Til varnar Árna Johnsen

Margt má um vin minn Árna Johnsen segja en mér þykir langt seilst að ætla að kæra fyrir umrædda Moggagrein. Grein þessi er ekki til muna óvægin heldur er höfundur fyrst og fremst að rekja skoðanir sínar í umdeildu máli. Skoðanir sem hann er ekki einn um heldur á sér fjölmarga skoðanabræður að meðal þeirra sem kynnt hafa sér málið.

Sjálfur hefi ég alltaf talið að það beri að ljúka rannsóknum vegna jarðgangagerðar og það hefur ekki farið framhjá nokkru mannsbarni að Vegagerðin hefur verið jarðgangahugmyndinni og öllum rannsóknum vegna hennar andsnúin. Það er ekki eina dæmi þess að Vegagerðin hafi á málum mjög afdráttarlausa og ósveigjanlega afstöðu. Það má nefna fjórbreiðan veg yfir Hellisheiði og Suðurstrandarveg sem dæmi. Ég ætla ekkert að fullyrða að þessi skoðanamyndun Vegagerðarinnar sé alltaf röng eða ómálefnaleg en það hefur fyrr gerst að stjórnmálamenn og aðrir hafi gagnrýnt þessa stofnun - sumir óvægilega. Og oft með stærri orðum en ég finn í grein Árna.

Það er einfaldlega ekki þannig að valdamiklir embættismenn eigi að vera hafnir yfir gagnrýni.

Ég hefi efasemdir um að nokkur hefði hótað mér málssókn ef ég hefði skrifað umrædda grein eða einhver annar af okkur 63 sem á þingi sitjum. Þar með er ég ekki að mæla því bót að Árni skuli drótta að því í greininni að Gunnar Gunnarsson hafi verið skipaður í embætti á annarlegum forsendum. Slíkar aðdróttanir án rökstuðnings eru aldrei smekklegar en þetta er ekki með því svæsnara eða verra sem sést hefur í blaðagreinum. Mikið mætti oft vera búið að stefna Sverri karlinum Hermannssyni ef þetta væri viðmiðið.

Þessi viðbrögð aðstoðarvegamálastjóra eru því vindhögg reitt í átt að Árna af því að menn halda að hann eigi enga vini. En það er misskilningur. Það skal upplýst hér með að við Árni erum vinir og ég veit að margir aðrir á vinnustað okkar við Austurvöll eru í sama vinahópi.

Ætlar að kæra Árna Johnsen

Athugasemdir

[Heimir Lárusson Fjeldsted, 27.4.2008 kl. 14:00]

Það er barnaskapur embættismannsins að halda að Árni liggi vel við höggi vegna vinafæðar!

[Iffi (IP-tala skráð) 27.4.2008 kl. 16:43]

Árni hefði eflaust getað valið orð sín betur en ég er sammála í því að kæra sé ekki réttlætanleg.  Mér finnst orðið furðulega algengt að fólk sem er gagnrýnt þjóti til og kæri fyrir ærumeiðingar (eða hóti a.m.k. lögsókn).

[Óskar Þorkelsson, 27.4.2008 kl. 19:02]

það fer svolítið eftir því hver gagnrýnir.. Árni er dæmdur glæpamaður og lygari sem aldrei hefur iðrast.. ég hefði kært hann umsvifalaust því Árni er að kasta steini úr glerhúsi.

[Gunnar Th. Gunnarsson, 27.4.2008 kl. 19:43]

Ég er algjörlega ósammála þér Bjarni. þú dæmir þig reyndar vanhæfan í þessu máli með því að segjast vinur Árna. En þetta snýst ekki um stóra eða litla vinahópa. Þetta hlýtur að snúast um hvernig Árni kýs að tjá sig um embættismann hjá hinu opinbera og þar fer hann yfir velsæmismörk að mati Gunnars Gunnarssonar.

Þegar þú segist efast um að Gunnar hefði kært þig fyrir sömu orð, þá ertu eiginlega að taka undir orð Árna um að maðurinn sé liðleskja.

Afhverju segirðu það þá ekki bara berum orðum?

[Guðjón H Finnbogason, 27.4.2008 kl. 21:16]

Það er oft erfitt að vera Johnsen.

[Tobbi (IP-tala skráð) 27.4.2008 kl. 21:54]

Það er erfitt að vera vegagerðarmaður í landi þar sem búa 200000 sérfræðingar í vegagerð.  Sérstaklega af því skoðanir á vegagerð eru sirka 198472.  Og þó?  Það er trúlega bara ein skoðun á vegagerð.  Hún er svona:  Það á að leggja veg þar sem mér hentar; STRAX.  Og ekkert helvítis kjaftæði meir enda hljóta allir skynsamir menn að sjá að þetta er algjört forgangsatriði.  Gallinn er sá að til þess að uppfylla þessa frómu og hógværu ósk þarf peninga.  Og mikið af þeim.  Og það er alveg sama hversu vegagerðarmenn sperrast, þeim tekst þetta ekki vegna þess að hið háa Alþingi telur að líka þurfi að byggja sjúkrahús, skóla og flugvelli fyrir þá takmörkuðu fjármuni sem til skiptanna eru.  Og ég vil leyfa mér að lýsa því yfir að sérfræðingurinn sem Erlingur félagi minn forðum fékk til að gefa, væntanlega ítarlega rökstutt, álit á dugleysi vegagerðarmanna hafði ekki hundsvit á því sem hann var að segja miðað við þau starfsskilyrði sem Vegagerðinni eru búin.  Ég veit ekki hvort margir hönnuðir þurfa að búa við það að spila úr alltof litlum fjármunum og reyna að láta þá endast í sem lengstan vegarspotta til að Jón á Syðra-Hóli komist í kaupfélagið til að nálgast neftóbak og sigtisbotna, og sömuleiðis á kjörstað til að kjósa þingmanninn sem skipaði svo fyrir að vegaféð yrði að endast, fremur en að fara að ítrustu reglugerð frá Brussel og leggja væna vegi þar sem umferðin er mest og láta svo hina aumingjana eiga sig.  Ég hef nefnilega unnið töluvert með verkfræðingum Vegagerðarinnar og veit að þeir eru snillingar í sínu fagi.  Hins vegar er veruleg ósanngirni fólgin í því að kenna þeim um þau slys sem á vegum landsins verða, þótt alltof margir, og þar á meðal alltof margir Alþingismenn, slái sig til riddara með því.  Sannleikurinn er sá, og það vitið þið auðvitað innst inni, að slys verður aldrei hægt að fyrirbyggja vegna þess að mannskepnan fer aldrei eftir þeim reglum sem henni eru settar.  Ég fullyrði það til dæmis að öll þau óhöpp sem orðið hafa á Reykjanesbrautinni í vetur hafa ekki orðið vegna þess erfiðar aðstæður voru ekki nægilega merktar heldur vegna þess að menn tóku ekki mark á viðvörunarmerkjum og óku ekki eftir aðstæðum. Þetta veit ég vegna þess að ég hef sjálfur oftar en einu sinni lent í lífshættu í vetur vegna þess að ég fór að merkjunum og  þetta vita auðvitað allir sem vilja vita.  En það er vitaskuld  langauðveldast að kenna helvítis Vegagerðinni um.  Og svo ef einhvern innan hennar þrýtur langlundargeðið og ber hönd fyrir höfuð sér þá er hann úthrópaður.  Og það af þeim sem betur máttu vita og síst skyldi.

Og bara til að það sé á hreinu; ég vinn ekki hjá Vegagerðinni og lagði frá mér járnaklippurnar og trilluna fyrir þrettán árum.

[Gulli litli, 28.4.2008 kl. 07:43]

Gleymum ekki að maðurinn er dæmdur þjófur og hefur margoft verið staðinn að lygum....það vegur þyngra en margir vini að mínu mati ef á að taka manninn alvarlega!

[Gissur Þórður Jóhannesson, 28.4.2008 kl. 08:34]

það getur vel verið að Árni segi ekki altaf satt. En getur það ekki verið góð regla hjá mönnum að minnast orðana,,Sá yðar sem syndlaus er kasti fyrstur steini"og svo framvegis. 

Hvað átti Árni við þegar hann sagðist hafa gert tæknileg mistök"?

[Gulli litli, 28.4.2008 kl. 08:42]

Æ ekki gefa mér þetta. Menn bera meiri ábyrgð ef menn eru kosnir á þing til að setja okkur hinum lög....sem við erum svo dæmd fyrir ef við brjótum....Ég er ekki syndlaus, mér er ekki illa við Árna en hann ER dæmdur þjófur! Tæknileg mistök,,,,fuss og svei!

[Gulli litli, 28.4.2008 kl. 09:35]

Látið ekki eins og fólk sé blóðþyst...það er bara verið að segja að Árni er ekki trúverðugur..

[Eiður Ragnarsson, 28.4.2008 kl. 10:47]

Ég las þessa grein hans Árna og það eina sem stakk mig verulega í henni er það hvernig hann ræðir um ráðningu Gunnars, mér finnst það ósmekklegt þó ekki sé meira sagt.

Hitt er svo annað mál með þessi jarðgöng til Eyja, að þau eru draumórar því að fara grafa í gegnum virka eldstöð er bara vísir að geðveiki og ekkert annað, og að halda því fram að þarna sé hægt að grafa tæplega 40 km löng göng, fyrir litla 16 miljarða er annar draumurinn sem ekki rædist.

Viðmiðunartölur Vegagerðarinnar segja að kostnaður við 1 km í göngum sé um 700 miljónir með vsk, og reiknin nú hver fyrir sig.

En svo geta menn deilt um það hvort að Bakkafjar eða Þorlákshöfn hefði átt að vera málið, ég hef ss ekki sterkar skoðanir á því, það eru kostir og gallar við báða staði. 

En það er líka spurning hvort að þetta sé ekki tækifæri fyrir Sunnlendinga, að þarna verði bara Norð austur höfnin staðsett, nóg er landrýmið, og skilyrðum þarna hefur verið líkt við eina af stórum höfnum Dana, Hanstholm, en ég þekki það ekki persónuleg hversu líkt þetta er.

[Guðmundur (IP-tala skráð) 28.4.2008 kl. 13:09]

http://blogg.visir.is/gb/2008/04/26/bjanalegt-ni%c3%b0urlag-a-yfirlysingu/

[Guðjón Sigþór Jensson, 28.4.2008 kl. 14:56]

Margir líta á Árna Johnsen eins og hvern annan trúð sem gengur upp í því að skemmta fólki. Það getur verið svo sem ágætt en verra er þegar allri skynsemi er fleygt fyrir borð. Árni virðist bera lítið skynbragð hafa af verkfræði. Hann telur að það óframkvæmanlega sé jafnvel góð leið og annað sem hefur verið reynt.

Við skulum ígrunda að á sínum tíma var talið óframkvæmanlegt að byggja höfn í Þorlákshöfn einkum með hliðsjón af hve brimasamt er þar í suðaustan átt. Við hafnargerð þar var þar erfitt rétt eins og í Grímsey að finna nægjanlega stórt og gott grjót. En þetta var leyst farsællega með dólemítönum frægu sem unnt var að krækja og læsa saman þannig að Ægir gamli gat ekki valdið neinum vandræðum.

Í vestanverðum Eyjafjöllum telur Vegagerðin hafa nægt af góðu og stóru grjóti sem unnt er að nýta við hafnargerðina. Bakkafjöruhöfn er ekki aðeins mun hagkvæmari heldur einnig raunhæfari kostur en jarðgöng gegnum eldvirk jarðlög og sennilega mjögóþétt og margsprungið. Þá er ólíku að jafna hvort siglt er með erlent ferðafólk út í Eyjar heldur en að aka því gegnum dimm og drungaleg jarðgöng.

Óskandi er að Árni finni sér e-ð þarflegra fyrir hendur en að hafa æruna af þeim vegagerðarmönnum sem þó eru að kappkosta að finna raunhæfar leiðir að bæta samgöngur með það í huga að kosntnaður sé í samræmi við það sem samgöngubætur mega kosta. Eða ætlið þið Árni að standa saman í því að megnið af fjárveitingum til vegagerðar verði varið í jarðgöng sem kannski aldrei verða annað en slæm martröð? Betur væri fyrir land og þjóð að reisa sér ódýrari minnisvarða!

Mosi

[Haraldur Haraldsson, 28.4.2008 kl. 21:31]

Maður vill ekki segja sannleikan um þessa Vegagerð Ríkisins,margir hugsa en Árni þorir!!!! ,hún hefur alltaf verið Ríki i Ríkinu,og farið sinu fram,og við að sæta okkur við það,er ekki mál að linni og þeir alvarlega teknir i gegn,sem þarna stjórna,samber ferjumál og önnur mál yfirleitt/Halli gamli

[Hommalega Kvennagullið, 29.4.2008 kl. 03:21]

Það mætti nú eflaust kæra einhverja hér fyrir ljót orð.  Ég spyr, hafi menn einusinni verið dæmdir fyrir glæp, hver sem hann er, missa menn þá réttinn til þess að tjá skoðanir sínar??´

"Árni Johnsen ER dæmdur þjófur" segir einhver.  Já, en viðskulum ekki gleyma því að hann ER líka lýðræðislega kjörinn þingmaður, og það átti sér stað EFTIR að hann varð þessi svokallaði dæmdi þjófur.

ÉG skal svosem ekkert segja um það hvort orð Árna hefðu mátt vera þetta eða hefðu mátt vera hitt.  Það sem hann sagði var einfaldlega satt, bara spurningin hversu mikið þarf að Bómullarpakka sannleikanum.

Góð skrif hjá þér Bjarni, MJÖG góð.

[Gulli litli, 29.4.2008 kl. 13:49]

Menn missa ekkert við að vera dæmdir þjófar nema trúverðugleikann! Ég vil ekki blóð, mér finnst bara Árni ekki trúverðugur og hananú. Er ekki að dæma hann. Vinir Árna verða að þola aðrar skoðanir. Eitt enn, góð skrif hjá þér Bjarni, ég er bara ekki sammála!

[Guðjón Sigþór Jensson, 29.4.2008 kl. 15:49]

Varðandi dóminn yfir Árna þá var ákært aðeins fyrir hluta af því sem hann var upphaflega grunaður um græsku. Ákæran snerist fyrst og fremst um störf hans sem formaður bygginganefndar Þjóðleikhússins. Störf Árna sem formaður samgöngunefndar Alþingis voru ekki síður aðfinnsluverð, t.d. fékk verktakafyrirtæki eitt viðhaldsverkefnið um Reykjavíkurflugvöll án útboðs. Árni var gripinn með beiðnabók frá þessu sama verktakafyrirtæki sem þykir mjög grunsamlegt.

Það er því fyllsta ástæða að halda þessu til haga enda Árni sat ekki inni fyrir nándar nærri allar yfirsjónirnar og mistök.

Mosi

[Sigríður Sigurðardóttir, 29.4.2008 kl. 17:07]

  Las þessa grein eftir Árna, og get ekki skilið hvers vegna Gunnar Gunnarsson vill kæra hann.  Var að vísu ósmekklegur í orðum um skipun Gunnars í embætti, en hvergi gat ég séð ástæðu til meiðyrðamáls fyrir dómstólum.  Nú er Árni sérlegur "áhugamaður" um jarðgöng milli lands og Eyja, svo það er skiljanlegt að honum sé mikið niðri fyrir.  Hef sjálf ekki mikla trú á að hægt sé að gera jarðgöng frá Eyjum upp á land.  Má kannski um kenna svartsýni af minni hálfu, eftir að það gaus nánast "í bakgarðinum" heima hjá mér á því herrans ári 1973.

  Að lokum, þá man ég ekki betur en að Árni hafi fengið uppreist æru, þá hann hafði afplánað sinn dóm, og sóttist eftir sæti á Alþingi aftur.  Því eru menn þá endalaust að velta sér upp ú fortíðinni.

  Batnandi mönnum er best að lifa.

  Fínn pistill Bjarni.

[Óskar Þorkelsson, 29.4.2008 kl. 17:30]

tilvitnun í Sigríði :  Því eru menn þá endalaust að velta sér upp ú fortíðinni.

Sko.. Að fortíð skal hyggja er framtíð skal byggja !

Árni er dæmdur glæpon sem aldrei hefur iðrast og fékk uppreisn æru á ansi vafasaman hátt af góðvinum í sjálftektarflokknum.

Skari

[M.T. (IP-tala skráð) 30.4.2008 kl. 07:39]

Hann er enginn þjófur hann Árni.  Af því að það var einhver gólfdúkur og eitthvað grjót sem hann tók sér sem borgun, þykir það þjófnaður. Hver reynir svo ekki að ljúga sig út úr vandræðum. Meira að segja Clinton, laug að öllum jarðarbúum, til að reyna að koma sér út úr vandræðum. Er hann samt talinn stórkostlegur maður af flestum. Ef allir væru settir í fangelsi sem hafa tekið hluti í leyfisleysi, væru ekki margir á ferli á götum landsins. Svo eru menn sem draga að sér peninga, svíkja undan skatti og stela á óopinberan hátt, það eru trúleg þeir sem "gelta hæst" Árni er frekur, sem er gott í þessu starfi, hann kemst langt á frekjunni og dugnaðinu. Hann er fínn kall og skemmtilegur.

Sá sem segist ætla að kæra Árna fyrir greinina er lögfæðingur, þarf eitthvað að segja meira. Eins gott að allir eru ekki svona þenkjandi það væri þá "vertíð" hjá lögfræðingum.

L.H.