Leigubílstjórinn umhverfisvæni

Leigubílstjórinn minn milli Islamabad og Rawalapindi er með skúffukjaft og ekki laus við að vera skuggalegur ásýndum. Hann rukkar mig feitt þennan dag því það er helgi því þá þarf hann bensín! Ég botna nú ekkert í svona rugli og prútta við nokkra. Sá með skúffukjaftinn býður lægst, 500 rúbíur sem er ófafé hér í Fjarskanistan en ekki nema 800 krónur íslenskar heima.

Hótelstjórinn útskýrir þetta með bensínið. Alla virka daga geta bílstjórar á leigubílum og öðrum almenningssamgöngutækjum keyrt á náttúrulegu gasi en þrjá daga er lokað fyrir afgreiðslu á gasinu, föstudag, laugardag og sunnudag. Þá er ekki um annað að ræða en að skipta yfir í bensín með tilheyrandi mengun.

Skiptin eru líka svolítið frumstæð því bensíntankur Súkkunar sem við sitjum er ekki lengur virkur. Þess í stað er tveggja lítra kókflaska með bensíni stillt upp frístandandi til fóta hjá farþeganum frammí (vinstra megin því við erum í breskri vinstri umferð og stýrið er hægra megin.)

Svo er slöngum stungið ofan í kókflöskuna og nú er bara að vona að það gusist ekki mikið uppúr, leiðinlegra að vera með bensínblautar tær. 

(Þið megið ekki segja Elínu, en áður en tók eftir þessum frábæra eldsneytisútbúnaði spurði ég bílstjórann hvort ég mætti reykja. Alveg sjálfsagt sagði hann með táknmáli, tók peningana sem hann geymir annars í öskubakkanum og bauð mér að nota hann.)

Athugasemdir

[Egill Bjarnason, 10.2.2012 kl. 08:51]

ætti hann ekki að vera horfa á veginn?

[Guðbjörg Elín (IP-tala skráð) 10.2.2012 kl. 13:45]

Bjarni minn þetta er greinilega stórhættulegur staður, í guðana bænum vertu ekki að fikta við að reykja strákur ((;

[Elín Gunnlaugsdóttir (IP-tala skráð) 12.2.2012 kl. 23:46]

...það er verst að hún (Elín) er læs!