Gott er að slóra...

Bestu sunnudagarnir eru þeir sunnudagar þegar ekkert er gert nema slóra. Í morgun slóraði ég yfir bókum uppi í rúmi fram að hádegi eða þar til ég dottaði aftur um tólfleytið. Svo slóraði ég yfir gömlu drasli hér í kompunni minni og um kaffileytið fórum við hjónakornið í slórlegan göngutúr um Ölfusforirnar.

Það var kalt en fátt eins heillandi eins og ullargult sinuteppið sem liggur hér yfir endalausu víðerni þar sem er ekkert er nema einn og einn skurður og örfáir slóðar.

Eftir þetta slóraði ég svo við að elda sunnudagamat og ætla að hengslast í tölvunni í kvöld án þess að ætla mér nokkuð sérstakt með því og draga mig snemma inn í kuðung yfir bók og vindlareykingum.

Svona á að lifa lífinu. 

Athugasemdir

[Kalli Sveinss (IP-tala skráð) 28.3.2010 kl. 22:24]

Félagi Bjarni !

 " ´´´inn í kuðung yfir bók og VINDLAREYKINGUM".

 Hversvegna storka örlögunum ?

 Vindlareykingar ! ?

 Vissulega náðu sumir vindlareykingamennirnir að verða við aldur, t.d. Churchill 91árs, - já og Séra Friðrik að verða 93 ára. og reyndar sjálfur faðir sálkönnunarinnar Sigmund gamli Frued, að verða 83 ára - en - Frued kallinn fékk hálskrabba af bölvuðum reykingunum - ella hefði hann náð að " sálgeina fleiri hálfruglaða stjórnmálamenn !!

 Nægir engan veginn að fara eftir slagorði Krabbameinsfélagsins, þ.e. " Passið punginn" !

 Hættu reykingaósiðnum STRAX !

 Með því móti hefurðu sterkar líkur að komast á lífsleiðinni - allan hringinn í pólitíkinni - þ.e. Framsókn, v-rauðir, Samfylking ? - Og endað sem 1. þingmaður Suðurkjördæmis fyrir Sjálfstæðisflokkinn !!

 Þannig á að lifa lífinu !

 Mundu loks hvað Rómverjar sögðu: " Fiat experimentum in corpore vili" - þ.e. " Ögraðu ekki tilveru þinni" !

[Hrönn Sigurðardóttir, 29.3.2010 kl. 12:05]

Svakalega held ég að Kalli Sveinss hafi verið aftarlega í röðinni þegar kímnigáfu var úthlutað.