Skáldagáfa sem ég ekki hefi

Nú hafa enn nokkrir orðið til að hrósa mér óverðskuldað fyrir skáldagáfu. Um daginn vélaði Karl Th Birgisson mig til að vera í þætti sínum RÚV, Orð skulu standa. Ég reyndi að bera fyrir mig að ég gæti ekki botnað vísur og hefði aldrei sett saman svo mikið sem hálfa vísu um ævina.

En Kalli sem er bæði Austfirðingur og krati tók ekkert mark á mér frekar en fyrri daginn og bauðst til þess að senda mér fyrripartinn fyrirfram og ég gæti þá látið einhvern botna hann fyrir mig. 

Úr varð að Atli bróðir minn orti botninn sem svo margir hafa hrósað mér fyrir, svo margir að ég kann ekki við það lengur. En semsagt, vísan sem þeir ortu þar með í sameiningu Karl og Atli var svona:

Kennarinn vill koma á

kjólaeftirliti

og fletta klæðum frauku þá

sem fer í ranga liti.

 

En Atli gaf mér reyndar sjö mismunandi botna við þennan samt strembna fyrripart, ég valdi þennan sem er hér að ofan en hafði auk þess á blaði hjá mér:

 

Kennarinn vill koma á

kjólaeftirliti

laus við klæði líka má

Linda nakin fara á stjá.

 

 

Kennarinn vill koma á

kjólaeftirliti

og fötum kvenna fækka má

fagstjórinn af viti.

 

 

Kennarinn vill koma á

kjólaeftirliti

laus við klæði kuldablá

kvendin mega skjálfa þá.

 

Kennarinn vill koma á

kjólaeftirliti

því kenna þessum kvennsum má

að klæða sig af viti.

 

 

Kennarinn vill koma á

kjólaeftirliti

og fötum kvenna fækka má

fagstjórinn af viti.

 

 

Kennarinn vill koma á

kjólaeftirliti

skoppa ber um skjáinn má

og skemmta oss af viti.

 

 

Ekki þarf að taka fram að allt er þetta út af umræðu sem varð um klæðaburð þeirra Evu Maríu  og Ragnhildar Steinunnar í söngvakeppni á dögunum þar sem fagstjóri Listaháskólans taldi kjóla sem þær stöllur klæddust mikið ljóta ef ekki hræmulega.

 

 

Athugasemdir

[JR (IP-tala skráð) 7.3.2010 kl. 21:02]

Bjarni.

Þarna ertu á heimavelli, láttu pólitíkna vera !

[(IP-tala skráð) 7.3.2010 kl. 21:45]

Kennarinn vill koma á

kjólaeftirliti

því kenna þessum kvennsum má

að klæða sig af viti.

Þessa hefði ég valið, þó allir séu botnarnir góðir.

[Helga Kristjánsdóttir, 8.3.2010 kl. 04:43]

Já,já gerist ekki betra. Það sem mér finnst skondið að Linda  er systir fyrrverandi tengda dóttur minnar og Kalli er bróðir annarar           fyrrverandi tengdadóttur minnar.
         Kennarinn vill koma á
         kjóleftirliti
         öðruvísi mér áður brá
         er Lindu líkaði helst að sjá.