Kommúnisminn, MacCarthyisminn og fordómarnir

"Bjarni, við þennan morgunlestur fór ég að hafa samúð með Laxnes og öðrum sem að hafa orðið fyrir einelti stjórnvalda og eru í anda McCarthy. Svelgdist örlítið á morgunteinu! Er nokkur fasisma uppgangur þarna á Selfossi? Þú virðist ekki ætla að fara í tertuboð með Valgerði í tengslum við 50 ára ESB afmælið. Greinin finnst mér vel skrifuð en það er sterklega verið að höfða til fordóma með henni. Bjarni, hvað finnst þér um það að Styrmir Gunnarsson sagði í nýlegu sjónvarpsviðtali að hann hafi hneygst til þjóðernishyggju á yngri árum. Sama gerði Eyjólfur Konráð sem var ritstjóri. Ert þú ekki til í að sýna þeim álíka dómhörku fyrir að vera nasistar, eins og sletturnar sem Össur fær fyrir að hafa verið ritstjóri Þjóðviljans?"

Ofanskráð skrifaði Gunnlaugur B. Ólafsson frá Stafafelli nýlega inn á bloggið hjá mér sem athugasemd við grein sem hét minnir mig vofa kommúnismans og er hér aðeins neðar á þessari síðu. Þessi gagnrýni er fullkomnlega þess verð að gefa henni gaum. Fátt er jafn illt og fordómar, ofstæki og nornaveiðar eins og þær sem MacCarthy kallinn stóð fyrir.

Þó er til eitt sem er líkast til verra. Það er kommúnisminn.

Ég ætla rökstyðja þetta aðeins nánar og þar með að færa rök fyrir þeirri hörku sem ég tel rétt að sýna kommúnistum og dreggjum þeirra í samfélaginu. Þetta verður svona í fyrsta lagi, öðru lagi og þriðja lagi...

Í fyrsta lagi er sá munur á kommúnistum og nasistum að þeir fyrrnefndu monta sig margir af því enn að hafa verið handgengnir þessari stefnu. Stefnu sem reynist hafa fleiri mannslíf á samviskunni en nokkur önnur hugmyndafræði síðari alda. Stefnu sem hefur mannfyrirlitningu og ofbeldi sem óhjákvæmilega fylgifiska. Gunnlaugur minnist hér á menn sem voru um tíma handgengnir nasismanum. Afi minn var það á sínum yngri árum og sat meira að segja inni fyrir þær skoðanir sínar. En líkt og allir aðrir sem glöptust til að hrífast af þýska undrinu á millistríðsárunum skammaðist hann sín fyrir þetta eftirá. Sama reikna ég með að Styrmir geri. Hvorugur þessara hampaði hakakross eða Hitlersskeggi.

Í áróðursdóti Vinstri grænna má aftur á móti finna myndir þar sem Steingrímur J. Sigfússon er dreginn í líki Che Cuvara. Menn veifa rauðum fánum og syngja internationalinn. Rómantíkin sem vinstri menn hengja á minningar um gengna ofbeldismenn kommúnismans er ekki bara ósmekkleg heldur beinlínis óhugnanleg og alltaf ósmekkleg. Eða hvað segðum við um mann sem gengi um með hakakross í barminum og segðist gera það af því hann væri fyrrverandi nasisti!

Í öðru lagi:

Gunnlaugur undrast að ég skuli leyfa mér að kalla kommúnismann til í gagnrýni á Evrópusamband, framtíðarland og jafnvel sjávarútveg. En ég held að það sé full ástæða til og ég minntist hér aðeins á þá hugsun kommúnista millistríðsáranna að með sósíalismanum væri komið á vísindalegri stjórnun samfélagsins í stað glundroða hins kapítalíska samfélags.

Sömu öfl telja í dag betra að setja samfélaginu fleiri reglur en færri. Litlu skipti þó gengið sé á rétt fjöldans ef það dugi til að fanga einn óréttlátan. Steypa verður öllu samfélaginu í mót reglugerða sem helst af öllu koma frá yfirþjóðlegum stofnunum. Stjórnvaldsákvarðanir skulu helst teknar af vísindamönnum og ef eitthvað er vísindalega skaðlegt, eins og majones eða tóbak, þá mega stjórnvöld skipta sér af því út í það óendanlega og ekkert skal til sparað.

Þessi hugsun er sífellt nærri og drifkraftur margs af því vitlausasta sem fram kemur í pólitík á hverjum tíma. Oft íklædd falskri skikkju jafnaðar, réttlætis og framfara. Að ég ekki tali um heilbrigðis. Það má kalla þessa vitleysu sósíalisma, kommúnisma eða einfaldlega alræðishyggju. Og þessi hugsun er það sem ógnar okkar nútíma samfélagi, menningu þess og hagsæld meira en nokkuð annað.

Í þriðja lagi:

MacCarty ofsótti fólk fyrir skoðanir þess. Í greinum mínum hef ég bent á það sem ég tel alvarlega vitlaust í okkar annars ágæta samfélagi. Á þessu tvennu er mikill munur og ég finn þess illa stað að ég hafi alið á fordómum eða fasisma. Og þó. Fasisminn er systir kommúnismans í ofstjórn á daglegu lífi fólks. Ef ég hef alið á fordómum í garð kommúnisma og fasisma þá ætla ég ekkert að kvarta undan því...

Í fjórða lagi:

Ég er mjög svag fyrir rjómatertum og kann vel við Valgerði Sverrisdóttur - en, nei, ég held ég hefði komið mér undan því í lengstu lög að fara í afmæli hjá ESB.

Athugasemdir

[Ásdís Sigurðardóttir, 5.4.2007 kl. 19:46]

innlitskvitt

[Tómas Þóroddsson, 5.4.2007 kl. 20:22]

"ef eitthvað er vísindalega skaðlegt, eins og majones eða tóbak, þá mega stjórnvöld skipta sér af því út í það óendanlega og ekkert skal til sparað" ekki reyna þetta Bjarni....það er þitt fólk sem er með fasista boð og bönn.

Það er líka þitt fólk sem hefur farið með ofsóknum á valin fyritæki sem ykkur ekki hugnast. 

[Gunnar Th. Gunnarsson, 5.4.2007 kl. 23:17]

Alveg sammála þér Bjarni, flott nálgun á þetta.

Mig minnir að það hafi verið Willie Brandt fyrv. kanslari V-Þýskalands sem svaraði ásökun um að hafa verið kommúnisti á yngri árum á þennan veg  " Sá sem er ekki kommúnisti þegar hann er tvítugur, er hjartalaus. Sá sem er það ennþá þegar hann er fertugur, er heilalaus".

[Gunnlaugur B Ólafsson, 6.4.2007 kl. 09:50]

Góðan daginn, Bjarni

Man að ég var á forsendum einhvers ofstækis, ásakaður um kommúnisma á sínum tíma og hafði þó aldrei játast nokkru slíku, né kynnt mér Marx, Engels, Lenín eða hvaða nöfnum ber að nefna þá. Sýnist þú vera að gera út á þessa "Rússagrýlu" sem beitt hefur verið á alla þá sem hafa skoðanir til vinstri í samfélagsumræðu. Minnist þess ekki að til þess hafi verið ætlast að íhaldsmenn á okkar aldri hafi verið látnir svara fyrir Hitler og nasismann, sem hefði verið sambærilegt.

Það eru líka til kommúnistaflokkar á Spáni, Ítalíu og Frakklandi sem hafa verið að fá til skamms tíma um 20-30%. Í hugum fólks í þessum löndum eru þeir góðu gæjarnir sem börðust fyrir lýðréttindum í þessum löndum. Losuðu fólk undan gerræði fasisma og nasisma, Franco, Mussolini og Hitler.

Hef dvalið í henni Ameríku í nokkur ár. Man til dæmis eftir að hægri menn notuðu kommagrýluna á hugmyndir Hillary Clinton um að koma á heilbrigðiskerfi í landinu og tryggja öllum aðgang að læknisþjónustu, sem að ég vona að þér þyki ekki asnalegt réttlætiskvak. Hann Bill, karlinn hennar, ræddi um þriðju leiðina á þessum tíma. Stíga dansinn þannig að áherslan á frelsi tryggji svigrúm og sköpun einstaklinsins, en líka áhersla á jöfnuð, sem tryggir að fólk og fyrirtæki standi jafnt gagnvart stjórnsýslu og lögum.

Góður hristingur er sem sagt gerður af; Frelsi, jafnrétti og kærleika (það er ekki pólitískt rétt að segja "bræðralag" lengur).

        Njóttu dagsins, ætla að ganga á Keili og fara í blátt lón.

                                           Bestu kveðjur,

[Tómas Þóroddsson, 6.4.2007 kl. 13:43]

Bjarni ég var að reyna spyrja þig í gær, afhverju svarar þú ekki? Sjá hér

[Haraldur Haraldsson, 6.4.2007 kl. 16:41]

Eg bara von að þessir timar komi ekki hingað þó margt bendi til þessa,mer fynnst fólk meiga hafa synar skoðanir hverjar sem þær eru ,ef maður britur ekki lög/Mer fynnst oft örla á þeim/Sosilalisti er ekki endilega Komonisti/  Frekar en Framsókn Afurhald  og Sjálfstæðisflokkur Ihald!!!!og svo Framvegis/Halli Gamli

[Gústaf Níelsson (IP-tala skráð) 8.4.2007 kl. 01:42]

Bjarni, þetta er ágætlega upplýsandi pistill hjá þér. Gunnlaugur B. Ólafsson hefur hins vegar afhjúpað sjálfan sig sem ólesinn og illa að sér. Slíkum mönnum er auðvitað hægast að hafa hjótt um sig; og ekki rekur mig minni til þess að bændur hafi tekið hænur sínar með sér í kaupstað. Gunnlaugur tekur allar sínar hænur með, svikalaust.

[Gunnlaugur B Ólafsson, 8.4.2007 kl. 11:00]

Gústaf, aldrei myndi ég ætlast til að þú hefðir "hægt um þig" þó mér hugnuðust ekki hrokafullar stjórnmálaskoðanir þínar á stúdentaárum. Varðandi það að vera "ólesinn og illa að sér" þá afhjúpar þú aftur þennan hroka sem mér fannst ég verða var við fyrir um 20 árum. En við erum öll á ferðalagi þar sem þarf að hlusta, meta, taka tillit til aðstæðna og þú ert trúlega sjálfum þér verstur, ef samskipti þín og skoðanaskipti byggjast á slíkri dómhörku og fordómum.

[Bjarni Harðarson, 8.4.2007 kl. 13:26]

ég held að við séum nær hvorum öðrum í skoðunum gunnlaugur en ætla mætti af þessum skrifum. en það er tvennt sem ég finn að - annarsvegar hvernig margir fyrrverandi kommar hampa kommaleiðtogunum. sjálfur var ég kommi á menntaskólaárum eins og þú manst en tel það með mínum mestu heimskupörum í dag. reyndar þroskandi en það er önnur saga. frelsi, jafnrétti, bræðralag og kærleikur er það sem þetta gengur allt út á en ekki frelsið hrátt og miskunnarlaust...

[Gústaf Níelsson (IP-tala skráð) 8.4.2007 kl. 13:52]

Gunnlaugur, hvað eru þeir að róa, sem ekki kunna áralagið? Skrif þín hér bera vott um kunnáttuleysi og pólitíska "lesblindu". Slíkum mönnum er auðvitað hægast að hafa hljótt um sig, en sé dómgreindin ekki meiri, mega þeir mér að meinalausu, gjamma að vild. Þótt ekki séu við Bjarni pólitískir meðreiðarsveinar, má hann eiga það, að hann skrifar iðulega um pólitísk málefni af þekkingu og innsæi. Það er meira en hægt er að segja um marga aðra.