Tilræði í hlíðum Ingólfsfjalls

Jón Ingi Gíslason hanabóndi í Dóminikanska er Deðrekur af Kjarnholtum. Svoleiðis menn eru varasamir. Ég hélt í einfeldni minni að hann væri vinur minn en hann er mér greinilega ennþá reiður fyrir að ég kaus mussukommana í VG. 

Í kvöld plataði hann mig í fjallgöngu á Ingólfsfjall og sagði að ég ætti að vera leiðsögumaður. Talaði um að koma með tvær eða þrjár vinkonur með sér -en slíkt er gjarnan á svermi umhverfis Kjarnholtadeðreka. Ég tók því mína spúsu með til að gætt yrði að siðgæði enda ótrúlega veikur á svellinu við slíkar aðstæður.

En þegar til kom mætti Jón þessi með fleiri tugi af mjög vafasömum íþróttapésum. Þar á meðal Skagamönnum sem tóku sig til og hlupu á fjallið, fjallinu sjálfu, mér og sauðfé í hlíðum þess til ama og vanvirðu. Og ég sem var neyddur til að fylgja hópnum hné tvívegis örendur í ferð þessari en var komið á stað aftur með lyfjagjöfum, snickers orkuskotum og skensi en ætlaði þó varla að duga til. Það var ekki fyrr en ég sá mína egta flóafrenju æða á undan mér og komin í félagsskap með íþróttabelgjunum að ég ákvað að ég yrði að rísa til lífs og láta mig hafa það að gengið væri á þetta aldna og virðulega fjall með slíkum rassaköstum.

Allt var þetta þó mikil mannhætta sökum hjartsláttarkasta, fótriðu, mæði og almennra þreytuverkja og enginn vafi að þetta var tilræði og allt að því pólitískt morð sem hér var reynt. Ég mun á næstu dögum rannsaka hvort Jón Ingi sé orðinn hallur undir ESB og þessvegna svona annt um að koma mér fyrir kattarnef. Það kemur mjög margt til greina og málið þarfnast djúprar íhygli og rannsókna enda mun alvarlegra en nokkurntíma Icesave eða titlingaskítur útaf einhverjum matarklúbbi í Brusselinu.

Atvik þetta kennir mér að fara varlega í að ganga á fjöll og enn varlegar í vinfengi við Deðreka sem reka hanabúgarða á Dóminikanska.

Ég ætti auðvitað að vera sigri hrósandi að hafa lifað þessi ósköp af en bæði er ég með slíkum verkjum að ég ekki veit nema ég sé raunverulega dauður og í ofanálag gerir þessi árstími mig alltaf svoldið dapran þegar daginn fer að stytta svona skart og ég þarf ljós til að rata á stjákli hér um gangana á Bakka.

Athugasemdir

[Hrönn Sigurðardóttir, 22.7.2009 kl. 00:35]

hahahah Jón Ingi hefur alltaf verið varasamur - og lagast ekkert!

[(IP-tala skráð) 22.7.2009 kl. 00:48]

Dásamlega skemmtileg frásögn, og ég efa ekki að um tilræði hafi verið að ræða.

Þér er því víst vissara að fara varlega á næstunni því næst verður það trúlega úr launsátri

[Guðrún María Óskarsdóttir., 22.7.2009 kl. 00:48]

Sæll Bjarni.

Það er nú þokkalegt ef þú ætlar að fara að drepa þig á fjallgöngum þegar þjóðin þarf mest á þér að halda he he...

kv. Guðrún María.

[Sjóveikur, 22.7.2009 kl. 01:03]

ef verkirnir eru erfiðir, má reikna með því að það sé tóra í þér, ekki öruggt en sterkur grunur hjá mér, fyrir utan að það væru landráð af þér að drepast núna ljúfurinn

Besta kveðja og takk fyrir skrifin hingað til, sjoveikur

[Jón Valur Jensson, 22.7.2009 kl. 01:20]

Já, ertu ekki bara lærisveinn Þórbergs, Bjarni minn – í öllu nema líkamsæfingunum. Kostulegur endirinn hjá þér, í ofanálag við allt hitt, og farðu nú að ná þér, líka þinni pólitísku heilsu. Og kjóstu aldrei aftur Vinstri græna*, annars færðu að dúsa í því svartasta til frambúðar.

* En kannski þú hafir trúgirnina líka frá Þórbergi ...

[Anna Benkovic Mikaelsdóttir, 22.7.2009 kl. 02:03]

hihihi...kannski ESB sé skömminni skárra? Hver veit?

[Hildur Helga Sigurðardóttir, 22.7.2009 kl. 02:04]

Lymskuleg atlaga atarna að hrekklausum Flóamanni !

Sammála þér svo um dvínandi birtustig og vissan trega því fylgjandi.

Kveðja úr Vesturbænum,

[Bjarni Kjartansson, 22.7.2009 kl. 10:43]

Sól líkama okkar er ekki lengur á hæstum degi, svo mikið er víst.

Ég komst að þessu þegar ég flutti til baka frá Vestfjörðum og var að dudda úti í skúr við hiemili mitt, sem var það einnig fyrir vesturför mína.

ÞAr var hnallur nokkur úr járni, -sem ég hafði notað sem öryggi undir bíla þegar ég tjakkaði þá upp ,,- var fyrir mér og ég grip í kenginn ofan á honum og huggðist vippa hnallóderminu til, svona líkt og ég hafði svo oft gert ,,í denn" , brá svo við að helvítið vitrist jarðfastur.  ÉG gáði hvort helv. hefði gróði fastur en auðvitað var það lyftigetan sem hafði minnkað nokkuð.

Um hina sönnu Sólarstjörnu, vil ég segja, að ágústkvöldin eru bara ´romó og flott, náttúran bólgin af forðanæringu fyrir komandi vetur.  Öxin lúta að jörð full loforða fyrir næsta vor. 

Verr er með lyddurnar og hræðdda liðið sem stjórna nú landi voru.  Þeir eru viti sínu fjær af hræðslu og því óstjórnhæfir.

Með kveðju síðsumarsins

Miðbæjaríhaldið

[Bjarni Kjartansson, 22.7.2009 kl. 10:47]

Til viðbótar.

Heilræði.  Ég missti vin minn eitt síðsumar úr fjallgöngu á fögru fjöllin vestra.  Þar fór mikill baráttumaður heiðarleika og sanngirni.  Sakna Einars míns ljúfa daglega.

Ekki ofreina þig ljúfur, ekki láta kappið fara með þig.

[Ásdís Sigurðardóttir, 22.7.2009 kl. 10:57]

Þú ert skemmtilegur að vanda, takk fyrir mig

[Jón Logi (IP-tala skráð) 22.7.2009 kl. 11:02]

Svona pistlar lyfta lífsandanum á hærra plan á erfiðum tímum. Takk fyrir þetta Bjarni !!!

[Jón Ingi Gislason (IP-tala skráð) 22.7.2009 kl. 12:34]

Takk fyrir síðast félagi!

    Jú ég taldi verulega von til þess að VG yrði af atkvæði þegar blóðspýan stóð út úr eyrum og nösum hins fyrrum galvaska atkvæðis þeirra Mussukvenna á fjalli landnámsmannsins í gærkveld....En allt skilar sér þó heim að lokum ; atkvæði ,bóksalar , brottnumdar Flóafrenjur og góður húmör sem heldur andanum gangandi nú um stundir.

[Ingvar Guðmundsson (IP-tala skráð) 22.7.2009 kl. 13:40]

Þvílíkur sagnameistari sem þú ert Bjarni.  Það væri jafnvel hægt að fyrirgefa þér þína pólitísku villu fyrir fleiri svona sögur. 

[, 22.7.2009 kl. 15:08]

  Svo Ingólfsfjallið hafði þig ekki þessu sinni. Gott  var það

[Gunnlaugur A. Júlíusson (IP-tala skráð) 22.7.2009 kl. 16:07]

Þú þarft bara að taka þennan mann með sömu aðferð og hann beitir á þig. Farðu að æfa fjallgöngur af krafti (en svo vitnum verði ekki við komið). Láttu svo slag standa, æddu á undan honum og biddu hann hvergi þrífast næst þegar hann ætlar að ganga frá þér á þennan hátt.

[Erla J. Steingrímsdóttir, 22.7.2009 kl. 16:21]

Snilldarfærsla hjá þér og skemmtileg:)

[Ragnhildur Kolka, 22.7.2009 kl. 19:38]

Þú hefur lag á að létta manni lífið og ekki vil ég missa þig fyrir björg, en láttu stjörnum prýdda athugasemd Jóns Vals þér að kenningu verða.

[Páll Blöndal, 23.7.2009 kl. 01:33]

Ofdekraðir ESB andstæðingar á moggablogginu
http://pallblondal.blog.is/blog/pallblondal/entry/918743/

[t.jons (IP-tala skráð) 23.7.2009 kl. 15:18]

datt'etta svona snöggt í hug:

Á bgrattann að sækja Bjagrni minn

bíðugr þess aldrei bægtur

Spúsan ríður ekki við einteyming

Sama hvergnig þú lætugr

stuðlar og höfuðstaðir ;)

[Haraldur Haraldsson, 23.7.2009 kl. 17:00]

Þetta ágætt Bjarni og vel sagt/en maður gekk þarna sumarið 1949 var þá kaupamaður að Laugardælum,með mer vara mjög svo brattgengur drengur Arnór nokkur Hannibalsson,hafði vel við honum upp,en þegar niður var farið við Alviðru lentum við i klettum það var Halli ekki góður en Arnór á heimsvelli/Kvðja Halli gamli

[Solveig Pálmadóttir, 23.7.2009 kl. 19:34]

Bjarni minn!

þú ert bara yndislega fyndin! Snilldarfærsla og frásögn!