Húspostilla vorra tíma

Evrópuvitund heitir ein af jólabókunum í ár, gefin út af stofnunum Háskóla Íslands. Hér er komin húspostilla vorra tíma því bók þessi hefur að geyma mikilsverðar trúarjátningar þeirra sem vilja gera það sem höfundar í kveri þessu kalla Evrópu-rétt, ekki þó í því samhengi hvað tilheyri lagabálkum eða réttarfari heldur í samhenginu hvað sé rétt og hvað sé rangt út frá Evrópu. Grein um þetta ber semsagt heitið: "Evrópurétt" og "Evrópu-rangt": Hvernig hægt er að klúðra innleiðingu evrópskra tilskipana í íslenskan rétt. Útfrá sömu sjónarmiðum væri þá kannski hægt að tala um Íslands-rétt og Íslands-rangt og þykir örugglega frekar hallærislegt.

Fyrir heiðingja á akrinum eins og undirritaðan er einnig fróðlegt að lesa rit þetta til þess að kynnast þeim framandi þankagangi sem þarf til að gera stjórnsýslufræði að trúarbrögðum. Í heilli grein er fjallað um evrópuvitund utanríkisráðherra Íslands - kemur ekki á óvart að Davíð karlinn er þar talinn heldur vitundarlítill!

Ritið er skrifað í kansellístíl sem hæfir vel efninu og víða í því er að finna sögulegar réttlætingar t.d. þar sem leitað er uppruna Evrópuhugsjóna í frumkristni, Rómverska heimsveldinu og grískri fornmenningu. Bók þessi er nauðsynleg öllum Evrópu-réttþenkjandi heimilisfeðrum til upplestra á kvöldvökum.

En nú hefur mér semsagt tekist að blogga um bækur og pólitík í senn og líklega mál að linni. Vil samt í lokin minna á upplestrarkvöldið í Sunnlenska bókakaffinu annaðkvöld, klukkan átta, en þá mæta til okkar Þórhallur Heimisson, Heimir Már Pétursson, Úlfar Þormóðsson og Hallur Hallsson.

 

Athugasemdir

[Fannar frá Rifi, 17.12.2008 kl. 22:40]

ætti bókinn ekki frekar að bera nafnið: Evrópuómeðvitund?

[Axel Þór Kolbeinsson, 17.12.2008 kl. 22:49]

Undirtitillinn er frábær.  Hvernær varð Evrópa að heilli fræðigrein?

[Jón Valur Jensson, 18.12.2008 kl. 00:20]

Skv. frétt í Mbl. eru tugir nýnema í s.k. "Evrópufræðum" bara við Bifrastarskólann – til viðbótar við þá, sem fyrir eru – en námsbraut í þeim "fræðum" hefur einnig verið haldið uppi í H.Í. og sennilega fleiri skóla. Þarna nema þeir vizkuna um "Evrópusamrunann" úr Eiríki Bergmann Einarssyni, Baldri Þórhallssyni og öðrum þvílíkum, og svo undrast menn, að það sé erfitt að hafa frið fyrir þessum lærlingum þeirra út um allt, á meðan venjulegt fólk sinnir óáreitið störfum sínum, nytsemisnámi og góðu fjölskyldulífi og á sér yfirleitt einskis ills von nema þá helzt nú í kreppunni. En jafnvel þá, þegar verkefnin öll blasa við, sækir þetta lið á ennþá harðar og verður ekki fullsatt fyrr en það stendur yfir höfuðsvörðum íslenzks fullveldis og öryggisákvæðum stjórnarskrárinnar þar um.

Þetta unga fólk við "Evrópunámið" er það sama sem gjarnan fekk enga sérstaka Íslandssögukennslu, heldur "samfélagsfræði" í staðinn. Þarna sjá menn, að það á ekki að líta fram hjá því smáa og hógværa – og að þjóð á aldrei að vanvirða sögu sína með þögninni eða með heimskulegri útvötnun afstæðishyggjunnar – þá sækir einfaldlega annað en þjóðhollustan á í staðinn – í þessu tilfelli Brusselvaldshollustan undir sauðargæru "Evrópuhugsjóna".

[sandkassi (IP-tala skráð) 18.12.2008 kl. 00:56]

Ætli sé ekki til svona ESB deprogrammer námsbraut einhverstaðar?

Svona eins og notað er á Moonista og þvíumlíkt. Jose Manuel Barroso er gamall Maoisti frá Portugal.

Deprogramming heitir fagið, fá prófessorstöðu í HÍ fyrir það.

[marco (IP-tala skráð) 18.12.2008 kl. 01:52]

Og Bjarni er gamall og nýr Maóisti úr Tungunum.  Af þessu er hann stoltur.  Fylgilag við fjöldamorðingja vekur upp þær kenndir hjá sumum.

[Jón Valur Jensson, 18.12.2008 kl. 02:15]

Tímabær tillaga hjá þér, Gunnar Waage!

[sandkassi (IP-tala skráð) 18.12.2008 kl. 02:15]

Þú gerir þér grein fyrir því Marco að þú ert fremur sérstakur maður, eru verkir með þessu?

[sandkassi (IP-tala skráð) 18.12.2008 kl. 02:18]

já er það ekki bara?

[Bjarni Harðarson, 18.12.2008 kl. 10:17]

góð umræða og gott hjá marco að minna á að ég var maóisti - var það frá 16 ára aldri og alveg fram undir 19 aldursárið og sú hreyfing hafði menn eins og pol pot og stalín líka í hávegum. þetta voru bernskubrek en ég hef alla tíð síðan haft skömm á kommúnistum og lærdómurinn frá þessum tíma hjálpar mér við að skilja þá sem horfa á mýrarljós hvort sem þau heita esb eða alsælur í austurvegi.

[Gullvagninn (IP-tala skráð) 18.12.2008 kl. 17:30]

Stjórnmál sem trúarbrögð... alveg rétt.  Hugtakið pólitísk rétthugsun er einmitt fengin að láni frá gamla sovétinu, þar var það hættulegt að vera pólitískt ranghugsandi.  Það er mín trú að það verði einnig upp á teningnum í evrópusambandinu, hvort sem það er evrópu-rangt, eða umhverfis-rangt.

[marco (IP-tala skráð) 19.12.2008 kl. 00:53]

Gunnar skrifar: "Þú gerir þér grein fyrir því Marco að þú ert fremur sérstakur maður, eru verkir með þessu?"

Já, stundum.  Annars ekkert meira en íbúfen getur tæklað.  Verst hvað ég á erfitt með að skeina mig.  Þú ert merkilega naskur á einkennin.

Annars verð ég að hæla Bjarna fyrir að leifa mér að gaspra þetta hér.  Ég væri löngu búinn að loka á marco sjálfur.