Birkilanskir auðmenn og hetjusögur í bókahillum

Á birkilönskum degi eins og þessum er eiginlega ekki við hæfi að blogga um pólitík. Jón Ásgeir sem þjóðin hefur borið á höndum sér lengi kennir nú öllu öðru en sjálfum sér um sínar ófarir og vorkennir sér að tapa úr höndum sér búðasjoppum í London. Honum er aftur á móti slétt sama um þann skaða sem hann hefur unnið íslenskri þjóð með glannaskap sínum. Og kennir svo Davíð um!

Þetta er eiginlega ófyrirleitnari og vitlausari farsi en svo að gaman sé að og nær á degi eins og þessum að lesa bækur en fréttir. Rakst uppi í skringihillunni minni í bókabúðinni  á næfurþunnt blátt harðspjaldakver frá 1929 eftir Sæmund Stefánsson niðursetning sem heitir Æfisaga og draumar. Karl þessi var fæddur 1859 á Bjarnastöðum í Hvítársíðu og ólst upp sem niðursetningur við illt atlæti:

 Eg man ekki betur, en að eg væri barinn því nær á hverjum degi í fjögur ár...

Hér er grimmdarleg lýsing á uppvexti manns sem nær fyrir vikið aldrei fullum líkamsþroska, veikist af holdsveiki og lifir það að finna útlimi, bein og holdstykki  detta af sér, ýmist af kali eða veikindum. En í stað þess að klæmst sé á þessu eins og Laxnes óneitanlega gerir í sambærilegri ævilýsingu í Ljósvíkingnum eða þá að höfundur sé fullur sjálfsvorkunnar í anda Birkilands er sagan sögð blátt áfram. Höfundur er þakklátur fyrir þá sem reynast honum vel en sleppir því að nafngreina hina.

Sæmundur niðursetningur er því alls ólíkur Jóni Ásgeiri í því að kenna veröldinni um það sem miður fer og hefði þó frekar efni á því. 

 

Athugasemdir

[Heimir Lárusson Fjeldsted, 4.2.2009 kl. 17:11]

Holl hugvekja.

[Baldur Kristjánsson, 4.2.2009 kl. 17:42]

Nett!

[Sævar Helgason, 4.2.2009 kl. 18:00]

Takk fyrir þetta, Bjarni.

[Rúnar Vernharðsson (IP-tala skráð) 4.2.2009 kl. 18:02]

Flott hjá þér Bjarni.

[Jenný Stefanía Jensdóttir, 4.2.2009 kl. 18:18]

Skringihillan þín er góð! Meira af þessu

[Ragnhildur Kolka, 4.2.2009 kl. 18:59]

Frábært, kærar þakkir. Ég vil þó minna á að hetjur finnast víðar en í bókahillum.

[Guðmundur Brynjólfsson (IP-tala skráð) 4.2.2009 kl. 20:02]

Þetta er svo sannarlega í Birkilönskum stíl; engum manni hefur betur, á íslensku, tekist að lýsa eigin hörmungum í eins knöppu formi.

[Ragnar Martens, 4.2.2009 kl. 20:03]

Það geta margir tekið þetta til sín

[ingi (IP-tala skráð) 5.2.2009 kl. 03:30]

Betra er hverjum manni og þroskandi að tala um hugmyndir en náungan.

[Helga Ágústsdóttir (IP-tala skráð) 5.2.2009 kl. 05:37]

 Við systkinin vorum heppin að eiga yndislega föður"systur" sem var (þetta er svo ljótt!!!) boðin upp hjá hreppsnefndinni 3-4 árs, rldku bstnið.  Afa okkar blöskraði og tók telpukornið án endurgjalds; sagði henni þvbí næst kalla sig og sína frú, pabba og mömmu.  - Þessi föðursysi var alltaf í miklum metum hjá okkur og naut virðingar. 

- (Skaut þessu inn að til fróðleiks og viðmiðunar um hve skammt er í raun á milli Útrásar og allsleysis í íslensku samfélagi. (er fædd '47)).-

Æ, Bjarni, ég var svo fegin að sjá þessi skrif þín!!! Fannst ég vera nalgast aftur til uppruna  okkar að hluta til; vorrar ísköldu, svöngu, börðu og lúsugu þjóðar. Og svo  hlýnaði mér og langaði að strjúka elsku kallinum um vangann. Ugglaust hefði nú ekki veitt af því - oft og mörgum sinnum - hér áður og fyrr meir. jafnvel víkja að honum flatköku með sméri og spenvolgri mjólk.

********************

Ætti ég nú ekki að koppí-peista þetta og senda Jóni Ásgeiri? Sennilega yrði hann svolítið hissa að sjá nafn sitt tengt niðursetningi vandlega börðum af vondu fólki

 ************************

Bráðum fara einhverjir að kenna Davíð líka um veðrið; kvefið og hóstann. EN allt er þetta ögn flóknara en það.

Það er nú það

Fleira ekki gert og fundi slitið - (hvað mig varðar).

Helga Ág.

[Helga Ágústsdóttir (IP-tala skráð) 5.2.2009 kl. 05:47]

Biðst auðmj´ðuklega forláts á ásláttarvillum, sem eru í ríkari mæli, en venja er til.

 Greinasrstúfur minn hér að ofan- ásláttarvillur:

Einhvers staðar á að standa "elsku barnið" og annars staðar fullum fetum "föðustsystir" ... en allt er þetta hégómi  miðað við að vera barinn næstum daglega 4 ár - og vera sennilega oft soltinn (og þá meina ég ekki að "langa í eitthvað verulega gott" að borða að auki; bara eitthvað að tönnlast á og koma í magann).

H.Ág.

[Sædís Hafsteinsdóttir, 5.2.2009 kl. 14:52]

Takk fyrir þessu líka hrollvekju