjórnmálaflokka?

Baldur karl, þú segist búa við "ágætis lýðræði" og hafir gert alla þína ævi, en er það ekki bara af því að þú kýst einn stórflokkinn? En ef hann hefði ekki verið til, hvernig litist þér á að byrja með hann nú "from scratch" og við þær aðstæður sem Fjórflokkurinn hefur skapað nýjum framboðum með harðsvíraðri forréttindastefnu sinni? Og hlakkarðu til að heyra álit Öryggis- og samvinnustofnunar Evrópu á tilhögun þeirra kosninga sem fyrir dyrum standa?

[Baldur Hermannsson, 4.4.2009 kl. 13:10]

Það eru bara 2 gamlir flokkar á Íslandi, íhald og Framsókn. Hitt eru allt spánnýir flokkar, til þess að gera. Það er ekkert mál að stofna stjórnmálaflokk á Íslandi og komast á þing og síðan í ríkisstjórn. Sjáið bara Samfylkingu og Vinstri græna, hvort tveggja nýir flokkar. Menn þurfa bara að hafa góða stefnuskrá, góða frambjóðendur, góðan formann og almennt gott skipulag. Flokkar sem ekki hafa þetta leysast upp og hverfa.  Flokkar sem ná ekki einu sinni 5% atkvæða eru ekki á vetur setjandi.

[Jón Valur Jensson, 4.4.2009 kl. 13:52]

Jæja, Baldur, þar rak að því, að þú lýstir því yfir, að Samfylkingin og Vinstri grænir hefðu "góða stefnuskrá"! Ég fer að hallast að því með honum Bjarna, að það sé eitthvað sterkt í glasinu hjá þér!

Annars ertu feiknlega ósanngjarn í þessu tali þínu öllu. "Flokkar sem ná ekki einu sinni 5% atkvæða eru ekki á vetur setjandi," segirðu, en sérðu það ekki, að sjálfar aðstæðurnar, fjárskorturinn (í samanburði við t.d. á annað hundrað milljónir sem þinn flokkur fær úr vösum skattborgara bara á þessu ári, til viðbótar við líklega fáeina tugi frá útsvarsgreiðendum líka og enn meira frá hagsmunafyrirtækjum), mismununin í ríkisfjölmiðlunum, áhrifin sem skapast af því, að í skoðanakönnunum kemur lítið fylgi fram í byrjun og fælir þá fólk frá því að velja þennan L-lista, með hliðsjón af því, að ná þarf um 8–9% í a.m.k. einu kjördæmi til að ná yfirleitt inn á þing; einnig hinn hrikalegi fjöldi meðmælenda, sem þarf til landsframboðs (1890 til 2520 manns fyrir hvern flokk! – til viðbótar við 126 frambjóðendur hans), gerræðisleg skipting eins lögsagnarumdæmis, Reykjavíkur, í tvö kjördæmi (svo artificiel, að Hagstofan veit það jafnvel ekki fyrr en fáeinum dögum fyrir kosningarnar, hvar mörkin milli Rvíkur N og Rvíkur S liggja!), en sú skipting veldur því, að flokkur, sem fengi þar 7,5% atkvæða allra borgarbúa, fengi engan þingmann, o.fl. sem veldur því, að svo misskipt er aðstöðu flokka og hreyfinga til nýrra framboða – EINMITT NÚ, eftir þær davíðslegu breytingar, sem gerðar hafa verið á skipan allra þessara mála frá því árið 1999 – að Fjórflokkurinn hefur nánast barið allt nýtt lýðræði niður í fæðingu og gæti hrósað happi og hreykt sér vegna þessa á hvaða suður-amerískum bófapólitískum bananalýðveldisvettvangi sem væri.

Nánar um allt þetta ranglæti og meira til HÉR Á VEFSÍÐU MINNI.

Þú segir SF og VG nánast spánnýja flokka, en þeir eru báðir draugaflokkar eldri flokka og hreyfinga, Alþýðuflokks (+ Þjóðvaka + Kvennalista + Bandalags jafnaðarmanna + sumra Allaballa) og Alþýðubandalags, áður Sameiningaflokks alþýðu – Sósíalistaflokksins, áður Kommúnistaflokks Íslands, + einhverra græningja).

En þegar þú segir: "Það eru bara 2 gamlir flokkar á Íslandi, íhald og Framsókn," þá er nú rétt að benda lesendum á það, að þú ert fulltrúi gamla sveitó-íhaldsins, ef einhver er, því að sú ofríkisfulla íhaldskosningakerfisskipan, sem þó ert nú að verja, er eins og beint framhald af ofríkinu hér áður fyrrum, þegar Framsókn – og Sjálfstæðisflokkurinn oft í slagtogi með henni – beittu sér blygðunarlaust gegn því, að raskað yrði við þeirri ranglátu misskiptingu lýðræðislegs kosningaréttar fólks, sem birtist t.d. í því, að á vissum tímabilum voru kjósendur í sumum kjördæmum með fimmfalt meira atkvæðavægi heldur en kjósendur í þéttbýlustu kjördæmunum. Gerir þú, gamli gagnrýnandi sveitaíhaldsins á öldum áður, þig í alvöru sælan með þessa nafnbót sem ég nú hef sett á þig, íhaldsskröggur sem verð pólitísk sérréttindi hér fram í rauðan dauðann?!

Sjá það ekki allir, sem vilja nýtt Ísland, laust við spillingu liðinna ára, að það ranglæti og sú mismunun, sem hef gagnrýnt hér, þarf að hverfa engu síður en aðrar birtingarmyndir sérdrægni og spillingar í fjármála- og stjórnkerfi landsins?

Svo "gleymdirðu" alveg að svara spurningunum í lok síðasta innleggs míns.

Þakka þér annars gamalt og gott – kannski síðustu forvöð að taka það fram!

[Baldur Hermannsson, 4.4.2009 kl. 14:17]

Jón, þú ferð svo víða að ég geri mér engar vonir um að fylgja þér eftir. En hér eru fáein svör:

1) Við skulum ekki gefa okkur að allir sem eru á öðru máli en við séu ýmist drukknir eða geðveikir.

2) Stefnuskrá VG er sjálfri sér samkvæm og myndar ágæta heild. Hún höfðar til margra. Hún er góð á sama hátt og Manchester United er gott lið þótt ég styðji það ekki.

3) Mig skortir spádómsgáfu móður minnar og veit ekki fyrirfram hvað þessi öryggisstofnun mun segja. Mér stendur raunar á slétt sama.

4) Takk fyrir að kalla mig íhaldsskrögg. Mér er ekki hælt á hverjum degi.

5) Fylgi stjórnmálaflokka ræðst ekki af fjármagni.

6) Ég hef alltaf stutt réttláta kjördæmaskipan. Ég hef alltaf verið andvígur því að eitt kjördæmi hafi margfaldan atkvæðisrétt á við annað. Kjördæmum má breyta með tilliti til fólksfjölda eins og gert er í erlendis.

7) Óráðsframboð kenna ævinlega öllu um nema eigin ágöllum.

8) Mannssonurinn á hvergi höfði sínu að halla. Stjórnmálamenn munu ekki leysa vandamál okkar.

Njóttu helgarinnar, Jón. Biðjum fyrir andstæðingum okkar.

[Jón Valur Jensson, 4.4.2009 kl. 14:29]

Baldur minn, þetta með glasið var nú spaug. Stríðnislegt spaug að vísu.

Manchester United er örugglega gott lið, en VG er með vonda stefnuskrá. Hún dugar þeim sennilega til vondra verka.

Þú færð að frétta af áliti þessarar Öryggis- og samvinnustofnunar Evrópu; það verður varla nein himnasending fyrir þig og Fjórflokkinn.

Njóttu þess að vera íhald, en ekki með því að hæla Vinstri græningjum!

Fylgi stjórnmálaflokka ræðst VÍST að miklu leyti af fjármagni.

Nú styður þú rangláta kjördæmaskipan.

Kallarðu framboð fullveldissinna "óráðsframboð"?

8. atriði þitt er út í hött. Mannssonurinn er Kristur. En stjórnmálamenn EIGA að REYNA að leysa vandamál samfélagsins.

Já, góða helgi, Baldur minn, og biðjum fyrir okkur öllum.

[Loftur Altice Þorsteinsson, 4.4.2009 kl. 15:04]

Á ekki að enda svona bænastund með Amen ?

[Baldur Hermannsson, 4.4.2009 kl. 15:08]

Kærleikurinn ofar öllu, Loftur minn. Manchester United er keppinautur en ekki óvinur. Pólitískur andstæðingur er heldur ekki óvinur. Eini óvinurinn er ESB.

[Salvör Kristjana Gissurardóttir, 4.4.2009 kl. 20:49]

Það er eftirsjá af þér Bjarni úr Framsóknarflokknum. Endilega hugleiddu að koma aftur!

[Jón Valur Jensson, 5.4.2009 kl. 00:13]

Höfuðóvinurinn er ESB, við erum sammála um það, við Loftur, Baldur og Bjarni.

En við dindlana þurfum við að kljást, hjá því verður ekki komizt, og að afhjúpa óþjóðhollustu þeirra og sviksemi við land feðra okkar og mæðra.