Er Icesave save?

Nýjustu yfirlýsingar Birgittu Jónsdóttur og Péturs Blöndal benda mjög í þá átt að Icesave renni nú í gegnum þingið með smávægilegum lagfæringum. Það er dapurlegt en í nokkru samræmi við það sem búast mátti við. Núverandi stjórnvöld með Steingrím J. í fararbroddi gera allt til að styggja ekki hin gömlu nýlenduveldi í aðdraganda samninga um ESB. Dýrir eru ráðherrastólar langsoltinna manna. 

Það má ekkert gleyma sök gömlu stjórnarinnar í þessu máli sem tók afar linlega á þegar Bretar beittu okkur hryðjuverkalögum og gerðu í raun og veru árás á íslenskt efnahagslíf. Og það hlýtur að vera til umhugsunar hvort þeir menn sem stóðu að því að leyfa Icesave reikningana á sínum tíma, hvort þeim sé endalaust sætt í valdastólum. 

Næsti kúrs þessarar baráttu snýr svo að því að fá Icesave samningana tekna upp og málið tekið fyrir hjá dómstólum. Ef fréttir af fyrirvörum Alþingis ganga eftir er ekki útilokað að enn megi láta á málið reyna þó Alþingi illu heilli samþykki samninginn á næstu dögum.

Rasismi eða asnaskapur

Ég veit ekki hvort heldur á að skýra þessa morgunfrétt mbl.is með vísan í rasisma eða bara almennan kjánagang. Það er fátítt að tilgreint sé með þessum hætti hvers lenskar fyllibyttur bæjarins eru - stundum tekið fram í fréttum að um erlenda ferðamenn eða menn af erlendu bergi brotna en þetta er með því klaufalegra og það liggur milli línanna að það sé sérstök frétt að þetta hafi verið grænlendingur:

 Lögreglan á höfuðborgarsvæðinu þurfti að hafa afskipti af grænlenskum karlmanni...

Gekk berserksgang

Í klaustri á Jótlandi

"Nordisk Folkecenter for Vedvarende Energier" er eiginlega nútíma klaustur þar sem rekin er fræðslumiðstöð um orkunotkun, vindmyllur, sólarrafhlöður, vetni og lífdísel. Það eru kálfar á beit utan við gluggann hjá mér og litlir froskar hoppandi innan um risasnigla við veginn sem ég geng til mála.Ekki til betri staður til að slaka á og ekki einu sinni sjoppa í grenndinni. Í einhverra kílómetra fjarlægð er reyndar þorpið Hyrup sem minnir helst á Hvammstanga. Aðeins norðar er svo smábærinn Thisted sem söguáhugamenn þekkja af bæklingi Árna Magnússonar um galdramál þar en allt tilheyrir þetta 56 þúsund manna sveitarfélaginu Thy sem nær yfir vesturkryppuna á norðanverðu Jótlandi og langleiðina að Álaborg.

Og hér var semsagt haldinn hinn norræni Fólksríkisdagur sem er nokkurra daga ráðstefna um sjálfstæði og stjórnmál Norðurlandanna. Ráðstefnu þessari lauk í dag og ég var hér fulltrúi Heimssýnar á Íslandi. Fer heim á morgun. Einkar skemmtileg og fróðleg samkoma og þar utan frábært tækifæri til að slípa kunnáttuna í hinum skandinavísku mállýskum.

Reyndar stálumst við Antti Pesonen til þess að tala ensku í kaffitímunum en hann er álíka vondur í sænsku eins og ég í dönsku. Antti þessi er félagi í Finnska Sjálfstæðisflokknum sem berst gegn ESB aðild Finna og jafnframt bóndi. Fyrir utan að vera sjálfstæðissinni þá eigum við það sameiginlegt að vera báðir laglausir. Já og fleira sameiginlegt því Kirsí kona Antti sem var líka á ráðstefnunni er kennari og tónlistarmaður eins og mín kona. Þegar við vorum öll komin á trúnaðarstigið í gærkvöldi játaði hún að allskonar kynni hennar af tónlistarmönnum væru slík að hún hefði talið það traustara að eiga laglausan mann!!!

Ég veit ekki hvort það var eitthvað svipað sem réði hjá Elínu minni.

En að öðru. Ég lofaði að skrifa eitthvað um verðlagsmál í Danaveldi og birti pistil þar um á AMX sem er reyndar að stofni til útvarpserindi sem ég flutti símleiðis á FM-Selfoss. 

Vanhæf ríkisstjórn

Vanhæf ríkisstjórn kallaði fólk utan við Alþingishúsið fyrir ári síðan og á kannski enn betur við nú þegar eina bjargráð stjórnvalda er að kyssa vönd kvalara sinna. Duglaus var Geir en sæmilega meinandi.

Það er ekki einu sinni að þjóðin geti treyst því að núverandi stjórnvöld vilji vel nú þegar bæði Steingrímur og Jóhanna eru orðin að einhverskonar ESB umskiptingum og Össur líklega valdamesti maður landsins! Það er vitaskuld fráleitt að Ísland þurfi að hlýða gömlum nýlenduveldum sem hafa skilið eftir sig skítug skóför um allar álfur og aldrei greitt til baka fyrir glæfraverk sinna eigin Íslandsbersa. Kröfur Breta og Hollendingaer eins og Eva Joly bendir á fráleitar.

Stjórnin er ekki bara vanhæf fyrir það að ætla að samþykkja Icesave og þvinga okkur inn í ESB í blóra við bæði þingmeirihluta og þjóðarvilja. Stjórnin er líka vanhæf fyrir það að hafa í engu tekið á þeim vanda sem síðasta ríkisstjórn var gagnrýnd fyrir. 

Við skulum ekki reikna með að það verði svipuð mótmæli á Austurvelli aftur en ólgan í samfélaginu er að verða svipuð og var. Greining Evu Joly nú og uppljóstranir úr lánabók Kaupþings kalla á tafarlausar aðgerðir.

Í kóngsins...

Ég er í smá orlogi eins og það heitir í guðdómlegum bókmenntun Jochums Eggertssonar - þetta þegar menn lenda í ferðalögum í stað þess að ganga að sinni vinnu. Hefi semsagt frí frá því að vera kaffidama í sjö daga og er í Kóngsins Kaupmannahöfn í embættiserindum fyrir Heimssýn, samtök ESB andstæðinga á Íslandi.

Úti á Jótlandi halda Skandinavískir sjálfstæðissinnar nokkurra daga ráðstefnu og ég er orðinn svo hátt metinn hér með frændum vorum að mér hefur verið falið að flytja opnunarræðu! Það á einhverskonar Skandinavísku. Ég vona að það gangi skandalalaust enda nóg sem Íslendingar hafa á samviskunni hér meðal dana þessa dagana og er nú viðsnúið nokkuð frá millistríðsárunum þegar stoltir Íslendingar gátu skammast í Baunum fyrir þeirra aldalanga yfirgang á sögueyjunni.

En Danmark er dejlig og á morgun fer ég í grillveislu hjá frændum vorum og tek svo lestina eftir það vestur á bóginn. Það er reyndar tvennt sem má finna að Danmörku. Það er alltof heitt hérna í dag og það er allt allt of dýrt hérna. Það er dýrt fyrir Íslendinga en það er líka frekar dýrt fyrir danskinn sjálfan og veltir upp spurningum um hvaða lönd eru dýr og hver ódýr...

 

 

Vinsælustu bækurnar...

Nú um stundir ferðast landinn um Ísland og þykir þá gott að grípa með sér eina kilju í ferðalagið. Vinsælustu kiljurnar hjá okkur eru þessar: Karlar sem hata konur eftir Stieg Larsson, Óvinafagnaður og Ofsi eftir Einar Kárason, Bókaþjófurinn eftir Markus Zusak.

Ein bók er þó hvað vinsælust hjá okkur og það er vísnabókin ,,Ef væri ég söngvari". Bókin er fallega myndskreytt af Ragnheiði Gestsdóttur. Henni fylgir svo geisladiskur þar sem allar vísurnar eru sungnar af Kór Kársnesskóla en stjórnandi hans er Þórunn Björnsdóttir. Sannarlega góð bók fyrir börnin.

Pólitískar bækur hafa notið mikilla vinsælda síðustu misserin. Bækurnar sem tróna á metsölulistanum þar eru: Sofandi að feigðarósi eftir Ólaf Arnarson, Hrunið eftir Guðna Th. Jóhannesson og Hvíta bókin eftir Einar Má Guðmundsson.
Bækur um ESB eða ekki ESB eru einnig mjög vinsælar og vinsælust af þeim bókum núna er ,,Hvað er Íslandi fyrir bestu?" eftir Björn Bjarnason.

Upptalningu á vinsælum bókum lýkur svo með því að nefna Sandvíkur- Skruddu eftir Pál Lýðsson. Sunnlendingar sem og aðrir kaupa þá bók enda fátt betra í sumarfríinu en að lesa gamansögur.

-eg

Bör Börsson í íslenskri pólitík

Það er svoldill Bör Börsson í okkur öllum en hvergi eins áþreifanlegur eins og hjá þeim sem sjá aulalega sveitamenn í hverju horni á Íslandi, sauðskinnskó á fótum allra fullveldissinna og vilja ofan í kaupið rífa niður allt sem gamalt er...

Sjá nánar í pistli á AMX

Tilræðismenn nást á mynd

 

 

 

Í gærblogginu sagði ég frá aðför að mínu kyrrsetulífi, almennri nautnastefnu og leti. Nú hefur mér borist mynd af tilræðismönnum, öllum nema Jóni Inga Gíslasyni sem tók myndina og var eiginlega sá eini af þessum glæpalýð sem ég kunni fyrirfram almennileg skil á. Það má reyndar taka það fram að í hópnum hér er samt frænka mín ein önnur frá vinstri, Kristbjörg dóttir Sesselju sem er dóttir Kristbjargar sem var dóttir Sesselju langömmu minnar og myndarlegi drengurinn sem situr þriðji frá vinstri er sonur Ingunnar Sæmundsdóttur sem átti Ingunni Sæmundsdóttur að ömmu en sú var afasystir mín þannig að hér gerist sem oft vill verða að frændur eru ekki frændum endilega bestir nema það hafi svo verið komið í ættum mínum að kyrrsetur hafi mínar og hóglífi hafi talist áhyggjuefni...

Einhverjir hafa verið að spyrja mig  hvað ég eigi við með að kalla Jón Inga Deðrek í fyrra bloggi og er því til að svara að svo kallast menn sem komnir eru af Diðriki Stefánssyni bónda í Laugarási á fyrri hluta 19.aldar en um Deðreka þessa var sagt að þeir væru allir bæði ríkir og rasssíðir hvernig sem það nú passar við menn sem hlaupa fjöll eins og geitur. Út með Hlíðum í sömu sveit er sama orð svo haft um vinnudrengi sem hafa verið í Úthlíð og ég er Úthlíðardeðrekur en Jón Ingi er af Diðrikakyninu sem er merkileg ætt og fjölmenn...

 

 

Tilræði í hlíðum Ingólfsfjalls

Jón Ingi Gíslason hanabóndi í Dóminikanska er Deðrekur af Kjarnholtum. Svoleiðis menn eru varasamir. Ég hélt í einfeldni minni að hann væri vinur minn en hann er mér greinilega ennþá reiður fyrir að ég kaus mussukommana í VG. 

Í kvöld plataði hann mig í fjallgöngu á Ingólfsfjall og sagði að ég ætti að vera leiðsögumaður. Talaði um að koma með tvær eða þrjár vinkonur með sér -en slíkt er gjarnan á svermi umhverfis Kjarnholtadeðreka. Ég tók því mína spúsu með til að gætt yrði að siðgæði enda ótrúlega veikur á svellinu við slíkar aðstæður.

En þegar til kom mætti Jón þessi með fleiri tugi af mjög vafasömum íþróttapésum. Þar á meðal Skagamönnum sem tóku sig til og hlupu á fjallið, fjallinu sjálfu, mér og sauðfé í hlíðum þess til ama og vanvirðu. Og ég sem var neyddur til að fylgja hópnum hné tvívegis örendur í ferð þessari en var komið á stað aftur með lyfjagjöfum, snickers orkuskotum og skensi en ætlaði þó varla að duga til. Það var ekki fyrr en ég sá mína egta flóafrenju æða á undan mér og komin í félagsskap með íþróttabelgjunum að ég ákvað að ég yrði að rísa til lífs og láta mig hafa það að gengið væri á þetta aldna og virðulega fjall með slíkum rassaköstum.

Allt var þetta þó mikil mannhætta sökum hjartsláttarkasta, fótriðu, mæði og almennra þreytuverkja og enginn vafi að þetta var tilræði og allt að því pólitískt morð sem hér var reynt. Ég mun á næstu dögum rannsaka hvort Jón Ingi sé orðinn hallur undir ESB og þessvegna svona annt um að koma mér fyrir kattarnef. Það kemur mjög margt til greina og málið þarfnast djúprar íhygli og rannsókna enda mun alvarlegra en nokkurntíma Icesave eða titlingaskítur útaf einhverjum matarklúbbi í Brusselinu.

Atvik þetta kennir mér að fara varlega í að ganga á fjöll og enn varlegar í vinfengi við Deðreka sem reka hanabúgarða á Dóminikanska.

Ég ætti auðvitað að vera sigri hrósandi að hafa lifað þessi ósköp af en bæði er ég með slíkum verkjum að ég ekki veit nema ég sé raunverulega dauður og í ofanálag gerir þessi árstími mig alltaf svoldið dapran þegar daginn fer að stytta svona skart og ég þarf ljós til að rata á stjákli hér um gangana á Bakka.

Að veifa jafnan röngu tré

Það er löng hefð fyrir þeirri vondu reglu á Íslandi að minnihlutinn skuli alltaf ráða og helst sá minnihluti sem hefur ranga skoðun.

Til áratuga réði Sjálfstæðisflokkurinn ríkjum í landinu þrátt fyrir að mikill minnihluti landsmanna væri tilbúinn til að fallast á skoðanir þess flokks og við súpum nú að nokkru seyðið af því ráðslagi. En af þeirri gullvægu reglu stjórnmálanna að lengi skuli vont versna var ákveðið að breyta til hér á landi um síðustu áramót þegar Sjálfstæðisflokkurinn ákvað í algeru ráðleysi sínu að afhenda Samfylkingunni kefli ráðsmennskunnar. Síðan hafa allir lotið þeirri reglu að kratar skuli ráða landi voru og verri reglu er líklega ekki hægt að innleiða landsmönnum enda sannast hér spakmæli Þórbergs heitins Þórðarsonar að kratinn er vissulega lægsta skepna jarðarinnar. ...

Sjá nánar pistil mill á AMX í vikunni