Kattasamsærið komið á bók

Í landi þar sem heilu stjórnmálahreyfingarnar eru kenndar við villiketti er við hæfi að út komi bókin Kattasamsærið. Kattasamsærið eftir leikhúsmanninn, djáknann og Eyrbekkinginn Guðmund S. Brynjólfsson er háalvarleg pólitísk bók um undirróður, svik, ofmetnað og hetjulega baráttu.

En engu að síður fyrst og síðast bráðskemmtileg barnabók um vandamál katta í samfélagi mannanna. Aðalpersóna er Petra Pott sem á í stöðugri baráttu fyrir tilvist sinni og þar koma vinir hennar til aðstoðar. Ofurkötturinn Hamlet hefur ráð undir rifi hverju og honum til aðstoðar eru m.a. hundurinn Lúsíus og þau Elinóra og Hrólfur sem eru allavega ekki kindur.

Bókina prýða skemmtilegar myndir Högna Sigurþórssonar myndlistamanns en það er Sæmundur sem gefur út. Frumsýning á bókinni verður á hátíðardagskrá í Fríkirkjunni í Hafnarfirði klukkan 8 í kvöld en síðan efnum við til bókamessu í Iðu við Lækjargötu klukkan 15 á laugardag.

Kattavinir, bókavinir og allir vinir þeirra eru velkomnir.

Athugasemdir

[Valgeir Matthías Pálsson (IP-tala skráð) 6.10.2012 kl. 17:27]

Örugglega skemmtileg lesning.

Bestu kveðjur Bjarni minn.

[Kalli Sveinss (IP-tala skráð) 6.10.2012 kl. 20:45]

Er rangt munað, að " einhver" hafi fyrir ekki löngu síðan, líkt samstarfsmönnum sem köttum ?? !!

 Sumir hefðu sagt um þá samlýsingu sem Rómverjar forðum.: " Vox faucibus haesit" - þ.e. " Mállaus af undran"  !!