Afmælisveisla í bókabúðinni

Sunnlenska bókakaffið er eins árs í dag, laugardag og það verður haldið upp á það klukkan tvö. Skáldin Matthías Johannesen og Þórunn Valdimarsdóttir heiðra okkur með upplestri og söngkonur stíga á stokk.

Verslunin hefur líka tekið miklum stakkaskiptum, verið stækkuð og er um leið mun meira kaffihús en áður var,- semsagt hvorutveggja í einu, kaffihús og verslun. Fornbókadeildin hefur verið stækkuð talsvert og þar er nú að finna marga dýrgripi. Mest munar um einkasafn Kristjáns heitins frá Djúpalæk, skálds sem í eina tíð bjó í Hveragerði. Kristján yngri sonur skáldsins bað okkur um að taka bækur þessar í sölu en meðal gripa í safninu er margt af merkum árituðum ljóðabókum frá samferðamönnum skáldsins.

Kristján yngri þekkti ég ekki áður en til þessa kom (og þá ekki þann eldri sem dó 1994) en það er kunningskapur með Kristjáni jr og Atla bróður mínum, enda báðir heimspekingar. Það er bæði skemmtilegt og magnað að vera með þetta safn skáldsins í hillunum, þar er hver bók annarri merkari. Skondin tilviljun líka fyrir það að fyrir hálfum fimmta áratug átti ég í nokkur misseri heimili í húsi Kristjáns frá Djúpalæk í Frumskógunum í Hveragerði,- reyndar fyrir mitt minni en foreldrar mínir leigðu á þeim tíma hús skáldsins eftir að skáldið sjálft flutti norður á Akureyri. Og ég ekki kominn til máls á þeim tíma...

Athugasemdir

[-sigm. (IP-tala skráð) 6.10.2007 kl. 12:21]

Ekki ónýtt afmæliteiti. Til lukku.

[Sigurður H. Einarsson (IP-tala skráð) 6.10.2007 kl. 17:42]

Til hamingju með afmælið. Mér virðist sem margar merkar bækur séu komnar í fornbókadeildina, og neyðist ég víst til að brenna alla leið á Selfoss til að líta á fornbókadeildina.

En þú mættir allveg auglýsa opnunartíma bókabúðarinnar fyrir okkur hin sem ekki búum á Selfossi. 

[Bjarni Harðarson, 6.10.2007 kl. 18:14]

Já nú er afmælisveislan búin og tókst mjög vel. Búðin er opin alla virka daga frá 10 - 6 og á laugardögum frá 11-4.  Verið velkomin.

[Margrét Annie Guðbergsdóttir, 7.10.2007 kl. 12:00]

Tl hamingju med afmaelid. Tad hefdi verid gaman ad kikja inn ef eg hefdi ekki verid stodd svona langt i burtu. Bid ad heilsa frunni.