Rómantískasti staður í heimi

Hótel Valhöll er rómantískasti staður í heimi.

Þar sátum við hjónakornið yfir selöngi og sauð nú í ljósaskiptunum og horfðum á regnboga sem var ýmist í hennar glugga eða mínum og rifjuðum upp sögur af skrýtnum bókum og enn skrýtnara fólki sem kaupir þær, selöngenum sem drukknaði í ölvesinu, frönskum mel sem býr til betra kaffi en annað fólk og horfðumst í augu sem grámyglur tvær.

Við vorum semsagt að halda upp á 22 ára brúðkaupsafmæli en giftingin er tengd tveimur stöðum öðrum fremur sem eru gamla bændakirkjan í Hoffelli þar sem síra Baldur vígði okkur saman í leyni, Valhöll þar sem við héldum seinna upp á herlegheitin með okkar fólki, jú og tveir aðrir, svítan á Hótel Höfn og lítil lækjarspræna í Álftaverinu en nú er þetta blogg komið á svo persónulegar nótur að jaðrar við úthverfu og snýst í annað.

Við Elín enduðum á að tala um húsið Valhöll sem er fínna nú en nokkru sinni enda kominn nýr og metnaðarfullur vert. Sjálfur hafði ég fundið hálfrar aldar mynd af Valhöll í gramsi og held að amma mín Kristín hafi tekið. Læt hana fljóta hér með en á henni sést hvað saga þessa húss er mikil og íslensk.

- Líklega bjargar kreppan þessu húsi, sagði konan mín vitra og fagra þegar hún kvaddi mig til að fara í útlegð á Snæfellsnes minnug þess að Össur og nokkrir aðrir metromenn vilja á það jarðýtu en eru nú blessunarlegas of blankir til.

Smá meira um hjónabandið sem byrjaði semsagt hjá séra Baldri Kristjánssyni á vordögum  fyrir 22 árum. Löngu seinna sátum við saman í kaffi á Sunnlenska, ég, klerkurinn og Hólmfríður á Iðu sem var fyrir áratugum vinnukona hjá karli föður mínum eins og Elín mín seinna, en aldrei ég, og talið barst að hjónaböndum og Hólmfríður hafði orð á að þetta hjónaband hefði nú vel dugað.

- Já, fólk sem ég gef saman skilur aldrei. Það hefur aldrei gerst, sagði klerkurinn með pókersvip þess sem aldrei segir nema satt.

- Nú það er merkilegt, sagði ég og varð búralegur af því hvað ég hugsaði mikið en bætti svo við eftir svotla stund: Þú ættir eiginlega að auglýsa þetta Baldur og fá þannig til þín fleiri hjónavígslur!

Ég man að það kom löng þögn en á meðan varð ég þess áskynja að Hólmfríður sem er úr Tungunum eins og ég og því hrekklaus sál samsinnti þessari uppástungu. En Baldur varð sífellt dularfyllri í framan og laumaði svo út sér:

- Eruði vitlaus. Hver heldurðu að vilji svona hjónaband nútildags...

Athugasemdir

[Guðrún María Óskarsdóttir., 25.5.2009 kl. 01:13]

Skemmtileg frásögn.

Til hamingju með brúðkaupsafmælið til ykkar hjóna.

Þingvellir eru einstakur staður en sjálf gifti ég mig einmitt þar og hélt veislu með nánustu í Valhöll, en sökum þess er staðurinn rómantískur , tek sannarlega undir það.

kv.Guðrún María.

[Hrönn Sigurðardóttir, 25.5.2009 kl. 08:39]

Bjarni! Þú ert einstakur - (hér mundi ég setja hjarta ef ég væri ekki hrædd um að Elín kíkti stundum á bloggið þitt)

[Árni Gunnarsson, 25.5.2009 kl. 12:01]

Láttu vaða Hrönn! Hvernig dettur þér í hug að Elín fari að skoða bloggið hans Bjarna?

[Ísleifur Gíslason, 25.5.2009 kl. 13:13]

Til hamingju með daginn