Þegar sólin dansaði og ég vaknaði í timburmönnum

Sólin dansaði á himninum í morgunsárið eins og hún gerir alltaf þegar páska ber upp á réttum degi eins og nánar má lesa um hér. En sjálfur svaf ég þau firn af mér eins og hina 49 páskamorgnana. Vaknaði ekki fyrr en á tíunda tímanum og þá með skerandi timburmannahöfuðverk.

Við Egill vorum við gólfmálningu í bókakaffinu í gærkvöldi og gengum þaðan út úr terpentínusvækjunni hálfvegis rykaðir. En óskaplega montnir því þetta er okkur mikið afrek. Hér á bæ eru allir mjög samtaka í leti sinni til verklegra framkvæmda. Það var því stór sigur þegar fjölskyldunni var allri smalað á skírdag til málningarvinnu sem ég er að vona að hafi lokið í gærkvöldi.

Málshátturinn sem ég fékk í morgun innan úr rúsínu:

Ekki er gott að selja kaffi í málningarsvækju.

Aftan á málsháttamiðanum voru þau heilræði að hafa búðina lokaða fram á þriðjudag en þá verður nú dansað og þá verður lesið á fagurbrúnu trégólfi.

Athugasemdir

[Ásdís Sigurðardóttir, 4.4.2010 kl. 12:43]

Gleðilega páska 

[Haraldur Haraldsson, 4.4.2010 kl. 14:44]

Gleðilega Páska Bjarni bloggvinur til þín og þinnar fjolskyldu,Halli gamli þekkir þenna hausverk úr málningunni í 46 ár/Kveðja

[Jón Magnússon, 5.4.2010 kl. 09:53]

Gleðilega upprisuhátíð Bjarni og til hamingju með að hafa bara timburmannahausverk vegna vinnu við málningu.