Saga eftirlifenda ef efnilegt stórvirki

Bókin Saga eftirlifenda, Höður og Baldur, kom út nú á haustdögum hjá Nykri. Höfundur er Emil Hjörvar Pedersen. Hér er á ferðinni stórvirki sem hélt mér föngnum frá fyrstu blaðsíðu. Eiginlega ævintýrasaga úr óræðri framtíð og grárri forneskju og á sér helst systur í skáldaheiminum í sögum Tolkiens.

Bókin er eins og sögur Tolkiens ævintýrabók fyrir börn og ekkert síður fullorðna. Hér er stokkið fram og til baka um aldir enda sögupersónurnar hinir ódauðlegu æsir og vættir þeirra sem hafa ranglað hér um jarðarkringluna um árþúsundir.

Gallalaust er verkið ekki. Þess verður mjög vart við lesturinn að höfundur hefði mátt slípa það betur, jafnvel bara góður prófarkalestur hefði gert mikið.  Bókin öll minnir á efnilegt barn sem vantar þá ögun og vandvirkni sem þarf til að stórvirki þetta eigi möguleika á að vera kallað meistaraverk.

Höfundur hefur boðað að þetta sé fyrsta bókin af þremur í þríleik um æsina ódrepandi, Höð og Baldur. Það er vonandi að hinn ungi höfundur nái að slípa seinni hlutana betur því andagiftina á hann nóga til verksins.  Ég býð spenntur eftir framhaldinu. /-b.

Athugasemdir

[Kristján Fenrir (IP-tala skráð) 27.9.2010 kl. 12:32]

Sammála þér í einu og öllu um þessa bók, nema þá helst það að ég tel hana ekki við hæfi barna vegna grafískra lýsinga á því hvernig Váli og hans menn komu fram við Nönnu.

Annars finnst mér þessi bók stórgóð og bíð næstu með eftirvæntingu.